Hoxe o alumnado de 4º curso de primaria acudiu á sala de exposicións de Abanca para visitar unha mostra da obra de Castelao como debuxante.

Explicáronnos con moito detalle as características da obra deste noso artista, e todas e todos quedamos abraiados diante dos seus debuxos que tan ben retratan a alma do noso pobo.

Este ano comezamos a celebrar o día da muller na ciencia con varias actividades:

1. un programa de radio,
2. unha exposición realizada polo noso alumnado coa biografía e achádegos de varias mulleres científicas que teñen deixado a súa pegada na historia,
3. unha publicación dixital con estes traballos de investigación do alumnado
4. e por último, e para pechar esta semana de conmemoración e de reivindicación do papel da muller no avance científico, teremos unha xornada de experimentos no que as rapazas do noso colexio han demostrar a súa competencia no ámbito STEM.

Podedes ver aquí a exposición virtual coas nosas investigacións sobre as mulleres galegas (aínda que tamén hai algunhas de fóra) que teñen destacado ou que foron pioneiras dentro do ámbito científico.

Así mesmo podedes escoitar este noso podcast realizado polo alumnado de 4º de primaria e Alexis e Manuel de 5ºB.

Por último deixámovos aquí unha pequena reportaxe gráfica da nosa xornada científica, cos experimentos que realizamos no patio do colexio.

O prazo de reserva de praza nos centros educativos vai do 15 de xaneiro deica o 5 de febreiro.

Para reservar praza no centro de adscrición (no noso caso o IES Lauro Olmo) o alumnado de sexto curso deberá presentar o formulario que facilitaremos dende o centro, e se entregará no propio colexio que se fará cargo da súa tramitación. Tamén se poderá empregar a aplicación informática

Así mesmo o alumnado que decida non matricularse no centro adscrito, deberá comunicalo no centro para evitar erros e duplicidades na matrícula.

Este ano, dentro das iniciativas que sempre estamos a desenvolver para mellorar a calidade da educación que prestamos ao noso alumnado, un nutrido grupo de mestras e mestres do Ceip Condesa de Fenosa puxémonos como obxectivo desenvolver un traballo de gravación dun produto audiovisual no que @s nos@s alumn@s puidesen ceibar os seus impulsos creativos e aprender os requisitos técnicos que unha obra deste tipo require.

Para iso entramos no concurso de NÓS TAMÉN CREAMOS, no que se pide a cada centro participante a creación dunha ou varias curtametraxes de animación empregando a técnica do stopmotion, adaptando libremente un ou varios contos dunha escolma proposta pola organización do certame.

Este concurso leva aparellado un importante labor de formación do profesorado ao través dun curso de PLATEGA e máis coa creación dun grupo de traballo que, coma vedes, esta dando os seus primeiros pasos.

Todo isto facémolo dende a nosa aula do POLO CREATIVO Plus, un espazo educativo, innovador enfocado ás aprendizaxes colaborativas, conxuntas, e co obxectivo de integrar os retos tecnolóxicos en todos os campos do saber.

E a cousa comeza a dar os seus froitos, como mostra esta reportaxe fotográfica destes grandes pequenos creadores audiovisuais: @s nos@s alumn@s.

Tal e como sinalamos no titular desta entrada, achégase o Día da Paz, nun ano no que esta celebración escolar é máis importante ca nunca.

A guerra en Palestina, onde o estado de Israel, incumplindo todas as normas internacionais está realizando unha atroz destrución sistemática da franxa de Gaza, afectando a millóns de persoas, máis da metade deles nenas e nenos, así o esixe.

Somos conscientes de que esta nova espiral de violencia foi xerada por un acto terrorista verdadeiramente execrable, pero iso non dá dereito a ningún estado ao ataque indiscriminado da poboación civil, de hospitais, escolas e campos de refuxiados tal e como se está producindo.

Dende o noso colexio toda a nosa comunidade escolar vai reclamar a RESOLUCIÓN PACÍFICA DOS CONFLITOS, o DIÁLOGO e o cumprimento dos ACORDOS INTERNACIONAIS. Palestina debe vivir, as nenas e nenos palestinos teñen dereito a un futuro en paz.

O noso primeiro xesto pola Paz é este pequeno vídeo de animación que acaban de facer os nenos e nenas de primeiro A. Desfrutádeo!!

LOTARÍA DE NADAL

 CEIP P CONDESA DE FENOSA

Nº 77803

 No sorteo extraordinario de Nadal o número 77803, vendido polo alumnado de 6º curso, foi agraciado cun total de 20€ en cada participación.

 O importe será cobrado por un adulto no salón de actos do colexio a partir do luns, 8 de xaneiro (inclusive), no seguinte horario:

HORARIO DE COBRO DA LOTARÍA

(Agás sábados, domingos e festivos)
XANEIRO
LUNS, MARTES e MÉRCORES

De mañá: de 10:00h a 11:00h

De tarde: de 17:00h a 18:00h
FEBREIRO e MARZO
LUNS

De mañá de 10:00h a 11:00h

MOITAS FELICIDADES!!

Este ano sorteamos dúas cestas de Nadal para axudar a sufragar os gastos das excursións de 6º curso do colexio, e hoxe mesmo, tras os premios da lotaría xa puidemos entregar esta marabillosa cesta ao afortunado Jose Luis Torres, que, ben seguro, vai satisfacer aos máis galdrumeiros e larpeiros.

Arturo García Rodríguez foi o agraciado coa segunda certa de Nadal que sorteaba o alumnado de 6° curso. Moitas felicidades!!!

O acto, xa co colexio baldeiro de nenas e nenos polas vacacións, a nosa "dire" fixo entrega da cesta ao afortunado gañador, e aproveitou para desexarnos a todas e todos nós, un moi bo nadal e un feliz aninovo.

Trémovos un novo episodio da nosa serie de podcasts nos que rescatamos do inxusto esquecemento a moitas mulleres que foron precursoras das súas materias.

Unha delas é esta muller, Ada Lovelace que albiscou, no mesmo inicio da computación, a linguaxe coa que había que falar ás máquinas. A ela debémoslle ter hoxe teléfonos intelixentes, ordenadores, ordenadores cuánticos...

Tamén temos un pequeno galano musical por estas datas do Nadal que nos fan os compañeiros de 3º.

Coma todos os anos o Apalpador baixou das súas montañas do Courel e veu ata o  colexio para saber se as barriguiñas das nenas e dos nenos están ben cheas.

Tróuxonos unha chea de castañas e de regalos e falounos da súa vida nos montes, facendo carbón.

Se en Vigo acenden as luces para anunciar o Nadal, nós, no Condesa de Fenosa, anunciámolo moito mellor coa visita do Apalpador.