Complementarias

Hoxe, 17 de abril, nas Xornadas de Orientación que para 4º de ESO se organizan desde  Orientación no noso centro, puidemos desfrutar dunha charla realmente motivadora.

María Losada Burgo, exalumna do centro, músico que toca o fagot e vive diso en Amsterdam, contounos non so toda a súa experiencia vital senón a forma na que se enfrentou e se enfrenta a todas as decisións. Leccións inspiradoras para un público que escoitou en absoluto silenzo, mostra de que o seu relato e a súa forma de comunicalo nos fascinou. 

Saír da zona de confort, perseguir os soños, buscar o equilibrio entre o traballo e o cuidado a un mesmo, apoiarse nos amigos, innovar... todo isto e moito máis tivo cabida nese tempo, que soubo a pouco, e que nos fixo admirar a súa perseverancia e optimismo.

Agradecemos inmensamente que compartises connosco tanto... es unha gran referente para todos!

Actualización! No arquivo adxunto pode verse un resumo da charla que María tivo a amabilidade de prepararnos,  xa que non puido verse no seu día, e tampouco puido mandárnola como presentación. Grazas de novo!

Charla de María Losada Burgo. Imaxe de Beatriz López

Hoxe 3 de abril o alumnado de 4º da ESO, xunto coas titoras e a orientadora do centro, fomos ao salón de actos do Centro de Convivencia Uxío Novoneyra, á primeira das xornadas de orientación que terán lugar este curso os mércores na hora de titoría.

Natalia e Noemí, exalumnas do noso centro, explicáronnos todo o proceso que seguiron na elección do ciclo actual que cursan, o Ciclo Medio de Atención ás persoas en situación de dependencia.

O seu obxectivo é estudar o grado de maestra, para iso, en vez de acceder desde o bacharelato optaron por facer un ciclo medio, despois terán que facer un ciclo superior, neste caso o de Educación infantil e por último o grado. Parece que colleron un treito máis longo, pero tendo claro os seus obxectivos están satisfeitas pois gústalles o ensino práctico que reciben e que lles dará un título de técnico en atención a persoas en situación de dependencia, permítelles facer prácticas no segundo curso e incluso ir a estudar 3 meses a Malta. 

As dificultades técnicas impediron que puidesemos visionar a presentación tan traballada que prepararon, pero iso non desmereceu a súa esmerada e completa explicación.

Moitas grazas por achegarnos a vosa experiencia!

Fotografías de Beatriz López CC BY-SA

A Global Money Week é unha campaña anual mundial de concienciación sobre a importancia de que os xoves adquiran unhas nocións financeiras desde pequenos e de que vaian desenvolvendo os coñecementos, habilidades e actitudes necesarias para tomar unhas decisións financeiras sólidas. Está organizada pola Rede Internacional de Educación Financeira da OCDE (OCDE/INFE), na que participa o Plan de Educación Financeira – Finanzas para todos (Banco de España, CNMV, y Ministerio de Economía, Comercio y Empresa).

Este ano celébrase baixo o lema Protexe o teu diñeiro, asegura o teu futuro (en inglés Protect your money, secure your future).

Esta semana, para participar nesta iniciativa, desenvolvimos o xoves 21 de marzo un obradoiro co mesmo lema co alumnado de Economía e emprendemento de 4º da ESO. En Empresa e Deseño de Modelos de Negocio de 2º de bacharelato, en Formación e Orientación Persoal e Profesional de 4º da ESO e en Economía de 1º de bacharelato o venres 22 de marzo estivemos tamén avaliando e afondando na educación financeira.

E ti... protexes o teu diñeiro?

Hoxe 29 de febreiro, tivemos a oportunidade de desfrutar dunha das charlas do programa A Ponte, da USC, que ademais de dar a coñecer os estudos de Grado ofrece información sobre o contexto investigador, social, cultural e espacial desa universidade.

Acompañounos Roberto Bande Ramudo, decano da facultade de ADE en Lugo, quen expuxo ao  alumnado de Economía e emprendemento de 4º da ESO e de Economía de 1º de bacharelato, o traballo dos economistas, e como grazas á utilización de modelos, que son simplificacións da realidade, podemos facer predicións.

Grazas Roberto, por compartir connosco os teus coñecementos e experiencia.