Normalización Lingüística

CONMEMORAMOS O DÍA MUNDIAL DA POESÍA CO CERTAME "TIGRES COMA CABALOS"

Lun, 14/03/2022 - 10:51 — IES A Sangriña

No IES A Sangriña imos celebrar o Día Mundial da Poesía deste ano 2022 co Certame de poesía "Tigres coma cabalos". Esta actividade, organizada pola Bibliotrega Magdalena Garabatos e o Equipo de Dinamización da Lingua Galega e dirixida ao alumnado do noso centro, tamén servirá de homenaxe a Xela Arias, autora do poemario que dá título ao concurso.

Os poemas poderán enviarse até o propio día da conmemoración, o próximo 21 de marzo, ao correo electrónico sangrinha.edlg@gmail.com. As bases de participación completas poden consultarse na imaxe que ilustra esta noticia e no documento adxunto.

Non deixes de presentarte e conseguir o teu premio!

1 adxunto

CONCURSO DE LETTERING POLO DÍA DE ROSALÍA DE CASTRO

Mar, 22/02/2022 - 22:19 — IES A Sangriña

No IES A Sangriña queremos celebrar este 23 de febreiro, Día de Rosalía de Castro, cun evento moi especial; o noso primeiro Concurso de Lettering dedicado á fundadora da literatura galega moderna. Neste certame, o alumnado poderá mostrar toda a súa habilidade na arte de debuxar as letras dando forma aos máis fermosos versos da nosa grande poeta. O concurso está organizado polo Equipo de Dinamización da Lingua Galega e o premio é de 30€ en material de debuxo, escolar, deportivo ou en libros que escollerá o gañador ou gañadora. Os traballos poderán presentarse até o 3 de marzo no correo asangrinha.edlg@gmail.com.

PREPARÁMONOS PARA O DÍA DE CASTELAO

Mér, 12/01/2022 - 20:53 — IES A Sangriña

Para conmemorar o día de Castelao, que se celebra o próximo 15 de xaneiro, o Equipo de Dinamización da Lingua Galega do IES A Sangriña organizará un programa de Radio Trega.

A actividade consistirá na elaboración, por parte do alumnado, dun audiolibro que axudará a coñecer e divulgar "Retrincos"; unha das colectáneas de relatos deste autor fundamental na historia da literatura e da cultura galegas. Coa finalidade de organizar o proxecto, o alumnado que queira participar está convocado, o venres día 14 no primeiro recreo, a unha reunión na Bibliotrega.

Aqueles alumnos e alumnas que non poidan asistir á reunión poderán solicitar información para participar na actividade escribindo ao correo electrónico asangrinha.edlg@gmail.com

CONCURSO DE NADAL

Mar, 21/12/2021 - 17:40 — IES A Sangriña

O Equipo de Dinamización da Lingua Galega quere que o alumnado da Sangriña celebre o Nadal da maneira máis artística. Para iso, convocamos un concurso no que debuxar o Apalpador, o personaxe protagonista do Nadal galego, e ademais, as persoas participantes tamén poderán escoller crear a imaxe da Apalpadora. O premio consistirá nun vale de 30€ en material de debuxo, libros ou material escolar.

Os orixinais deberán enviarse por correo electrónico, antes do 10 de xaneiro, a asangrinha.edlg@gmail.com