CEIP PLURILINGÜE A CRISTINA

Vén de publicarse no Diario Oficial de Galicia a participación no Fondo Solidario de Libros de Texto e Axudas para a Adquisición de Libros de Texto e de Material Escolar. 

As solicitudes tramitaranse cubrindo o impreso adxunto, o cal tamén estará á vosa disposición na conserxería do centro, ou de forma telemática para tod@s aquel@s que dispoñades de certificado electrónico na Sede Electrónica da Xunta.

• Forma de presentación electrónica: https://sede.xunta.gal/portada
• Forma de presentación presencial pero con asistencia da aplicación: cubrir os datos na apliación, imprimir os Anexos I e II producidos e presentar no centro educativo.
• Forma de presentación presencial manual: empregar os Anexos I e II da Orde da convocatoria e presentalos no centro.

Deberán cubrirse os Anexos I e II, así como achegar copia do libro de familia. En caso de separación ou divorcio requírese copia da sentenza xudicial ou do convenio regulador, onde se especifique a garda e custodia do menor. Terase en conta a renda do ano 2021 e o número de membros computables da unidade familiar con data do 31/12/2021.

As solicitudes serán únicas, no caso de ser presenciais, para tod@s os/as fill@s matriculados no centro. No caso de que as solicitudes se tramiten de xeito telemático serán unha por cada fillo/a.

O prazo de presentación de solicitudes abrangue dende hoxe sábado día 20 de maio ata o vindeiro mércores 21 de xuño de 2023, coincidindo co remate do presente curso académico.

As solicitudes para os niveis de 5º e 6º de educación primaria tramitaranse só para a adquisición do material escolar por ser cursos E-DIXGAL.

O alumnado que non estea admitido/a nin coñeza en que centro vai estar escolarizado no curso escolar 2023/24, deberá presentar a solicitude no centro no que está matriculado no curso 2022/23.

O alumnado que curse a día de hoxe 6º nivel de educación primaria e estea admitido/a no IES para o vindeiro curso, presentará a solicitude no Instituto de Educación Secundaria.

Máis información nos arquivos adxuntos e na páxina da Consellería: https://www.edu.xunta.gal/fondolibros/

Para conmemorar o Día das Letras Galegas, hoxe celebramos na pista polideportiva do noso colexio, a "VI Carreira pola Lingua do Ceip. A Cristina",na que participou todo o alumnado do centro, para reivindicar a defensa da nosa lingua e fomentar os hábitos saudables.Este ano contamos coa actuación de dous músicos que nos deleitaron co seu bo facer.  

O pasado martes día 9 publicamos as listaxes definitivas de admitidos e non admitidos para o vindeiro curso 2023/24 no hall do centro. 

Foron admitidas todas as solicitudes presentadas en prazo para 4º nivel de educación infantil e para 5º nivel de educación primaria. No resto dos cursos as solicitudes presentadas non foron admitidas por non haber vacantes.

O prazo para formalizar a matrícula é do 20 ao 30 de xuño de 2023.

No CEIP Plurilingüe A Cristina a primavera está no aire e quixemos crear nos corredores un ambiente moi fermoso. 

Cando fai bo, encantános saír a merendar fóra.

Onte e hoxe foron os/as alumnos/as de segundo e terceiro de educación primaria os que disfrutaron dunha xornada de surfing na praia de Razo. Ollade que ben o pasaron!

O 26 de abril publicouse a convocatoria para solicitar as axudas para o alumnado con Necesidade Específica de Apoio Educativo. O prazo abrangue dende o 8 de maio ata o 20 de setembro de 2023.

A documentación a presentar é a que segue:

-Solicitude de beca cuberta e firmada.

-Fotocopia do DNI dos membros que compoñen a unidade familiar.

-Informe médico actualizado.

-Orzamento do gabinete (psicolóxico, psicopedagóxico e/ou logopédico) ao que acudirá o alumno/a.

Todo o proceso de solicitude da beca realízase pola Sede Electrónica do Ministerio de Educación e Formación Profesional. Unha vez cuberto, hai que imprimir o formulario de solicitude (PDF) e presentalo no centro educativo de non ter certificado electrónico.

https://sede.educacion.gob.es/portada.html

Hoxe  comezaron na praia de Razo as actividades de surf na praia englobadas no proxecto "Aprende a través do Surfing". 

O alumnado de primeiro de E.Primaria participou ao longo de toda a mañá dunha xornada de convivencia, onde os nenos/as tiveron a oportunidade de desfrutar do surf, coñecer a cultura oceánica  e experimentar todos os valores do surfing.

As proximas sesións, se as condicións metereolóxicas e das mareas o permiten, serán nas datas seguintes:

• Luns 8 de Maio: 2º E. Primaria.
• Martes 9 de Maio: 3º E. Primaria.
• Mércores 10 de Maio: 4º E. Primaria.
• Xoves 11 de Maio: 5º E. Primaria.
• Venres 12 de Maio: 6º E. Primaria. 

Os alumnos/as de 5º e 6º de E.Primaria comezaron hoxe  o VIII Torneo de Bádminton da Cristina. 

Ao longo das próximas semanas celebraranse todos os partidos durante os recreos.

Moita sorte a todos/as!

A rapazada do CEIP Plurilingüe A Cristina botouse hoxe á rúa para protestar contra o Acoso Escolar, co obxectivo de concienciar sobre esta forma de violencia que a sociedade non logra erradicar. 

Erguendo ben altas as nosas pancartas, chegamos ata a Praza do Concello. Alí reunímonos para entoar os nosos cánticos de protesta e, despois, fomos merendar ao parque.

De volta, os/as nenos/as de Educación Infantil continuaron polo Paseo do Anllóns, collendo flores como fermoso broche final para este día.

Ollade o vídeo resume!

Lembrámosvos que o vindeiro LUNS, 1 DE MAIO(festivo nacional) e  MARTES, 2 DE MAIO (día non lectivo escollido polo centro)  son  DÍAS NON LECTIVOS, polo que o centro educativo estará pechado ambos días.

As clases reiniciaranse o MÉRCORES, 3  DE MAIO no seu horario habitual.

Un saúdo.

Fixádevos que obras de arte tan maravillosas se poden crear co retroproxector! Este aparello ten moitísimas aplicacións e resulta moi inspirador.

No CEIP Plurilingüe A Cristina estamos que non paramos celebrando a Semana do Libro. O luns recibimos a visita de Pere Tobaruela (Barcelona, 1965) para falar da súa obra "Formigas. Misión Rosalía", publicado pola Editorial Xerais. E a que non sabedes? Os alumnos/as de 5º e 6º fixeron unha tertulia literaria dende a Radio Escolar comentando os aspectos máis destacados libro. Para escoitala só tedes que descargar o arquivo de audio nos documentos adxuntos.

Pero esto non fica aquí! Mañá acompañaranos a escritora nacida en Cee María Canosa para falar do seu libro "As pombas de Bastián". O programa "Recomendacións Lectoras" da Radio Escolar fixo unha breve sinopse da obra, ademais de incidir no que máis lle gustou e noutras ideas que se podían mellorar. Descargádeo nos arquivos adxuntos!

Do 24 ao 28 de abril celebrarase a Semana do Libro e a Lectura.

O Concello de Carballo oferta actividades moi interesantes para tódolos cativ@s. Descargade o tríptico e a volantina nos arquivos adxuntos onde veredes o programa de actividades. 

O CEIP Plurilingüe A Cristina tamén colaborou na exposición. Se subides á primeira planta da Biblioteca Rego da Balsa atoparédesvos cun impresionante recuncho onde se atopan algúns dos traballos do noso alumnado. Lembrade que se as familias desexades ver a exposición polas tardes debedes poñervos en contacto coa Biblioteca Rego da Balsa para reservar.

 O noso alumnado asistirá ás seguintes actividades a vindeira semana:

• Martes 25: o alumnado de 1º nivel de educación primaria asistirá ao espectáculo "Rockeando con Ramona Pequena" de Pakolas e en horario de 12:00 h a 13:00h.
• Mércores 26: o alumnado de 6º nivel de educación infantil asistirá ao espectáculo "E a ti... que che chontaban?" de Vero Rilo en horario de 11:30 h a 12:30 h.
• Venres 28: o alumnado de 5º nivel de educación primaria asistirá ao espectáculo "A ovella e o lobo e o año e a ovella" de Celso Fernández Sanmartín de 10:00 h a 11:00 h. Neste mesmo día, o alumnado de 3º nivel de educación primaria asistirá ao espectáculo "Aprende maxia" de Mago Marco tamén no mesmo horario. 

O pasado venres o alumnado de 3º e 4º nivel de educación primaria visitou o Museo Etnolúdico de Galicia (MELGA) da man de Ricardo Pérez y Verdes, home polifacético onde os haxa, antigo seleccionador de voleibol, mestre do INEF e apaixoado do estudo da evolución histórica do xogo e do deporte a través dos tempos e das civilizacións antigas.

Sonia, a profe de inglés, e Kate, a auxiliar de conversa, puxeron en marcha a "Easter Scavenger Hunt", típica actividade dos países de fala inglesa que consiste en buscar ovos de Pascua que están agochados.