CURSO 2022/23

Durante o mes de decembro de 2022 tiveron lugar sendas charlas da ONG SOS RACISMO para concienciar ao alumnado de 3º de ESO sobre ditas problemáticas.

Debemos lembrar que entre os principais fins que persegue SOS RACISMO están:

• Loitar contra calquera forma de discriminación por razón de cor de pel, de orixe, de cultura ou relixión para lograr unha sociedade xusta e libre de prexuízos e estereotipos.
• Difundir valores, actitudes e prácticas para que a poboación recoñeza, acepte e normalice o carácter pluricultural e multirracial da sociedade galega, e valore positivamente a riqueza socioeconómica que achega a diversidade e a interculturalidade.
• Favorecer a integración sociolaboral do colectivo inmigrante residente en Galicia.

O grupo instrumental do Instituto "Dijo Cuatro", en colaboración con Afaco e coa Escola Infantil dos Rosales, actuou o luns 19 de decembro na Escola Infantil dos Rosales dentro da primeira parte do Proxecto “Un viaje en el tiempo”. No proxecto o grupo instrumental do noso Instituto, dirixido polo profesor do Departamento de Música, Juan José Dios Cañada, coordinador do programa de Edu Excelencia do noso centro (Grupo de Música "Dijo Cuatro"e Grupo de Teatro "Telón de Aquiles", en colaboración co profesor de Lingua e Literatura Española, Rafael Alonso Pica), interpretou diferentes panxoliñas e pezas musicais vinculadas coas lembranzas das persoas usuarias de Afaco que estiveron no encontro dos avós e  avoas de Afaco e os  neniños e neniñas da Escola Infantil dos Rosales.  

O EDLG convocou  ao final deste primeiro trimestre un concurso de postais de Nadal multilingüe para os grupos de 1º e 2º ESO. O alumnado coordinado polas súas titoras ou polo profesorado de Lingua Galega e Linguas Estranxeiras elaborou postais de Nadal que decoraron as aulas ou que se expuxeron no espazo expositivo do centro e na árbore de Nadal da biblioteca. As postais constaban de debuxo e texto en galego, francés, inglés ou portugués. Cada alumno/a escribiu unha postal personalizada para outro/a compañeiro/a da clase e decorou a postal con debuxos de Nadal.

Aquí tedes unha escolma delas e un video realizado polo EDLG:

VISITA Á DOMUS DA CORUÑA DO ALUMNADO DE QUÍMICA DE 2º DE BACHARELATO

 O mércores 07/12/2022, nunha actividade organizada polo Departamento de Física e Quimica, tivo lugar a visita do alumnado de Química de 2º de Bacharelato á Domus da Coruña. Na saída o noso alumnado puido aprezar as salas de exposicións, pero sobre todo puido disfrutar na súa visita da Sala de Fármacos deste museo científico.

 O alumnado de 1º de ESO do noso centro visitou nos meses de decembro e xaneiro en dúas quendas as instalacións do MUNCYT  nunha actividade organizada polo Departamento de Tecnoloxía.

Os monitores do MUNCYT dirixiron a visita ás diferentes salas do museo nas que o alumnado puido observar diferentes obxectos, aparellos e máquinas. Na sala Maiúscula, observaon o derradeiro proxector que funcionou no cine París da Coruña, o primeiro acelerador de partículas de España, unha lente que estivo na Torre de Hércules, os primeiros ordenadores de IBM, un alambique e unha locomotora, entre outros. 

Na sala Patrimonio puideron ver obxectos tan curiososos coma os biberóns romanos. Na sala Miscelánea, leváronos a ver os robots e instrumentos físicos e químicos moi curiosos coma un parafuso de Arquímedes ou mecheiros bunsen. Na sala de Innovación española, puideron ver as caricaturas dos inventores/as españoles/as e investigar sobre algúns deles nas pantallas informativas. Alí tamén aprezaron algún dos seus inventos como o motor de diésel de Eduardo Barreiros ou unha maqueta do submarino de Isaac Peral.

O alumnado puido acceder á cabina do avión Lope de Vega, o boeing 747 que no ano 1981 fixo o seu primeiro voo e transladou o Guernica dende Nova York a Madrid. Previamente os monitores explicaron as características e equipamentos que tiña e os materiais dos que estaba construído.

As derradeiras salas que se visitaron  foron exploradas dunha forma máis lúdica, xa que na sala do século XX xogaron a unha especie de xincana na que, grazas a unha serie de pistas, tiñan que ir atopando os obxectos que se describían (antigas lavadoras, sistemas de fichaxe no traballo, motos, ambientadores de cine, etc.).

A última sala, dedicada aos elementos da táboa periódica, era a máis interactiva de todas, con diversos videoxogos que puxeron a proba tanto as destrezas como os coñecementos químicos do alumnado.