Acaba de realizarse a estrea cinematográfica dun álbum clásico dos ilustrados infantiles, “Onde viven os monstros” de Maurice Sendak, editado por Kalandraka (na súa edición galega).
Este fermoso álbum, que xa é un dos máis coñecidos da nosa biblioteca, ten nada menos que ¡46 anos!; pois foi publicado en 1963 en EEUU, onde vivía o seu autor. Esta foi a súa primeira obra completa, da que é escritor e ilustrador; xa que ata ese momento, Sendak só ilustraba libros doutros escritores.
Ademais de tratarse dun libro con formato horizontal e ilustracións a toda páxina (e incluso a dobre páxina), o cal supoñía unha novidade para aqueles anos; o máis revolucionario foi a historia.
Max, un neno rebelde, que tras unha rabieta ameaza con comerse á súa nai, e esta o castiga sen cear. Marcha da casa, descobre o divertido que é o mundo dos monstros, e volta trunfante.
Esta historia non parecía moi educativa para os pais e nais daquela época; pero, sen embargo, foi un éxito editorial, que foi medrando ao longo dos anos ata chegar a nós como un álbum imprescindible en tódalas bibliotecas infantís. Aos que o lemos de máis novos, resúltanos entrañable volvelo a lembrar.
Agora a historia de Max e os seus monstros chegan ao cine, outro formato moi atractivo de contar un conto como o que Maurice Sendak nos agasallou.(trailer)
