Orientación

Recompilando datos sobre igualdade e violencia de xénero

A finais do mes de maio visitáronnos dende Cáritas para ofrecer unha charla baixo o título "A nova escravitude do século XXI: Trata de seres humanos con fins de explotación sexual, outra forma de violencia de xénero". 

A charla da a coñecer e conciencia sobre unha realidade que no día a día soe pasar desapercibida, non sendo conscientes na maior parte das ocasións doutro tipo de violencias que están moi vinculadas coa violencia por razón de xénero. 

Alumnos de 3º da ESO traballando na realización dun vídeo sobre o abordado ó longo do proxecto. Elaboraron un vídeo explicativo que recolle os aspectos máis importantes ou destacables en materia de educación afectivo-sexual, para logo ensinarllo ós seus compañeiros de 2º de ESO, a modo de formación. 

Para a elaboración do vídeo, os alumnos organizáronse en grupos e elaboraron en primeiro lugar un texto para conformar o audio. O texto está diferenciado en partes (introducción, diversidade sexual, prevención...). Feito isto, coa cámara de vídeo do colexio, grabaron algunhas imaxes de textos escritos en pizarra e tamén do centro para formar a composición, que se completou con texto escrito do programa empregado. Para o audio, grabaron as lecturas e logo axustóuse o audio á imaxe, mediante o emprego do programa Imovie. 

Aquí algunhas fotografías do alumnado traballando na composición do vídeo. 

Visualizamos na aula un fragmento da curtametraxe "El orden de las cosas" (2010). Trátase dunha curtametraxe realizada polos irmáns Alenda sobre a violencia de xénero e os malos tratos no ámbito familiar. A curtametraxe transmite o paso do tempo na vida de Julia, que ten lugar nunha bañeira na que ela se refuxa dos malos tratos do seu marido e na que intentará reunir o valor para cambiar a orde das cousas. 

Trala visualización abreuse o turno para o debate e intercambio de ideas. A curtametraxe está cargada de metáforas e pese á súa complexidade, os alumnos captaron ben o seu significado e aportaron ideas e reflexións interesantes durante o turno de palabra, dando eles mesmos resposta a cuestións como o por que Julia permanece sempre igual mentres o seu marido envexece, o por que a porta do baño debía estar sempre aberta, o significado do cinturón, as variacións na persoalidade do protagonista en función das persoas coas que interactúa...En realidade, os alumnos analizaron a curta polo miúdo, concluíndo que as relacións de parella deben estar baseadas no respecto e igualdade e rexeitando toda clase de violencia.