Bos días:
Como ben sabedes o curso escolar 2020-21 preséntase como un curso ben diferente ao habitual debido ao contexto actual. A pandemia creada polo COVID19 que se estendeu no noso país para partir do mes de marzo, afecta a todos os estamentos sociais de todos os países do mundo e evidentemente nós non somos unha excepción.
Partindo desta situación ben coñecida por todos, a Consellería de Sanidade e Educación elaboraron un estrito protocolo de funcionamento para os centros educativos que condicionará enormemente o desenvolvemento do presente curso (modificado parcialmente o pasado 31 de agosto). No CPI Ramón Piñeiro levamos traballando varias semanas na adaptación do centro para poder implantar o devandito protocolo da forma máis conveniente posible. O pasado luns constituíuse no noso centro educativo o “equipo COVID”, encargado de coordinar e elaborar o noso “Plan de adaptación ao contexto COVID” que conlevará moitos cambios no funcionamento ordinario do centro: nas fotos adxuntas podedes ver algunhas adaptacións que xa se levaron a cabo. Nos próximos días manteranse reunións cos representantes de pais no Consello Escolar, co ANPA do centro e co Concello de Láncara; nas devanditas reunións trasladaranse aspectos xerais da organización e informarase das necesidades especiais do centro para este curso 2020-21.
O profesorado e persoal non docente do centro xa empezou a realizarse as probas COVID previstas, e ao longo desta semana todo o persoal do centro deberá pasar polo centro de saúdo de Láncara para realizar as devanditas probas serolóxicas.
O día 31 de agosto as Consellerías introduciron numerosas modificacións no protocolo inicial, o que supón importantes cambios no que tiñamos xa planificado. Tamén se graduou o inicio das clases de modo que o día 10 de setembro empezarán o curso os alumnos/as de Infantil de 3 e 4 anos xunto cos alumnos/as de 1º, 2º e 3º de Educación Primaria; o día 11 de setembro empezarán o curso os alumnos de Infantil de 5 anos e os de Primaria de 4º, 5º e 6º.
O venres 11 de setembro a Consellería de Educación acordou atrasar o inicio de curso para diferentes etapas educativas, entre elas a ESO. Aínda que o noso centro estaba preparado para iniciar o curso na data inicialmente fixada, nos vemos na obriga de adaptar o inicio de curso á resolución da Consellería de Educación. Por tanto, e no que afecta o noso centro, os alumnos de 1º e 2º de ESO, comezarán as clases o mércores 23 de setembro, os de 3º de ESO comezarán o xoves 24, e finalmente os de 4º de ESO comezarán as clases o venres 25 de setembro.
Aos poucos irémosvos informando de todas as novidades que teremos no centro durante este curso que non son poucas nin fáciles, e que precisarán da colaboración e responsabilidade de toda a comunidade educativa.
Moito ánimo a todos, seguiremos informando.
O director
Carlos Carballo Sieiro