Skip to Content

Club de Ciencia: Visita Aula Newton

O alumnado de 3º ESO do Club de Ciencia visitou o venres pasado a Aula Newton ubicada no Parque Tecnolóxico de Galicia, en San Cibrao das Viñas. As "Aulas Newton" son unha prestixiosa iniciativa de espazos de aprendizaxe presentes en dez paises europeos e auspiciados por unha organización noruega sen ánimo de lucro, e concretamente a visitada polo alumnado do IES Plurilingüe Elviña é a primeira e única actualmente dispoñible en toda España.

Acompañados por docentes dos departamentos de Tecnoloxía e Matemáticas, e coa colaboración da auxiliar de idiomas do centro, o alumnado seguiu o programa da actividade "Volamos con números: una aventura aérea". Cun deseño da xornada fermosamente interdisciplinar tiveron que aplicar os seus coñecementos de idiomas, Física, Matemáticas, Tecnoloxía, Xeografía e TIC entre outros. Como colofón puxeron a proba as súas destrezas prácticas no simulador de voo da robusta Cessna 172 en tarefas de socorrismo aéreo no entorno de Bodø (Noruega). E abofé que a moitos deles non se lles daba nada mal para ser o seu primeiro intento!

O remate da fructífera xornada foi o desenvolvemento dun obradoiro de ensamblaxe de drons controlados mediante app móbil. E como non, inevitablemente con estes 3º ESO xa feitos uns intrépidos do aire, a proba dos devanditos drons nun esixente circuito de obstáculos interiores! Sobre o resultado neste caso... digamos simplemente que pagou o seguro.

No albúm a continuación (clickar na foto para acceder) quedan as imaxes que testemuñan o impacto pedagóxico e motivador, e a grata lembraza que todos os participantes trouxemos do evento. A nosa gratitude aos docentes Newton anfitrións da xornada e a todo o persoal de Tecnópole pola súa amabilidade.

Álbum: Club de Ciencia -> Aula Newton 2021/22

CONVOCATORIA DE AXUDAS PARA ESTANCIAS NO ESTRANXEIRO

Actividades de formación no estranxeiro para alumnado de Bacharelato

Hoxe 3 de febreiro publícase no DOGA a Convocatoria de axudas para a realización de actividades de formación no estranxeiro no ano 2022. A convocatoria vai destinada a alumnado que estea matriculado no 1º ou 2º curso de Bacharelato cunha nota mínima de 6 na materia de inglés (no curso 20/21). O prazo de participación estará aberto entre o 1 e o 28 de febreiro. A presentación das solicitudes realízase de xeito telemático (a través da sede electrónica) ou a través de rexistro oficial. Toda a información sobre a convocatoria, poden atopala na propia convocatoria ou neste enlace.

LINGUA GALEGA COAS TANXUGUEIRAS

FUSIÓN EDUCATIVA:
"TANXUGUEIRAS" NAS AULAS DE GALEGO

Tanxugueiras

     Este sábado moitos acordaron coa noticia educativa do finde nos xornais: un xoven profesor de lingua galega do IES Elviña espertaba a admiración dos docentes da comunidade galega pola súa unidade didáctica "veñen para quedar" sobre as Tanxugueiras, coa que está a traballar desde hai uns días co noso entusiasta alumnado cousas tan peregrinas coma a fonética da lingua galega, a gramática, a sociolingüística e demais asuntos de lingua. 

Veñen para quedar

 O xoven profesor, de prácticas no noso centro (fermoso presente e futuro venturoso), escritor de novelas nos ratos libres (de seguro non moitos), leva por nome Cándido Paniagua, e xunta talento, discreción, compromiso co traballo e xenerosidade a partes iguais. É de xustiza ese aplauso colectivo que recibe Cándido estes días. Entre as cousas que merecen eloxio, non semella a menor o traballo ben feito, o desexo de educar aos xóvenes na lingua galega e o amor pola propria cultura.

 A cousa está, pois, en que a Cándido deulle por acercar a reflexión sobre a lingua galega co orixinal método de recurrir ás novas tecnoloxías e á música das Tanxugueiras, das que moito se fala nestes días por esta súa Terra, canción coa que loitan na Benidorm Fest por representar a España na Eurovisión. E do mesmo xeito que estas tres potentes rapazas levan o son electrónico da música máis moderna á poderosa tradición das cantareiras e das pandereteiras, así o noso Cándido fai bandeira da fusión de música e gramática nas aulas. Disque os rapaces e rapazas están encantados co intento, e que os alalás das Tanxugueiras lles encenderon o aquel da curiosidade pola cultura galega. Diso se trataba. Ben feito!

     Por todos os esforzos semellantes que de cote hai nas aulas de Galiza, cómpre tamén un aplauso. Desta vez tocoulle a Cándido, que ben o merece. Sorte para nós, a comunidade do IES Elviña, que podemos contar con el. Grazas, Cándido!  

ATENCIÓN EN SECRETARÍA DO IES ELVIÑA NO PERÍODO DE NADAL

Durante o período de Nadal a secretaría só abrirá o vindeiro día 4 de xaneiro desde as 10:00 ata as 13:00 horas. As solicitudes de certificacións pódense facer a través desta mesma web (sección CERTIFICACIÓNS na icona lateral esquerda) e serán atendidas nese día e horario. Para outras consultas, poden utilizar o correo electrónico do centro.

Bo Nadal!

O persoal do IES Plurilingüe Elviña deséxalles a todos e todas
un moi Feliz Nadal e un venturoso ano 2022!

BOLSAS DE ESTUDOS EN USA (ALUMNADO DE 4º ESO)

Image Bolsas USA

Despois de dous anos de parón Cóvid, o Servizo de Educación do Concello da Coruña volve facer convocatoria pública de axudas económicas para o alumnado de 4º de ESO que desexe estudar o primeiro curso do Bacharelato nos Estados Unidos de América no vindeiro ano académico. As bases completas da convocatoria foron publicadas no BOP do 10 de decembro  pasado onde poden ser consultadas e descargadas o mesmo que na páxina de Programas educativos do Concello. As solicitudes poderán presentarse a partires do 9 de decembro e ata o 31. Os requisitos: estar empadroado na provincia da Coruña, cursar 4º de ESO, ter acadada unha media en 3º de 6,5 puntos e de 7 na materia de inglés. Pódese descargar o tríptico informativo clicando no mapa dos USA (Just below!).

USA

Distribuir contido


by Dr. Radut