Skip to Content

CERTAME DE CLUBES DE LECTURA ESCOLARES (CENTRO ÁGORA)

AZAHARA, campioa no Concurso de microrrelatos do Grupo DADO

     O pasado martes 17 de abril celebrouse no Centro Ágora o encontro anual do Grupo Dado (Asociación de clubes de lectura dos centros de ensino coruñeses). No mesmo acto, unha celebración destinada principalmente aos rapaces e rapazas dos institutos que adican tempo fóra do seu horario lectivo á literatura e ás actividades dos clubes, fíxose reconto tamén do traballo dos coordinadores e das actividades levadas a cabo polos diferentes clubes. Ao longo do acto, actuaron os seleccionados nos distintos concursos convocados pola Asociación. O IES Plurilingüe Elviña pode presumir de contar con dous seleccionados finalistas na categoría de microrrelatos: Samuel Rey Morón (2º ESO A) co título "Un mar sen fondo" e Azahara Merlo (3º ESO A) co traballo "Cos ollos pechados". Azahara, ademais, resultou gañadora do Primeiro premio na súa categoría de idade. O seu traballo pode lerse xa na páxina do Club de lectura do noso centro Elvilendo. Noraboa á gañadora e, por suposto, a todos os participantes.

Club-01club-02

XOGOS TRADICIONAIS

UNHA VIAXE AOS XOGOS DO PASADO

LogoXogos-01Xogos-02
Xogos-11Xogos-03Xogos-09º


"Oes, e que fan eses rapaces alí?"
"Non o sei, aí no patio do insti estarán no recreo pasándoo pipa, digo eu."
"Que va! Están a xogar á petanca!! E que ben lle dan! Sonche uns maestros estes rapaces!"
"Naturaca! Eses danlle ben a todo! Non che digo! Son do Instituto de Elviña...!"


     E que fai o alumnado do IES Plurilingüe Elviña xogando á petanca, ás "chapas", ao aro, á mariola, en fin, como quen di aos xogos dos avós. Deulles un aire? Caeron na tolicie?  Non tal! Isto de darlle unha volta aos xogos do pasado son cousas de Paula, a nosa profe de Educación física, farta de que o alumnado só saiba entreterse cos móbiles e coa leria esa da tecnoloxía (esas cousas do demo...). Por iso, adicará unhas semanas a traballar coa rapazada de 4º e de 1º de Bacharelato este tipo de xogos, que, aínda que non o pareza, combinan capacidades moi diversas, habilidade, intelixencia e coordinación física. Vaia, que non serán deportes olímpicos, pero esixen o seu. Dirano os nenos, que teñen que crear un xogo propio remedando os do pasado, e que levarán as súas creacións á celebración da Xornada do deporte o vindeiro 25 de maio.

"Ben, e agora, onde imos?"
"Ti non sei, eu correndo á Federación Galega de Petanca, a facerme socio. Eses nenos déronme envexa."
"Ei! Non corras tanto, ho! Agarda, que eu tamén vou!"

3º ESO NUN ROTEIRO POR SANTIAGO DE COMPOSTELA

XORNADA ROSALIANA EN SANTIAGO DE COMPOSTELA

Daguerrotipo de Rosalía de Castro con 18 anosPadrón. 15 de xullo de 1885. Rosalía de Castro agoniza rodeada polos seus. Alejandra, a súa filla, a carón do leito, terma da man da poeta, que delira, a mente xa no limiar doutras terras. Pronuncia as súas derradeiras, misteriosas, fermosas palabras: "abride a fiestra, que quero ver o mar".

     O día 20 de marzo pasado Patricia Varela e Alfonso Salgado, os nosos estupendos profesores do Departamento de galego, levaron ao alumnado de 3º de ESO a Padrón e a Santiago de Compostela, terras rosalianas, dentro das actividades didácticas coas que se lembra a figura literaria da grande poeta romántica galega.
     En Padrón, os rapaces visitaron a casa-museo da autora, esa onde Rosalía deu o seu último alento caendo no mar infindo da morte. Despois, a visita do alumnado rematou na capital galega cunha serie de actividades lúdicas e didácticas destinadas a traballar diversos aspectos da vida e da obra da autora. Foi unha xornada para aprender desfrutando!
     Patricia e Alfonso, sempre ao pé da poesía!

LOGOSantiago-02Santiago-03
Santiago-07Santiago-06Santiago-05


Outros detrás, n'a eternidá caendo
cal cai o grau n'a moedora pedra,
sin que o porvir velado ôs mortais ollos
rompa as pesadas brétemas.
Que triste é a noite i-o relox que triste,
s'inquieto o corpo i-a conciencia velan!
                                                                Follas novas (1880)

XI encontro IES Elviña-IES Agra de Leborís (A Laracha) CPI As Revoltas (Cabana de Bergantiños)

O alumnado de 4º ESO A participou no XI Encontro IES Elviña-IES Agra de Leborís (A Laracha) e CPI As Revoltas (Cabana de Bergantiños) de promoción da lingua galega 0 17 de abril.

Na xornada formamos os grupos e visitamos a vila de Caión e o seu museo do mar que está situado na cofradía de pescadores. Posteriormente comimos no merendeiro da praia e iniciamos a ruta de sendeirismo ata a lagoa de Baldaio.

 

Proxecto Terra: Porto 10-11 de abril

O alumnado de 3º e 4º de ESO do centro participou no intercambio territorial programado por Proxecto Terra o 10 e 11 de abril.

Visitamos a Fundación Serralves, a Casa da Música. Percorrimos a cidade e coñecimos a súa evolución histórica e urbanística. Tamén fixemos uso do transporte metropolitano desde Matosinhos á Casa da Música.

 
Distribuir contido


by Dr. Radut