Proxecto dinamización

O día 16 de maio conmemoramos o Día das Letras Galegas 2023, homenaxeando ao escritor Francisco Fernández del Riego. As actividades programadas comezaron, no patio cuberto, cun acto no que interviron o alcalde, José María Bello Maneiro, o director do noso centro, Eliseu Mera así como alumnado de 6º do CEIP de Baño e CEP X. Ferro Couselo lembrando a figura de Francisco Fernández del Riego. Neste acto tamén actuou o alumnado que pertence á Banda de Música de Valga co mestre Manuel Villar ao fronte, interpretando varias pezas musicais que incluíron a interpretación dos himnos do concello de Valga e o Galego.

A actividade central foi a celebración da XI edición de “Bota unha Carreira pola Lingua” na que participaron alumnado de 6º de Primaria dos colexios do concello, Baño e Xesús Ferro Couselo, así como os de ESO, Bacharelato e Ciclos Básicos xunto ao profesorado.

Para concluír a xornada tivo lugar a entrega de medallas aos tres primeiros clasificados en cada categoría establecida na carreira e un obradoiro de muiñeira a cargo de Miguel Sotelo para todo o alumnado.

Máis información picando neste enlace.

Dentro das actividades do Equipo de Dinamización da Lingua Galega do noso centro, estase a desenvolver unha proposta artística baseada no movemento Acción Poética, que consiste en encher as cidades de poesía pintada nas paredes. No IES estanse a ilustrar os vidros das fiestras con composicións feitas polo alumnado.
O luns 9 comezaron a facerse as primeiras escritas por parte de alumnas e alumnos de 2º de Bacharelato e a intención é que máis persoas (alumnado, profesorado ou membros da comunidade educativa) contribúan a pintar as ventás do centro coas súas creacións poéticas.
Quen queira facer algunha achega creativa só ten que pedir un rotulador específico a Fran Godón (profesor de Lingua Galega) e escoller un vidro no que expresarse. O único requisito é que se trate dunha creación propia e que estea escrita en galego.

Animamos a toda a comunidade educativa a participar nesta actividade!!!.