Visitas didácticas

Actividade enmarcada dentro do contrato-programa de innovación educativa Edu saúde.

Durante o primeiro trimestre e dentro da unidade didáctica de condición física e saúde, o alumnado de 1º de bacharelato realizou parte do Camiño de Santiago, na súa variante francesa, de maneira virtual. Nas sesións nas que se traballaba a resistencia anotábase o total de quilómetros realizados por toda a clase. Así, metro a metro foron avanzando completando varias etapas do Camiño desde Francia. Todos os grupos lograron alcanzar os 400 kms e a marca deste curso quedou en 540 kms.

Pero queriamos que o alumnado vivise e sentise o Camiño de verdade polo que fixemos unha etapa do Camiño, a que sae de Arzúa e chega a Pedrouzo. Así o 28 de marzo, nun día cun sol estupendo e cunha temperatura marabillosa para camiñar puxémonos a percorrer a ruta de sendeirismo máis importante do mundo. Os primeiros quilómetros avanzamos moi a modo xa que enseguida o Camiño nos envolveu coa súa tranquilidade. Despois dunha parada para repor forzas continuamos a maior ritmo e puidemos realizar 15 quilómetros de percorrido. A maioría queriamos chegar até Santiago, pero a falta de tempo non nos deixou seguir. Así que desde o Departamento de E.F animámosvos a que completes o teu camiño e sempre o fagas en boa compañía. Aquí vos deixamos un pequeno recordo deste día.

                                                 Grazas a tod@s por participar!

Actividade enmarcada dentro do contrato-programa de innovación educativa Edu saúde.
De novo saímos de ruta, esta vez co alumnado de 3º de ESO. A ruta elixida foi o Camiño Portugués no tramo: Valga Padrón. Tivemos un día magnífico con algo de frío ao principio, pero grazas ao bo ritmo que levamos pasóusenos rapidamente.
Tod@s quedamos con ganas de seguir até Santiago, Cando imos?....

O alumnado de 1º eso visitou os días 23, 24 e 25 de xaneiro a  potabilizadora e depuradora de augas de Vilagarcía. Nesta visita se lles ensinou como se prepara a auga para o consumo da poboación e como se trata despois para devolvela ao medio.

Preme na imaxe se queres ver máis fotos da visita

Os departamentos de Lingua Galega e Ciencias Sociais organizaron unha saída a Lugo para todos os alumnos de 1º de ESO. Como somos tantos, tivemos que repartirnos: os de B, C e D irán o martes 21 de abril, pero os de A, E e F xa nos adiantamos unha semana!

Pola mañá estivemos na cidade e dividímonos en dous grupos: mentres un ía ao Museo, o outro visitaba a cidade. Vimos a catedral e o máis importante da parte vella, pero o máis interesante foi o paseo pola Muralla Romana... aínda que non todos foron capaces de percorrela completa! No Museo, organizáronnos unha competición de preguntas sobre o libro de medo que lemos no segundo trimestre, así que tivemos que percorrer unha chea de salas nós sós. E ata houbo premio para o grupo gañador! Alí había de todo: cadros, restos castrexos, un descomunal mosaico romano, moedas, unha cociña tradicional... Menos mal que non nos saíu ningún dos espectros nin asasinos do libro, a pesar de que algúns puidemos entrar en zonas prohibidas.

Á tarde, despois de comer e descansar as pernas da camiñada pola Muralla, o autobús levounos ao castro de Viladonga, onde nos puxeron un vídeo breve e despois nos levaron a unha visita guiada polos restos arqueolóxicos escavados. Subimos ao alto dos muros defensivos e andamos entre as vivendas do recinto fortificado. Ah, e tamén tivemos que facer outro caderniño no centro de interpretación para levarlle á profe de Sociais.