O martes 8 de xuño o grupo de 3ºD de ESO fará unha visita guiada á zona vella de Betanzos, co obxectivo de relacionar a música medieval co resto das disciplinas artísticas da época: arquitectura, escultura e tamén coa sociedade medieval.

O pasado venres 28 de maio o alumnado de 1º B practicou sendeirismo pola contorna do río Mandeo, en Chelo, nunha ruta circular entre Betanzos e Paderne.

Álbum: Curso 2020-2021 -> Sendeirismo por Chelo

O vindeiro 4 de xuño o alumnado de 4º C sairá a practicar Paddle Surf nas augas do Seixo Branco e Praia de Mera, nunha actividade organizada polo Departamento de Educación Física.

O alumnado poderá relacionar as actividades físicas na natureza coa saúde e a calidade de vida, así como demostrar hábitos e actitudes de conservación ambiental.

O profesor de Educación Física Leonardo Piñeiro organizou catro saídas pola comarca para o alumnado de 1º de ESO, consistentes en rutas de sendeirismo en Fontán (Sada) e a zona de Chelo (Paderne).

As saídas comezaron o día 20 de maio e continuaron onte día 26 de maio; faltan aínda as saídas de mañá día 28 e do martes 1 de xuño.

As fotos pertencen á saída de onte, a de 1º D de ESO.

Álbum: Curso 2020-2021 -> Sendeirismo por Sada

O venres 28 de maio o grupo de 3ºE de ESO fará unha visita guiada á zona vella de Betanzos, co obxectivo de relacionar a música medieval co resto das disciplinas artísticas da época: arquitectura, escultura e tamén coa sociedade medieval.

O día 2 de xuño o Departamento de Educación Física organiza, en colaboración co Club de Piragüismo de Betanzos, unha práctica de piragüismo no río Mandeo para o grupo de 3º de ESO E.

O día 19 de maio comezaron as clases de Taekwondo ofrecidas pola UNESCO de maneira gratuíta ao alumnado do IES Francisco Aguiar e impartido por profesorado cualificado do ximnasio betanceiro Han's Horang-I. As clases continuarán até o vindeiro luns 14 de xuño.

Álbum: Curso 2020-2021 -> Taekwondo

 O día 8 de xuño o Departamento de Educación Física organiza, en colaboración co Club de Piragüismo de Betanzos, unha práctica de piragüismo no río Mandeo para o grupo de 3º de ESO B (pola mañá) e A (pola tarde).

Chegou aos nosos oídos.... que Lidia Gomez, lingüista, ex alumna do Aguiar  publica o seu Traballo de fin de Master sobre o galego e a linguaxe da rapazada.

O paso da educación primaria á secundaria e mais o comezo da vida laboral son dous momentos chave nas mudas lingüísticas da mocidade en prexuízo do uso do galego. Así o conclúe un traballo de Lidia Gómez Martínez publicado no último número de Cadernos de Lingua, unha análise das narrativas biográficas de dezasete mozos e mozas galegas nas que estes contan e interpretan as súas experiencias vitais arredor da lingua. (RAG)

Así nolo explica Lidia nunha entrevista na radio galega.

https://www.crtvg.es/rg/podcast/diario-cultural-diario-cultural-do-dia-09-03-2021-4859818?t=74

Pica na imaxe da revista ou no arquivo adxunto para ler o traballo aparecido en Cadernos da Lingua da Real Academia Galega

PARABÉNS para Lidia!

Chegou aos nosos oídos .... a aparición dunha nova publicación sobre o Parque do Pasatempo. Tras dela, entre outros, o noso aprezado ex alumno, Angel Arcay Barral acompañado por dous fieis co-currantes a favor do Parque do Pasatempo : Yosu Duo e Josiño Souto.

Pero... ninguén mellor que Ángel para explicarnos alguns aspectos sobre a súa obra.

Quen é Angel Arcay?

Ángel Arcay Barral é un antigo aluno do IES Fco. Aguiar que despois estudou Historia e trata de vivir dela. A través da historia chegou ao mundo dos arquivos e da interpretación do patrimonio, que son as dúas cousas que lle dan de comer. Acaba de presentar un libro sobre o Pasatempo feito con dous amigos, Yosu Duo e Josiño Souto.

Por que o Pasatempo? 

Porque foi unha aventura que comezou José Souto fai case unha década, investigando algo aínda descoñecido, e ao que nos sumamos moita xente despois. Tiñamos a obriga de xuntar toda a información recollida nestes anos para poder presentarlla de forma coherente á xente. E non deixa de ser algo que facemos nos nosos ratos de ocio, polo que foi tamén unha maneira de levar mellor o encerro do 2020, compartindo investigacións e traballo con amigos, tanto os que asinan o libro, como os que colaboraron con el.

Como ves a situación do patrimonio no Concello e na bisbarra?

A nivel patrimonial Betanzos é unha gran potencia, pero considero que non se soubo vender para facer isto atractivo. E para min, que tamén son guía oficial de turismo, o patrimonio natural que hai na bisbarra é o complemento perfecto para un destino turístico que podería competir directamente cas grandes cidades, especialmente no turismo que virá cando desapareza a COVID-19.

Que dirías a autoridades e cidadáns respecto ao Pasatempo e ao Patrimonio en xeral?

Diríalle que se animen a coñecelo, porque é algo único no mundo e ten tantas posibles lecturas que seguro que lle acaban atopando interese por algún lado. Na Asociación de Amigos do Parque do Pasatempo(link) hai un grupo moi heteroxéneo de xente que nos permite apreciar o Pasatempo dende o punto de vista da historia, da arte, da educación, da arquitectura, da ética, da botánica e un longo etcétera. A figura do Pasatempo pode rachar ca imaxe que temos do patrimonio, quizáis máis estático e formal, porque permite centos de lecturas que se complementan unhas con outras.

 Só queda, pola nosa parte, dar grazas a Ángel polas súas palabras, polo seu libro e  pola súa dedicación ao estudo, divulgación e valoración do patrimonio betanceiro.