Complementarias

Día Internacional da Eliminación da Violencia contra a Muller no IES Plurilingüe de Valga

Lun, 27/11/2023 - 00:59 — IES de Valga

Con motivo do “Día Internacional contra a Violencia Machista”, 25 de novembro, a comunidade educativa do IES Plurilingüe Valga celebrou, o venres 24 de novembro, un acto para manifestar o seu rexeitamento en contra de calquera violencia exercida sobre as mulleres e sensibilizar ao alumnado contra esta lacra social. O patio cuberto foi o escenario da actividade programada, centrada na representación da escaleira de violencia a cargo de alumnado de 2º e 4º de ESO, 1º e 2º do Ciclo Básico de Agroxardinaría, 1º de Bacharelato, así como alumnas do Ciclo Básico de Fabricación e Montaxe. Ademais, en representación do alumnado e profesorado, a alumna Carla Herrero e o profesor Fran Godón recitaron varios poemas relacionados con esta celebración. O acto foi conducido pola profesora Maruxa Barca e, contou co acompañamento musical do alumnado de Música de 4º ESO e 1º Bacharelato, dirixidos polo profesor Ismael Cabaleiro, que versionaron as cancións "Que nadie" de Manuel Carrasco e "A porta violeta" de Rozalén. A actividade foi organizada polo Equipo de Igualdade xunto a Vicedirección.

Saída polo concello do alumnado de 1º e 3º ESO dentro do programa TEI

Ven, 24/11/2023 - 00:31 — IES de Valga

O xoves 23 de novembro, o alumnado de 1º e 3º ESO que participa no programa de Titoría entre Iguais (TEI) realizou unha saída pola parroquia de Santa Cristina de Campaña. Visitaron a Ponte do Souto, o embarcadoiro de Santa Cristina e a lagoa de Campaña. A actividade centrouse en coñecer a paisaxe e historia destes lugares, así como recoller a toponimia dos lugares que ían percorrendo. A saída completouse cunha actividade de xogos cooperativos programada polo departamento de Educación Física, no espazo da lagoa de Campaña. O alumnado foi acompañado polo profesorado Esther de Andrés, Lucía Iglesias, Mar Tejero, Lara García, Conchi Paz, Avel Turnes e Alberto Fernández. A actividade foi organizada polo departamento de Educación Física en colaboración cos responsables do programa Titoría entre Iguais (TEI). Por último agradecer a colaboración de Protección Civil do Concello que acompañou a alumnado e profesorado en todo o itinerario realizado.

Celebramos o Magosto

Sáb, 18/11/2023 - 23:06 — IES de Valga

O luns 13 de novembro, nas horas lectivas da tarde, celebramos un Magosto. A degustación de castañas xunto cun campionato de brilé centraron as actividades dunha xornada de diversión da comunidade educativa do Centro.

Alumnado de 3º ESO participa na videoconferencia «O acoso escolar: ti es importante» dentro do programa TEI

Mér, 15/11/2023 - 19:36 — IES de Valga

O martes 14 de novembro e co título «O acoso escolar: ti es importante», o alumnado de 3º ESO asistiu á videoconferencia da profesora e cofundadora da Asociación “No al Acoso Escolar”, Carmen Cabestany. A charla tivo lugar dende a Sede Afundación da Coruña e dentro do ciclo Educación s. XXI Afundación, obra social Abanca. Carmen Cabestany, unha das maiores expertas na loita contra o acoso escolar, explicou nesta conferencia o concepto de acoso escolar, como detectalo e as claves para erradicar o bullying.

Esta actividade foi organizada polo departamento de Orientación e a Vicedirección dentro do programa de Titoría entre Iguais (TEI).

Alumnado de 1º e 3º ESO celebra o Samaín dentro do programa TEI

Ven, 03/11/2023 - 22:23 — IES de Valga

O alumnado de 1º e 3º ESO celebrou o Samaín cunha actividade organizada polo programa de Titoría entre Iguais (TEI). "Relatos terroríficos do Samaín" foi o título desta actividade onde o alumnado de 3º ESO, dividido en grupos espallados por dez espazos diferentes do noso centro, contou relatos de terror ao alumnado de 1º ESO repartido en seis grupos.