Lingua Galega e Literatura

O pasado mes de outubro creouse un novo blog para a dinamización da língua galega: "A artesa do Eusebio". Neste blog publicáronse os traballos que sobre as Cantigas fixo o alumnado de 3º da ESO. A foto leva ao enlace a o primeiro dos traballos, que seguro vanche a sorprender.

Charla sobre “O misterio de Portomarín” pola autora Antía Yáñez Rodríguez, dirixida ao alumnado de 1º de ESO. Foi organizada polo Departamento de Lingua Galega.

Os alumnos de 1º de bacharelato, acompañados polos profesores Xulio Cuba, Carmen Edreira, Antonio Fondo, Manuel Varela, Sebastián Selas e Ana Rey. Percorreron a ruta pondaliana por terras de Ponteceso, coas visitas ao dolmen de Dombate, castro de Borneiro, Fraga de San Fins do Castro, as beiras do río Anllóns, a Fundación Eduardo Pondal e o MELGA (Museo Etnolúdico de Galicia). Unha actividade organizada polo Departamento de Lingua Galega e Literatura.

Hoxe visitounos o escritor vigués, premio Blanco Amor 2005, Francisco Castro. O seu auditorio estivo formado polo noso alumnado de 1º da ESO. Máis dun cento de rapaces que mereceron xa un dez polo seu comportamento. Estiveron moi atentos á dinámica e entretida charla sobre a xénese da obra Chamádeme Simbad. Logo fixéronlle varias preguntas intelixentes. Francisco Castro respondeu de igual a igual, demostrando unha vez máis a importancia de sermos seres que len, conscientes dos problemas do mundo e do poder do individuo que sabe discernir as palabras sabias das palabras falaces.

(Fotos de Pedro R. Porca) 

Decembro foi mes de cociña para moitos dos nosos alumnos. Moitos deron o mellor deles facendo grandes receitas. E as documentaron para compartilas convosco. Se queres velo con gran calidade selecciona HQ neste enlace.

Actualización 22 de febreiro: Podes ver as receitas en modo libro neste enlace.

“CELEBRAMOS QUE TEMOS OLLOS PARA LER”

Pregunta: Quen escribiu estas fermosas palabras? (2 puntos)

A Virxe das Angustias, enclavada no reverso de moitas cruces de pedra, non é a Piedá dos escultores; é a Piedade creada polos canteiros.

Os nosos canteiros, deixándose levar polo sentimento, non podían imaxinar un home no colo da nai.

Para os artistas canteiros, Xesucristo sempre é pequeno, sempre é o Neno, porque é o Fillo, e os fillos sempre somos pequenos nos colos das nosas nais.

Reparade nos cruceiros e descubriredes moitos tesouros.

Celebramos o xoves 19 a festa das letras. Había unha boa razón, presentar o número 6 da revista, auténtico buque-insignia, do Instituto, “Alén da chuvia”. Neste número hai unha nutrida representación do bo facer literario de alumnado e profesorado. Non deixedes de comprobalo. Como vedes nas fotos, actuou o coro do Eusebio da Guarda. 

A ocasión era propicia para entregarlle a Lucía Blanco Miguéns o premio como vencedora do concurso “Gañapuntos” que celebramos –unha pregunta semanal- durante as vinte primeiras semanas deste curso, nunha estreita colaboración entre Club de Lectura e Biblioteca do Instituto. O agasallo consistiu nunha magnífica edición en catro volumes dos relatos da coruñesa Emilia Pardo Bazán. Agradecemos desde aquí á Fundación Barrié, sempre ao servizo da nosa cultura, a súa xenerosa contribución en libros para a mellora e estímulo do alumnado participante no Club de Lectura do IES ao que nos honramos de pertencer. Vedes na foto correspondente a Lucía, o Coordinador de “Alén da chuvia” e Xefe de Dinamización Lingüística, Xulio Cuba Orosa e mais a Vicedirectora, Mª Rosario Soto Arias.

 HIPOGRIFO VIOLENTO CLUB

 CONCURSO GAÑAPUNTOS

 19ª SEMANA. 19ª PREGUNTA

“Hai dúas maneiras de ir pola vida: como romántico e como clásico. O romántico, cando perde as ilusións, desespérase, faise escéptico e xa non cre en nada. O clásico, polo contrario, ó perde-las ilusións consegue a madurez e con ela a serenidade, acepta as súas limitacións e atinxe a aurea mediocritas, que é a súa maneira de ser feliz”.

Isto dicíao Ramón, personaxe deseñado pola escritora Marina Mayoral. A que obra pertence este fragmento? (1 punto)

O NOSO CORAZÓN É UNHA ROSA DE CEN FOLLAS. OU CEN LIBROS

SEMANA 17ª. PREGUNTA 17ª

Saberías dicirnos o título  dun libro de ciencia ficción que alude á temperatura á que arde o papel? (1 punto)

HABITAMOS OS LIBROS

15ª SEMANA. 15ª PREGUNTA

No relato “Fría Hortensia”, pertencente ao libro Aqmor de Artur de X. L. Méndez Ferrín, hai un pote capaz de resucitar aos guerreiros mortos en combate (despois de mergullalos nel). Como se chama ese pote? (1 punto)