CEIP San Xosé Obreiro

Estimadas familias, queridos nenos e nenas:

Comunicámosvos que  temos a intención de chamarvos por teléfono (é posible que vos apareza con nº oculto) ao longo dos días de hoxe e de mañá, para interesarnos por vós e saber como vos vai despois de tantos días de confinamento. Como sabedes o día 3 de abril darían comezo as vacacións polo que aproveitamos tamén para dicirvos que os boletíns de notas estarán dispoñibles desde a app  abalarMóbil a partir das dúas da tarde dese día. A avaliación está feita con remate o día 14 de marzo, último día de clase efectiva.

Quen non teña a aplicación terá que descargala antes seguindo as indicacións desta páxina. No caso de que vos dea erro, solicitádea no correo do centro ceip.sanxose.obreiro@edu.xunta.es ou tentade comunicar co centro no 881 880 214 ou no 623 22 75 23, desde onde tentaremos axudarvos. Se non fose posible, entregaranse cando se poida, ao rematar a cuarentena.

Saúdos e moito ánimo para que se acabe pronto isto e poidamos volver vernos pronto!

Queridos nenos e nenas:

Pronto se cumplirán 15 días desde que se decretou o estado de alarma e queremos felicitarvos polo ben que o estades facendo, axudando na casa e  facendo os deberes que vos imos poñendo. Infelizmente, isto aínda non acabou. Agora ven a parte máis difícil, quedan outros quince días máis e por iso queremos mandarvos unha mensaxe moi importante para que nos se vos esqueza: 

                                             QUEDA NA CASA! 

Porque ese é o mellor xeito de axudar a todas as persoas que non poden facelo por nós: á xente que nos atende e mantén funcionando os supermercados, panaderías, etc, aos repartidores, transportistas, forzas de seguridade e, sobre todo, á máis importante: o persoal sanitario, a quen lles aplaudimos todos os días por como se están xogando a vida. Ánimo, xuntos podemos conseguilo. Aquí vai o noso aplauso para vós!!

Estimadas familias,

Como sabedes, todos os colexios permanecerán pechados tanto para as actividades lectivas como para madrugadores, comedor, transporte, etc. desde o vindeiro 16 de marzo por un tempo de 14 días naturais, debido ao Coronavirus Covid19.

Durante este tempo, convén ter en conta as seguintes instrucións provisionais nos acaba de pasar a Consellería:

1. O prazo de presentación telemática e presencial de solicitudes de admisión amplíase e finalizará 1 semana despois do reinicio das clases. Recoméndase a utilización preferente da modalidade telemática para a presentación das solicitudes. O centro unicamente abrirá as portas estes días para tal efecto, de 10:00 a 12:00 horas.

2. O profesorado irá colgando na páxina web do centro, no curso e materia correspondente, as actividades a realizar polo alumnado no domicilio. Ditas actividades é preferible realizalas no horario matinal e poden ir variando ao longo destes días.

3. O profesorado fará, dentro das súas posibilidades, un seguemento das actividades realizadas, titorizándoas de xeito telemático, nunca presencial, e tentarán axudar e resolver as posibles dúbidas por correo electrónico.

Lembrade que estas medidas son provisionais e teremos que estar atentos ás noticias que se vaian producindo. 

Desexámosvos moita sorte para que todo esto pase rápido e poder volver a vernos o máis axiña posible.

Un saúdo moi cordial do equipo directivo e de todo o profesorado do centro!

Volvemos celebrar este ano o Entroido e nesta ocasión o tema escollido foi A HORTA. Hai que dicir que foi un dos máis lucidos dos últimos anos! No desfile poidemos ver granxeiros e granxeiras, insectos de todo tipo, froitas e verduras... enfi, unha pasada!

Despois, coma sempre, compartimos as larpeiradas aportadas pola familia e o chocolate, que foi aportado pola ANPA. Desta vez si que chegou para todo o mundo!

O pasado 30 de xaneiro celebramos o Día da Paz. Desta vez, igual que o ano pasado, non tivemos sorte co tempo e non poidemos facelo ao aire libre, como tiñamos previsto. 

Menos mal que ao final escampou e poidemos soltar as pombas!