Este ano homenaxéase o 17 de Maio a Luísa Villalta. Para quen queira achegarse á súa figura ofrecemos aquí algúns recursos para usardes nesta Hora de Ler da semana das Letras Galegas.
Contamos cunha biografía musicada que comparte o CEIP Chans-Bembrive ou o seu poema "Estación" musicado por Sandra Tenreiro ou César Morán.
Tamén podemos afondar nalgún dos seus poemas da man de Xosé Mª Álvarez Cáccamo (xúntase abaixo PDF).
A Real Academia Galega fornece, amais da biografía recollida no primeiro enlace, moitas novas e vídeos sobre a autora, algúns moi breves e ilustrativos da súa vertente literaria e musical (Palabra de muller, 2'09'').
Máis lúdico, do equipo Bibliocuntis envían un xogo de versos e imaxes para emparellar do seu poemario Papagaio, que tamén xuntamos abaixo en PDF.
E non esquezades desfrutar da magnífica exposición que hai no vestíbulo con traballos do alumnado de Plástica sobre textos de Luísa Villalta.
Felices Letras Galegas !
Vimos desenvolvendo desde hai días unha chea de actividades sobre autores, libros e lecturas. Ninguén é alleo á festa do libro, ao Día do Libro.
Esta festa celébrase desde hai ben tempo en España e máis recentemente a nivel mundial como unha data de reivindicación da lectura e tamén dos dereitos de autor. Faise cadrar a efeméride coa curiosa coincidencia do falecemento na mesma data de ilustres escritores: Miguel de Cervantes, William Shakespeare e o Inca Garcilaso de la Vega.
Para celebrar o Día do Libro realízanse moitas actividades: feiras, exposicións, conferencias, concursos, lecturas compartidas, a lectura ininterrompida do Quixote, solta de libros... No instituto levamos días con reunións sobre libros, facendo lecturas públicas, cun concurso de microrrelatos aberto a todo o alumnado e outras actividades.
Fóra do centro, entre os premios que se conceden por estas datas é de salientar o Premio Cervantes, que se entrega cada 23 de abril no paraninfo da Universidade de Alcalá de Henares e que este ano correspondeu a Luis Mateo Díez.
Convidámosvos nesta Hora de Ler a que desfrutedes da prosa deste insigne narrador, co breve fragmento titulado "El lobo".
Que vos guste!
Dende a Biblioteca Ramiro Fonte sumámenos á conmemoración do 8m, Día Internacional da muller.
Por iso propomos, para a hora de ler do xoves 7 de marzo (durante a 5ª sesión), unha escolma de textos narrativos, poéticos e xornalísticos que abordan este día dende diferentes perspectivas. Ademais, achegamos unha actividade máis lúdica para poñerlles cara a importantes mulleres da historia.
O día 23 de febreiro celébrase o Día de Rosalía, recordando o nacemento, hai 187 anos, desta autora auroral das nosas Letras.
Por esa razón queremos dedicarlle a sesión da HORA DE LER deste xoves 22 de febreiro (día, por certo, do 85º aniversario do falecemento en Collioure de Antonio Machado, e ambos cantaron nalgún momento co mesmo ton: Unha vez tiven un cravo / cravado no corazón... / Mi cantar vuelve a plañir: "Aguda espina dorada / quién te pudiera sentir / en el corazón clavada").
Ofrecemos unha escolma de textos de Rosalía de Castro, así como unhas actividades e uns pasatempos sobre a figura e a obra da nosa escritora pioneira.
Aproveitade para visitardes a instalación do vestíbulo feita polos departamentos de Plástica e Lingua galega. Contemplade a Rosalía retratada e lede os seus versos viaxando polas augas imparables que a trae a nosa mocidade.
Sempre viva Rosalía!
Un ano máis recordamos desde a biblioteca a este escritor no día do seu aniversario. Naceu un día coma hoxe, 8 de febreiro do ano 1828, na cidade francesa de Nantes e as súas inquedanzas viaxeiras e a súa curiosidade científica levárono a percorrer coa imaxinación lugares antes non transitados: continentes inexplorados (Cinco semanas en globo), o espazo exterior (Da Terra á Lúa), o interior do noso planeta (Viaxe ao centro da Terra) ou o fondo dos mares (Vinte mil leguas baixo dos mares), por exemplo. É autor de máis de sesenta novelas, que publicou ininterrompidamente ata a súa morte, ocorrida en Amiens, no ano 1905.
Nós recordamos a Jules Verne porque, sendo un autor mundialmente coñecido e recoñecido, ten un vencello especial coa nosa cidade, tanto persoal coma literario, xa que lle dedicou a ela un capítulo, "A baía de Vigo", o oitavo da segunda parte dunha das súas novelas máis famosas e traducida a unha chea de linguas, como podedes ver no vestíbulo do centro.
Para recordalo, propoñémosvos unha vez máis a lectura do capítulo dedicado á nosa ría, cando o capitán Nemo chega a ela en Vinte mil leguas baixo dos mares.
Se vos presta, podedes ler máis fragmentos e ver traballos relacionados con esta lectura feitos por alumnado do instituto cando celebramos o sesquicentenario desa visita literaria, isto é, os 150 anos da chegada do capitán Nemo á baía de Vigo.
Boa travesía!
O 30 de xaneiro celébrase o Día da Ilustración recordando a data de nacemento do escritor de Rianxo que dá nome ao noso centro.
Nós homenaxeámolo sempre e especialmente nestes días; por iso propoñémosvos algunha lectura del para a Hora de Ler.
Hoxe 31 de outubro, ás 9:50, desenvolverase a segunda sesión da HORA DE LER.
Como andamos no tempo do Samaín, das historias de defuntos e pantasmas... recomendámosvos unha lectura que podedes facer compartida en voz alta entre todos na clase. Ademais é de Castelao, o autor que levamos como bandeira do noso centro.
Trátase de Un ollo de vidro. Memorias dun esquelete.
Que gocedes desta HORA DE LER!
Para celebrar as Letras Galegas propoñémosvos nesta Hora de Ler que busquedes información e atopedes o nome correspondente ás autoras (ou un título) deste "rosco".
Elas son mulleres que escribiron ou que escriben e poucas delas, polo de agora, foron homenaxeadas no Día das Letras Galegas. Pero todo vai andando nese camiño.
Non pases palabra!