IES Poeta Añón

No IES desfrutamos este xoves 23 de febreiro, día do Aniversario da nosa poetisa, cunha variada proposta de actividades para a totalidade do alumnado de ESO que se desenvolveron no patio interior durante as dúas últimas sesións. Tamén houbo agasallos, coma as bolsas de Rosalía, cortesía do Concello de Outes.

 Ademáis puidemos degustar o Caldo de Gloria feito desde a Cafetería, coa axuda de Rosi Hermo e a colaboración do alumnado do noso Equipo de Dinamización da Lingua Galega. Caldiño que soubo a GLORIA (con boliños do pote ben sabedores)!

Compartimos algunhas das instantáneas tomadas durante a mañá:

Hoxe tivemos o privilexio de asistir a un dos Entroidos máis talentosos dos últimos anos no noso instituto.

Comezamos cunha fantástica merendola grazas a colaboración das familias

Despois puidemos ver moitas actuacións preparadas por alumnado de todos os cursos...

O alumnado da ESA do IES xunto con algún parente, parte do profesorado e do persoal non docente do centro, fixemos unha excursión ao noso concello veciño, Muros. A técnica de turismo deste, María, falounos dos restos prehistóricos que podemos atopar alí, explicounos o funcionamento do muíño de mareas do Pozo do Cachón, a historia do Museo do Mar e a estrutura e organización do núcleo antigo da Vila de Muros. Todo isto, aderezado de curiosidades varias e sorprendentes, fixo que a visita resultara moi entretida e interesante. Xa temos ganas de outra!!

O pasado 27 de xaneiro achegámonos á Casa da Cultura para asistir á representación de HOTEL CANTERVILLE, unha obriña en inglés traída a Outes por FACE2FACE. que parece que gustou a tódolos asistentes. Lara de 1ºA e Ryan de 4º foron as estrelas da función nos papeis de Mr. Orange e Bob. Xunto a eles,  Cayetano de 1ºA e Iván de 2ºB cumpriron moi ben a súa tarefa de facer de "elevator" do hotel.

Aquí tedes algúns dos momentos da actuación.

O Departamento de EPVeA segue a colaborar co Proxecto de Talentos de Outes, no marco dese proxecto o alumnado de 4º de ESO visitou o Centro ocupacional de ADISBISMUR para preparar unha nova curta sobre o talento dos usuarios do centro que desenvolven múltiples actividades.

O noso alumnado participará nun obradoiro de cestaría a cargo de usuarios de ADISBISMUR o próximo mes de marzo.

Estamos IMPACIENTES!

Para ver máis fotos visita o FACEBOOK da asociación https://www.facebook.com/adisbismur/

Pinchando en cada unha das imaxes poderedes ver os magníficos cortos-entrevistas que o noso alumnado fixo sobre estes catro TALENTOS DE OUTES.

MOITÍSIMAS GRACIAS AOS CATRO POR PRESTARSE A ESTA INTERESANTE ACTIVIDADE!

O ALUMNADO DE 4º QUE VAIA INICIAR BACHARELATO OU FP NO VINDEIRO CURSO 23-24 DEBE FACER A RESERVA DE PRAZA PARA O CENTRO NO QUE QUEIRA MATRICULARSE.

Máis información pinchando na seguinte imaxe. 

O alumnado de 4ºESO foi recibido no pazo das Torres do Allo, situado no Concello de Zas, que pasa por ser o máis antigo de Galicia, aínda que non teña o mérito de ser o exemplo de propiedade fidalga mellor conservada. Os seus elementos: a capela, o pombal, as terras, as casas das familias labregas…foron deslindándose co pasar do tempo. Mais é iso precisamente o que nos permite explicar a vida cotiá durante o Antigo Réxime en Galicia e o seu final. Visitar espazos patrimoniais axuda a entender mellor a nosa Historia

O alumnado de 2ºESO participou dunha saída didáctica para visitar o castro de Viladonga e Lugo. En primeiro lugar, participaron nun obradoiro de arqueoloxía no que se familiarizaron co entorno dun xacemento arqueolóxico e elaboraron o seu caderno de campo medindo estruturas e lanzando hipóteses a partir dos restos encontrados nelas. A seguir, e guiados polo persoal do Museo do Castro de Viladonga, puxeron en común as súas ideas que non ían nada desencamiñadas. Temos bos e boas investigadoras no grupo!

Despois do xantar, completamos este percurso no Lugo romano para entender que foi alí onde dúas culturas se encontraron e influíron mutuamente. Comprobámolo na sala de exposicións Porta Miñá sobre a construción da cidade e a súa muralla. Despois, na Domus do Océano, baixamos ao rocho dun edificio da zona histórica para observar os alicerces dunha casa patricia inmensa, moi decorada e con calefacción!

O alumnado completou unhas tarefas sobre estes contidos e acabamos a xornada camiñando parte da muralla, que é Patrimonio da Humanidade desde 2000 por ser o mellor exemplo de fortificación do final do Imperio romano conservado en Europa.