Crêpes La Marinière

O pasado luns 4 de marzo o alumnado de francés de 2º ESO a 2ºBacharelato participou nun obradoiro de crêpes, actividade realizada polo Departamento de Francés.

O alumnado tivo a oportunidade de coñecer a cultura bretoa da man de Jérémy Thomas e a súa gastroteca ou foodtruck La Marinière, ademais de poñer en práctica a lingua francesa, degustar e cociñar a súa propia crêpe. Délicieuses!

A actividade foi todo un éxito grazas tamén á excelente actitude e comportamento do alumnado.

 

Monstros

O Departamento de Orientación organizou o pasado venres 1 de marzo unha saída á Sala Ártika para que o alumnado de 1ºESO puidese asistir á representación de Monstros da Compañía Produccións Teatrais Excéntricas.

Esta obra foi escollida para tratar o tema da aceptación da diferenza e a superación dos medos e prexuízos. Monstros parte da base de que aprendendo a aceptar as nosas propias “monstruosidades”, tamén aprenderemos a aceptar as dos demais. E se o podemos facer todo dende unha clave humorística, moito mellor.

Sobremesa sobre versos

Nesta ocasión xuntáronse os dous grupos de membros do Club de Lectura, o dos de 1ºESO e 2ºESO e os de 3ºESO e 4ºESO para comentar o último libro de Raquel CastroSobremesa sobre versos, acompañados pola ex-profesora do centro Ana López.

Esta sesión serviu, ademais de para compartir impresións e pasalo moi ben nunha xuntanza conxunta, para preparar a intervención dos e das integrantes do Club de cara á visita da escritora o próximo mes de abril.

Sen dúbida a mellor maneira de clausurar o traballo deste trimestre!

Máis detalle sobre a actividade no Blog do Club de Lectura.

Naturnova e exposicións

Co gallo da celebración do Día Internacional da Muller e da Nena na Ciencia, o alumnado de 1ºESO asistiu o venres 23 de febreiro a Naturnova, o centro interactivo de educación ambiental de Afundación.

Nun primeiro momento dividíronse en grupos cos que ir coñecendo en detalle a exposición Mulleres na ciencia. Foi así como se achegaron á vida e legado de mulleres como Ángeles AlvariñoSara García AlonsoBegoña VilaWangari Maathai etc.

A continuación foron á exposición de fotografía Comediy Wildlife para traballar tamén en pequenos grupos e analizar dende un punto de vista biolóxico os diferentes animais fotografados.

Por último, o alumnado participou nun obradoiro de robótica no que aprendeu a empregar un programa de cámaras trampas e así realizar fotografías de animais en estado salvaxe.

 

Rosalía, sempre!

O 23 de febreiro, o alumnado de 1º BACH E de artes escénicas e música homenaxeou a poetisa Rosalía de Castro, cunha actividade que consistía na dramatización e canto dalgúns dos poemas de Cantares gallegos e Follas novas, utilizando diferentes espazos do IES: vestíbulo, salón de actos e biblioteca.

O alumnado de 3º ESO, público desta actividade, comezou o percorrido rosaliano no vestíbulo, onde o coro de 1º BACH E, acompañado ao piano pola profesora Marta Barreiro, nos deleitou cunha versión de “Campana de Bastavales”; despois algunhas integrantes do coro dramatizaron os poemas “Cantan os galos pr’o día” e “Miña Santiña”. Na seguinte parada, no salón de actos, o alumnado presenciou a representación dos poemas “N’hay peor meiga que un-ha gran pena” e “A xustiza pola man”. E, na derradeira parada, na biblioteca, asistiron á representación do poema “Para a vida, para a morte”.

Para o ano que vén, máis Rosalía!

[Se non pode ver o vídeo, prema na seguinte ligazón: Campana de Bastavales] 

 [Se non pode ver o vídeo, prema na seguinte ligazón: A xustiza pola man] 

Verseando a nosa Rosa

O alumnado do Agrupamento de 1º ESO e 2º ESO realizou a súa particular homenaxe a Rosalía para conmemorar o seu día.
En colaboración co Departamento de Orientación e a materia de Lingua Galega, colocaron un cartaz coa imaxe de Rosalía no vestíbulo, escribiron en flores de papel os seus versos favoritos dunha escolma de poemas e bordearon con elas a imaxe para unir así a beleza da poesía e a natureza arredor da nosa grande autora e dar a coñecer á comunidade educativa a súa obra.

 

Recital musicado

Do 19 ao 23 de febreiro conmemoramos o nacemento de Rosalía de Castro coa Semana Rosaliana.

O mércores e o xoves celebramos na nosa Biblioteca un recital musicado de poemas de Cantares gallegos e Follas novas, as dúas obras da autora que marcaron o rexurdir literario da lingua galega.

O recitado veu da man de alumnado de Bacharelato, mentres que o acompañamento de piano correu a cargo do Grupo de Música do instituto.

Pechamos ambas as dúas sesións cunha interpretación de “Negra sombra” con baixo, piano e voz, que non deixou indiferente a ningún dos asistentes.

 

 [Se non pode ver o vídeo, prema na seguinte ligazón: Negra sombra]

 

Acreditación das competencias dixitais do alumnado

Amplíase ata o 15 de marzo o prazo de solicitude e inscrición nas probas específicas para a acreditación das competencias dixitais do alumnado que cursa 4º de educación secundaria obrigatoria e 2º de bacharelato na Comunidade Autónoma de Galicia no curso 2023/24.

 

Resolución do 28 de febreiro de 2024

Competencia dixital do alumnado

 

 

Conmemoración do Día Mundial da Poesía e do Día da Árbore (21 marzo)

O día 21 de marzo coinciden dúas celebracións importantes: o Día da Árbore e o Día Mundial da Poesía. Para conmemorar ambas as dúas datas, dende os departamentos de Bioloxía e Xeoloxía, Lingua e Literatura Galega, Xeografía e Historia, o equipo de Dinamización da Lingua Galega (EDLG) e o club de Ciencias do IES Alexandre Bóveda, convócase un concurso de caligramas, que se celebrará entre o 21 de febreiro  e o 21 de marzo.

Preme na seguinte ligazón para consultares as bases do concurso: I Concurso de Caligramas

 

Distribuir contido