O domingo día 8 de Maio tivo lugar o Campionato Provincial Escolar por Equipos, na categoría Alevín (alumnado dos cursos de 5º e 6º de primaria), foron 6 os equipos participantes (Virxe da Saleta; BenChoShey, Xadrez Ourense, San Pío X; Escola Ourense e San Cibrao) compostos por un total de 38 xadrecistas. O noso equipo estaba representado polo alumnado (Uxía Álvarez Pérez de 6º de primaria, Nerea Ledo Janeiro de 6º de primaria, Lucía Diéguez Vázquez de 5º de primaria, e completouse o equipo, con Luango Alonso Leite e Jacobo Álvarez Feijóo, ambos de 2º de primaria) e era a súa primeira participación neste tipo de torneos. Todos eles disfrutaron dunha tarde de xadrez enfrentándose con outros nenos e nenas da nosa provincia, con moita experiencia neste tipo de competicións e outras de carácter nacional, pero todo o noso alumnado desenvolveu unha gran actuación, sumando todos eles algún punto, quedando nun quinto posto, (con 8.5 puntos) e a só 5 puntos do segundo clasificado.
É de resaltar a nobreza das nosas xogadoras, que a parte de competir e xogar ben ao xadrez, axudaban aos rivais que tiñan enfrente, cando se lle esquecía pulsar o reloxio. Grazas a todos os pais e nais, que fixeron que os seus fillos e fillas, puideran participar neste torneo e ter unha experiencia positiva máis nas súas vidas.
O Departamento de Orientación do noso centro colabora no blog Orienta Galicia. Nel atoparás toda a información necesaria sobre bolsas, axudas, premios así como sobre ensinanzas de réxime especial, xeral e universitarias. Tamén inclúe información sobre ensinanzas universitarias e residencias.
O Cole de Cea estrea o videoconto "Todos os nenos do mundo seremos amigos"
O Cole de Cea ven de estrear recentemente unha versión en vídeo do conto"Todos os nenos do mundo seremos amigos" interpretado por alumnado de 1º e 2º de Primaria sobre unha versión do texto de Eulalia Valeri, debuxado por Asun Balzola, traducido por Xohana Torres e editado por La Galera no 1967 e publicado orixinalmente en catalán baixo o título "Tots els nens del món serem amics".
O traballo enmárcase nunha serie de accións que perseguen o obxectivo de adquirir competencias clave en comunicación lingüística nas que se poñen en xogo entonación, fluidez na expresión e boa articulación como elementos fundamentais dunha correcta expresión oral.
O equipo educativo que levou adiante esta iniciativa, formado por profesorado e alumnado dos dous primeiros cursos de Primaria, traballou primeiramente na recuperación e restauración dos debuxos orixinais deste libro de hai case 50 anos para posteriormente realizar unha adaptación do texto e a gravación e edición do audio. O modelo narrativo aposta por un traballo colectivo no que prima a participación de todo o alumnado por riba das constriccións propias dunha distribución asignada exclusivamente aos personaxes.
Este traballo compleméntase coa estrea dunha versión dramatizada no marco do festival celebrado no mesmo Cole de Cea no mes de decembro e na que participou todo o alumnado presente tamén na versión videoconto.
Con este proxecto o Cole de Cea quere recuperar do esquecemento esta obra literaria infantil así como render homenaxe á escritora, tradutora e ilustradora basca Asun Balzola que recemente ven de protagonizar unha exposición en Donosti.
Os alumnos e alumnas de 4º da ESO visitamos o día un de decembro a “Casa Grande de Cimadevila. Museo Otero Pedrayo”. Foi una visita didáctica que permitiu completar os coñecementos que xa tiñamos sobre a vida e a obra de Don Ramón Otero Pedrayo.. Nesta ocasión ademais de visitar a casa, tamén fixemos un breve roteiro literario polos arredores da mesma acompañados dos textos de Otero Pedrayo.
Agradecemos a sempre agarimosa acollida que Susi, a encargada do museo, nos dispensa e tamén toda a información que nos achega a respecto da vida e da obra do noso autor.
Os alumnos e alumnas opinan sobre a visita:
A visita a casa de Otero en Trasalba pareceume moi bonita e encantáronme as vistas dende a súa casa. Tamén me pareceu moi interesante o percorrido polo pobo lendo algúns textos de Otero. ( Nieves )
A visita que realizamos á casa de Otero estivo moi ben, a casa pareceume fantástica, sobre todo o modo en como está conservada. A guía que nos falou sobre a casa completounos toda a información que tiñamos del. (Patricia ).
Pareceume unha excursión moi interesante, xa que coñecemos a casa dun gran representante do noso pobo galego. A casa de Otero Pedrayo era unha casa moi fermosa. puidemos observar unha casa rural galega da época. Unha experiencia marabillosa.(Diego)
A excursión encantoume. Aprendín moito sobre Ramón Otero Pedrayo e a súa vida, ademais de como eran as casas da época e a sociedade. Pareceume unha actividade moi didáctica.(Santi)
Foi unha excursión moi didáctica. A pesar de que o frío e a néboa non axudaron moito, pasámolo moi ben. Foi moi fermoso o percorrido que fixemos e a casa de Otero. (Laura).
Foi unha boa experiencia poder ver onde viviu Otero Pedrayo, a súa casa está moi ben e fixemos un bonito percorrido (Alex)
Gustoume moito a visita á casa de Otero. Repetiría a experiencia(Hugo)
Amena e estupenda visita á casa familiar de Otero Pedrayo e aos arredores. Mágoa que a néboa estragase as vistas da paisaxe desde o fogar de Otero Pedrayo. ( Aarón)
Xa fun visitar a casa de Otero o curso pasado. Pero foi igual de incrible: gustoume moito o pazo e o entorno onde Otero viviu (Andrea)
Repetín a visita e repetirei. A casa, poder recoñecer os arredores a través dos textos de Otero Pedrayo, os exteriores da casa, … Marabilloso. (Carlota)
Éa primeira vez que a visito, non coma outros compañeiros que estiveron antes. A verdade é que poder coñecer como vivía un gran escritor e o seu entorno foi marabilloso. Pena que o día non permitise ver a paisaxe que se estende ao pé da casa. ( Paula)
No Día das Bibliotecas sacamos os nosos libros ao sol. Porque calquer lugar é bo para deixarse atrapar por unha historia. Emoción, medo, romance ou botar unhas risas sentados canda os amigos no patio. Un recreo diferente na compaña dun bo libro.
Coidar e protexer o camiño de Santiago. Esa será a nosa misión despois de recibir a visita de Enrique Mauricio e Carlos Taboada. Polo correo do vento. A historia de Peregrina e Iago, dous amantes da fotografía e do debuxo que percorren o camiño para contarnos en que estado se atopa.
O Camiño de Santiago é un patrimonio cultural que debemos coidar. Sobre todo fronte ameazas como a aparición de lixo, o feísmo, a falta de civismo cos peregrinos ou dos propios peregrinos... Eles atópanse percorrendo corenta vilas polas diferentes rutas do Camiño, para facer un estudo sobre este asunto.
Nesta actividade escoitamos un conto mentras vimos como se facía un debuxo e despois elaboramos un debuxo dun peregrino todos xuntos.
A volta ao cole sempre é unha experiencia emocionante. Reencontrarse cos compañeiros, cos profes, cos espazos de xogo e aprendizaxe... e as emocións aínda son máis grandes cando é a túa primeira vez. O novo alumnado de infantil, que se incorpora ao CPI Virxe da Saleta, está a experimentar moi boas sensacións no inicio da súa actividade educativa. Atópanse moi integrados, participativos e ledos ao longo da xornada escolar. Como para as familias tamén é unha experiencia intensa as mestras de infantil queren compartir esta galería de imaxes con todas ellas para que poidan ver ás súas fillas e fillos no contexto escolar.
