Orientación

A chegada da pubertade trae consigo unha serie de cambios físicos e psicolóxicos que, en certa medida, "descolocan" ao suxeito e que o impelen a buscarse a sí mesmo/a, a explorar diferentes opcións para construírse como persoa, como futuro adulto. Nesta busca, son moitas as opcións a explorar, moitas as posibilidades... e cada ún/unha vai tomando as súas decisións (de ideoloxía, política, relixión, vocacionais, estética, consumo/non consumo de substancias...). O que ocorre é que en moitas ocasións esas decisións non se toman "libremente", senón condicionados polo que fai ou pensa o noso contorno, a chamada "presión social ou de grupo". Neste senso, a sexualidade non é unha excepción, e con frecuencia hai presións para iniciarse neste eido, experimentar certas prácticas... A sexualidade (a vivencia da sexualidade) é algo moi persoal, polo que ninguén debe marcar o ritmo que ten cada quen. 

Así pois, parece oportuno proporcionar ao alumnado estratexias para que aprendan a "soportar" ou lidiar mellor coa presión do grupo no referente a sexualidade. Esta é a temática arredor da cal xirou a sesión do Quérote + desenvolvida o 29 de abril.

Empregando a técnica do role-playing, dous alumnos representaron diversas situacións, nas que unha persoa exercía presión sobre outra.

A proposta de relacións eróticas, o ofrecemento de fumar un porro, tatuar o nome da parella como mostra de amor ou tinxir o pelo dunha cor que está de moda... foron algunhas das situacións que representou o alumnado de 3º da ESO.

Finalmente, a sesión rematou coa visualización dun vídeo e o posterior debate e reflexión grupal sobre o "consentimento sexual". Como ten que ser  o consentimento sexual? baixo que condicións ten que estar a persoa para dar ese consentimento? Un NON QUERO pódese dar en calquera momento, Que acontece se hai un cambio de opinión antes e durante? Estas e outras cuestións foron debatidas polo alumnado do grupo.

O día 28 de maio o alumnado de 4º da ESO participou nunha sesión formativa sobre a "Educación sexual". A sexualidade é unha parte constitutiva do ser humano, que non se esgota nas meras relacións sexuais, senón que implica os afectos, sentimentos, relacións, vivencias... A vivencia da sexualidade ten un abrupto espertar ao chegar á pubertade, aparecendo medos, inseguridades, crenzas erróneas. Na adolescencia é preciso aprender a vivir a sexualidade de xeito coherente cos propios desexos, vivencias, crenzas, valores... e con responsabilidade. Neste senso, a escola dentro do Plan de Acción Titorial (no seu apartado de educación para a saúde) debe colaborar en formar e orientar ao alumnado sobre unhas relacións sexuais seguras e responsables. De aí o motivo desta sesión formativa, na que contamos coa colaboración de Cruz Vermella Lugo.

As novas tecnoloxías e, en especial a Internet, están cada día máis presentes na sociedade e na nosa vida cotiá. Teñen moitas cousas boas, pero un mal uso ten os seus riscos e pode traer unha serie de consecuencias negativas. Neste senso como centro educativo temos a labor de "educar", asesorar e orientar ao alumnado neste tema. Así pois, o pasado día 29 de maio dentro do Plan de Acción Titorial, en colaboración coa Garda Civil (Plan Director) levouse a cabo unha charla formativa sobre as novas tecnoloxías e os seus riscos co alumnado de 2º da E.S.O. Estas actuacións correspóndense cun principio básica na intervención orientadora: a prevención. Entendemos dende o Departamento de orientación do centro, que a prevención -a educación, en definitiva- é a arma máis poderosa que temos para evitar a aparición de problemas de conduta, así como de futuras adiccións vencelladas a un mal uso da novas tecnoloxías.

O sexting (envío de fotos e/ou vídeos de carácter erótico e/ou sexual), o grooming (engano pederasta nas redes sociais), a difusión de fotos ou vídeos de carácter privado na Internet e os seus riscos (psicolóxicos, emocionais, penais); as apostas e o póker on-line, os videoxogos na rede... foron algúns dos temas que se abordaron nesta sesión. Coa intención de formar ao alumnado nun uso consciente e responsábel das novas tecnoloxías.

Ademáis, ese mesmo día -en sesión de tarde- a formación dirixiuse a todas as familias que quixeron asistir. Novamente (neste caso enfocado para pais) falouse das apostas on-line, o póker, os videoxogos, youtubers, delitos relacionados con determinadas prácticas no uso das novas tecnoloxías...

A seguinte sesión do Quérote + xirou arredor da relación dos sexos a través da tecnoloxía. Cales son as diferenzas á hora de relacionarse coa túa parella no cara a cara fronte a unha relación virtual mediada pola tecnoloxía? 
Para entrar en materia o alumnado viu algúns vídeos sobre as características das relacións a través da tecnoloxía:

- Doble check: nesta curta pódese ver como o doble check do whatsapp pode ser motivo de discusión nunha parella cando os celos e a desconfianza se apoderán dunha das partes.

- Yo tb tq: esta curta amosa moi ben as diferenzas que existen entre unha relación, conversa cara a cara e unha conversa a través da tecnoloxía. A ausencia de contido paralingüístico produce unha inmensa perda de matices e informacións necesarias para a correcta comprensión do que se está a falar, provocando a descontextualización da información transmitida mediante a linguaxe verbal o que pode dar pé a malas interpretacións, coas súa correspondente discusión de parella.

Logo da visualización destes vídeos o alumnado debateu sobre temas como:

- A confianza e desconfianza nas relacións (como xestionar esas situacións...).

- A importancia da linguaxe verbal.

- A interpretación errónea de mensaxes e as súas consecuencias.

- Os celos: unha expresión de ¿amor?, pensamentos alternativos...

O día 3 de abril desenvolveuse no CPI Ramón Piñeiro a actividade "A violencia de xénero" co alumnado de 3º da ESO. A violencia de xénero (coma calquera tipo de violencia) é algo inadmisible no século XXI que como sociedade no debemos tolerar. Unha das posibles solucións para o esvaecemento deste tipo de violencia pasa, sen dúbida, pola prevención e educación. Neste senso, a escola ten un importante rol que xogar como axente socializador das novas xeracións.

Ao longo da charla, analizouse con alumnos e alumnas diferentes exemplos de viodeoxogos, películas, cancións, anuncios publicitarios... cun denominador común: unha visión androcéntrica da sociedade; co obxectivo de desenvolver no alumnado a capacidade de análise crítica dos diferentes estímulos que por diversas canles reciben acotío.

Finalmente, subliñar o interese desta actividade como un "paso máis" do centro no esforzo de educar as alumnas e alumnos no respeto mutuo e a igualdade nas nosas relacións como individuos dunha sociedade.