Este mes celebramos o mes da oralidade na escola do Cep Santa Tegra de Teis.
Con esta iniciativa pretendemos
fomentar a tradición oral, o acto de contar contos, refráns e adviñas,
recitados, poesías..., en definitiva o acto de "contar en lingua galega"
como un medio de transmisión non só de coñecementos, senón tamén co
obxectivo de fomentar a actitude de escoita.

Dende o Equipo de Normalización Lingüística e, en vista do éxito das iniciativas anteriores: "Lecturas pola Paz" e "Semana do Comic", organizamos "Lecturas pola oralidade", polo que durante todo o mes
estará exposta, na entrada da escola, unha mesa xigante con libros de
contos, adiviñas, recitados, poesía... para ler na hora do
recreo ou ben nas horas de biblioteca pola tarde.

E para que vexades que tamén é posible traballar na web a oralidade, aquí tedes un enlace para escoitar todo tipo de recitados.

 O Equipo de Normalización Lingüística organizou unha nova exposición, esta vez sobre "Aparellos de labranza".

O agro, a gandería e o mundo do viño forman parte da cultura e da historia da nosa comunidade.

Esta exposición tiña a intención de achegar ao alumnado un anaco da nosa realidade económica e cultural. Descubrirlles o que son as fouces, fouciños, sachos, angazos, unha peneira, billa, prensa ou unha canga... era o noso obxectivo.

Agradecemos a todas as familias, a toda a comunidade escolar e como non, a José Manuel, pola colaboración e axuda para sacar adiante este proxecto.