Onte foi un día moi especial na Epapu. O alumnado de primeiro de Bacharelato tivo a oportunidade de escoitar a experiencia de Marcial, un compañeiro de clase que lles explicou desde unha óptica moi positiva e con moitos toques de humor, como enfronta a vida unha persoa de 18 anos que sofre unha discapacidade desde neno, dándonos a tod@s os que asistimos a charla unha gran lección de vida.
A sesion rematou coa lectura dun poema motivador para afrontar as dificultades que a súa compañeira de clase Begoña lle quixo dedicar a Marcial e a tod@s @s presentes. Begoña tamén fixo un fermoso cartel que anunciaba a actividade e que estivo presente en todo momento durante a charla.
Marcial estivo acompañado de Jonatan, un alumno xordo que tamén recibe clases no noso centro, e que puido seguir e participar na charla coa axuda de Patricia, a intérprete da lingua de signos que temos no centro. Foi unha tarde realmente especial para tod@s. Grazas en especial a Luisa, a nosa orientadora, a Rosana, a coidadora de Marcial, a Patricia, a intérprete da lingua de signos, e a todo o profesorado e alumnado que fixeron posible esta actividade. Foi un bonito xeito de conmemorar o dia da Diversidade funcional que oficialmente se celebrou o pasado 3 de decembro.
Rematamos esta semana de actividades conmemorativas do día internacional da eliminación da violencia contra a muller coa lectura por parte do alumnado das diferentes quendas, de textos alusivos a esta cita. Fixémolo diante da cortiza do corredor inferior, onde están expostas as fotografías das alumnas, alumnos e resto do persoal do centro que quixeron, deste orixinal xeito, reivindicar a eliminación da lacra da violencia machista.
Moitísimas grazas a todas e todos pola gran participación e non esquezades buscarvos nas fotografías expostas.
Hoxe 17 de novembro conmemórase o Día Mundial da Filosofía declarado pola UNESCO. Dende hai uns anos o terceiro xoves deste mes poñemos en valor unha disciplina de gran importancia para o noso alumnado, disciplina que fomenta a liberdade, o espírito crítico, a tolerancia....valores fundamentais para unha convivencia baseada na igualdade e o respecto ao ser humano. En definitiva....unha disciplina que podemos considerar a base para a paz mundial.
Na Epapu celebramos esta efeméride con este fermoso cartaz obra de Begoña Acebedo.
Na EPAPU xa temos todo listo para que participedes na actividade conmemorativa do 25-N, Día Internacional da Eliminación da Violencia contra a Muller.
Á entrada do centro tedes a vosa disposición o fantástico photocall que Belén e Alfredo prepararon para todas e todos nós. Podes fotografarte coa túa camisola reivindicativa ou ben empregar algunha das dispoñibles no centro.
As fotografías serán expostas no taboleiro do centro e entre todos os participantes sortearemos como agasallo esta fermosa camisola. Anímate!!!
Queremos conmemorar o vindeiro 25-N, Día Internacional da Eliminación da Violencia contra a Muller mediante a participación de todas e todos nun fantástico Photocall.
O alumnado de Bacharelato realizou un último traballo para a materia de Historia do Mundo Contemporáneo. Se ao longo do curso os alumnos e alumnas estiveron traballando os contidos da materia tomando como excusa os medios de comunicación (pois elaboraron xornais, posters, vídeos...) culminárono presentando un telexornal e un programa de radio no que tiveron que tratar os acontecementos máis destacados do Perídodo de Entreguerras (Crac do 29 e auxe dos Fascismos) e a Segunda Guerra Mundial.
O Telerxonal denominado "El Bucle" contaba cos presentadores e reporteiros que nos foron dando noticia, a través de entrevistas, de reportaxes, de imaxes visuais e sonoras...dos acontecementos máis destacados do período histórico mencionado Non se esqueceron de temas interesantes como a arte da época, o rol das mulleres, etc..Un traballo que mereceu o aplauso dos espectadores para os seus autores: Jennifer, Cristian, Miriam, Manuel e Samuel.
O programa de radio denominado "Radio Patio" amosou a soltura e frescura deste medio. Conduciron o programa de xeito ameno e foron expoñendo os aspectos relevantes da temática. Soou a música da época, falaron da moda do momento e de como importantes deseñadores realizaron os traxes para os soldados, tamén houbo entrevistas, concursos... Nel participaron Edgar, Brenda, Sheila, Vitor, Julia e Filipa.
A aprendizaxe dos contidos e o desenvolvemento das competencias está asegurado pois, deixando de lado as clases meramente expositivas, o alumnado viviu unha grande experiencia que, din eles mesmos, non se lles esquecerá.
Moitos parabens ao alumnado de primeiro de Bacharelato da materia de Filosofía práctica que veñen de seren galardoados co primeiro premio do certame "Falando de Solidariedade" na súa modalidade de Video. Ademais, e facendo gala da súa xenerosidade e compromiso, doaron os premios recibidos ao centro e á súa biblioteca. Moitas grazas!!!
Tamén resultaron recoñecidos a título individual co primeiro premio os relatos: "Unhas pulseiras para Gloria" de Antonia Alejos na categoría de Adultos e "Salif, 26 anos, Burkina Faso" de Sheila Salgueiro. Do mesmo xeito tamén resultou finalista o ensaio "Loitando por morrer" de Iván Rial. Noraboa a tódolos premiados!!!
Ao longo do martes 24 de maio celebráronse mesas redondas nas distintas quendas (mañá, tarde e noite) organizadas polo profesorado do departamento de Español para estranxeiros nas que os nosos alumnos prodedentes de afganistán responderon ás preguntas que lles formularon o resto do alumnado da escola.
Grazas a Wahida Shankar e Sayed Hamza poidemos coñecer de primeira mán a triste realidade da sociedade afgá trala toma do poder dos talibáns e a represión sufrida especialmente polas mulleres. Unha auténtica lección de vida a que recibimos todos onte na nosa escola.
A actividade complementouse co visionado previo do documental “Escape de Kabul (Parte 2) / Buscando a Dios (Jorge Said)” que podedes atopar no seguinte enlace de youtube: Escape de Kabul
Recentemente o alumnado de terceiro da ESA da quenda de tarde estivo a traballar no ámbito de sociedade o período de entreguerras: os felices anos 20, o crac do 29 ou xoves negro, as causas e consecuencias da segunda guerra mundial así como a guerra civil española. Todo moi ben explicadado neste video-traballo realizado polas alumnas e alumnos de terceiro e pola súa profesora Rosa Cid. Esperamos que vos guste.
Durante os últimos días os alumnos e alumnas de primeiro de Bacharelato estiveron traballando na materia de Historia contidos sobre a revolución rusa. Aquí temos algunhas imaxes dos traballos feitos:
