Skip to Content

BOLSAS NEAE

CONVOCATORIA DE BOLSAS NEAE
(Curso 22-23)

Becas


     Ven de publicarse no BOE a convocatoria anual para a solicitude de bolsas para alumnado con necesidades especiais de apoio educativo (NEAE). O prazo para a solicitude ábrese hoxe día 19 de maio de 2022 e remata do 30 de setembro de 2022.
     A solicitude realízase únicamente on line a través do servizo electrónico do Ministerio de educación, onde poden atopar toda a información necesaria da convocatoria.

FONDO SOLIDARIO DE LIBROS DE TEXTO 2022-23

FONDO SOLIDARIO
DE LIBROS DE TEXTO (ESO)

(Resumo)

Aberto prazo para a presentación de solicitudes de participación no
Fondo solidario de libros de texto para cursos de ESO (2021-2022)

Descargar información

*          *          *

PRAZOS
Presentación de solicitudes: do 19 de maio ao 22 de xuño
Devolución de libros do curso anterior: máximo ata o 22 de xuño
Publicación de listaxes provisionais: 11 de xullo
Prazo de reclamacións: 12-13 de xullo
Publicación de listaxes definitivas: 22 de xullo

LUGAR
na Secretaría do centro ou a través da sede electrónica da Consellería de Educación (con certificación dixital)

 

DOCUMENTACIÓN NECESARIA

  • Fotocopia do DNI ou NIE de todos os membros da unidade familiar para resolver posibles dúbidas nos datos dos formularios.
     
  • Documentación complementaria (a que lle corresponda a cada un):


a) Copia do libro de familia ou equivalente onde figuren todos os membros computables. No caso de que non haxa Libro de familia, que o pai e ani ou titor ou titores carezan de DNI e NIE, certificado de convivencia, volante de convivencia ou informe dos servizos sociais ou de órgano equivalente do concello onde resida a familia.

b) En caso de separación ou divorcio, ademais deberán achegar a sentenza xudicial e/ou convenio regulador onde conste a atribución da custodia do menor. 

c) Certificación do grao de discapacidade do/a alumno/a ou calquera membro da familia, recoñecido por un órgano que non pertenza á Xunta de Galicia.

d) Documentación xustificativa da situación de violencia de xénero no ámbito familiar.

e) Resolución xudicial de incapacitación con patria potestade prorrogada ou rehabilitada.

f) Resolución administrativa ou xudicial acreditativa da situación de acollemento ou do certificado do centro de menores, para o alumnado en sitación de tutela ou garda da Xunta de Galicia.

 

IMPORTANTE: DEVOLUCIÓN DOS LIBROS DESTE CURSO

Este ano, a devolución dos libros deberá efectuarse obrigatoriamente antes do 22 de xuño nas datas que se habilitarán a tal fin a partir do día 9 de xuño e das que se informará ao alumnado proximamente.

PUBLICACIÓN DAS LISTAXES DEFINITIVAS DE ADMISIÓN

Listaxes definitivas de admisión para o curso 2022-2023

     Pasado o período de reclamación, e resoltas as reclamacións presentadas, infórmase de que as listaxes provisionais publicadas  en abril non sufriron ningunha modificación, co que adquiren a partir de hoxe 15 de maio carácter definitivo. As listaxes definitivas correspondentes quedarán publicadas de acordo coa normativa no taboleiro da secretaría ata o primeiro día de curso.

    As solicitudes presentadas fóra de prazo foron remitidas á Xefatura Territorial e serán resoltas polo servizo de inspección educativa.

   A partir do día 15 de maio, todas as admisións terán consideración de extraordinarias e deberán ser tramitadas a través do rexistro xeral da Xefatura Territorial

CONCURSO "CINEMA NA ESCOLA"

TALENTO CINEMATOGRÁFICO
NO IES ELVIÑA

    O alumnado de 3º ESO A, coa inestimable colaboración das profesoras Carla Rodríguez e Alba Lorenzo, adicaron parte do seu tempo a preparar a filmación da curtametraxe coa que o noso centro participa no Concurso "Cinema na escola" organizado pola Concellería de educación do Concello da Coruña. Aínda que é certo que o "adagio" di que o importante é participar, tratándose dun concurso e despois de todas as horas e esforzo adicados á causa, tamén viría ben gañar algo máis que honriña. Por iso -e para gozo e diversión dos curiosos e curiosas- deixamos aquí o enlace do video na canle oficial de YouTube dos organizadores. Desfrutade da película, que paga a pena.

ATENCIÓN: Un dos premios repartirase cos LIKES que o filme reciba do público en YouTube, así que xa sabedes: a votar polo talento elviñense, que ben o merece.

 

CONVERXENCIAS ARTE-CIENCIA

"Marcha" matemática con Juan Gris

Botella y libro     Agora que só quedan uns poucos días para o regreso do Día da Ciencia na Rúa, no que participará -entusiasta- o noso centro, o alumnado de matemáticas de 1º Bacharelato quenceu motores acudindo a unha nova exposición de converxencias entre as ciencias e as artes, nesta ocasión tomando coma referente pictórico a un dos maestros do cubismo analítico de principios do século XX, o pintor Juan Gris. A actividade "Converxencias, arte e ciencia: Juan Gris", organizada pola Institución Galega de Ciencia (IGACIENCIA) permite ao alumnado estudar a relación da pintura coa matemática -máis no caso deste interesante movemento artístico de avangarda que establecía unha nova obxectividade na creación artísitica.
    O alumnado desfrutou da exposición interactiva traballando a obra deste pintor desde múltiples perspectivas científicas. Así, puido presenciar unha presentación animada sobre o método compositivo e o uso da cor por Juan Gris, unha exposición de reproducións da súa obra, a consulta de paneis interpretativos que poñen de manifesto as conexións coa ciencia das distintas obras obxecto de análise. Tamén puideron os alumnos e as alumnas contemplar versións de obras de arte dixital de Manuel Díaz impresas en 3D, así como a exposición de poliedros premiados no concurso Novos Poliedros do 2021 realizados por alumnado de varios centros educativos galegos.
    Ademais, o noso alumnado participou nunha serie de obradoiros destinados a afondar na parte expositiva da actividade, traballando cuestións tan fascinantes coma a simetría 2D e 3D, as ilusións ópticas, as espirais de Fibonacci ou a topoloxía. En fin, un festival de gozo matemático (e artístico, claro).
    Velaquí algunhas fotiños do evento, para deleite de propios e extraños.

010203
040510
Distribuir contido


by Dr. Radut