O xoves 7 de xullo publicaremos, na cristaleira interior do centro, as listaxes de alumnos/as que teñen dereito ás axudas para adquirir libros de texto e material escolar (1º e 2º Primaria) e os admitidos no fondo de libros (3º a 6º de primaria e 1º a 4º da ESO). As reclamacións a estas listaxes poderán facelas nos dous días seguintes á publicación é dicir, o 8 e 11 de xullo, despois deses días non se admitirán reclamacións. Deberán achegarse ao centro para consultar as listaxes, nelas figura o/a alumno/a que solicitou participar no fondo de libros co número de libros que recibirá en préstamo e no caso de 1º e 2º de primaria as axudas que recibirá. Os vales de material para todos os cursos entregaranse neses días. Os que non sexan recollidos entregaranse en setembro.
As listaxes definitivas cos libros que recibirá cada alumno/a publicarase o martes día 12.
O horario de atención ao público é de 10:00 a 13:00 horas.
LISTAXES PROVISIONAIS DO FONDO DE LIBROS PARA O CURSO 2022-2023
LIBROS DE TEXTO 22-23
Nos enlaces poden acceder ás listaxes dos libros de etxto para op curso 22-23:
XORNADA DE PORTAS ABERTAS 21-22
O alumnado de 2.º de EP centrou o seu proxecto na saúde bucodental e, entre outros moitos traballos, realizou unha maqueta do interior da boca e un experimento con ósos, ovo e vinagre do que podedes ver, no enlace, unha mostra . Os resultados permitíronlle comprender mellor a causa da caries dental e a maneira de evitala.
En 4º de primaria centráronse máis no tema da alimentación saudable.
En 6º presentaron maquetas das células animais e vexetais e aparellos do corpo humano.
O alumnado de 1º de ESO presentou as súas maquetas de ciencias naturais.
En 2º, 3º e 4º de ESO tamén expuxeron as maquetas de Tecnoloxía e montaron as cúpulas de Leonardo.
O alumnado de primaria elaborou instrumentos musicais feitos con material de refugallo e tamén traballos "bilingual" por parte da mestra de inglés.
Houbo tamén concursos de "Rosco das Partes do Corpo", xogo interactivo con preguntas sobre a temática do proxecto anual, stand de tatuaxes realizados polo alumnado de 4º de ESO, sesións de photocall do cal tedes mais info no noso Facebook.....
Tamén contamos con recomendacións e empréstito de libros da biblio para o verán.
VÍDEOCLIP 2022
Este é o vídeoclip " NON TES PREZO" deste curso 21-22 realizado polos departamentos de Música, Debuxo e Lingua Galega...e, por suposto, polo noso marabilloso alumnado de 4º de ESO!!!!!
XENIAL!!!!. ESPECTACULAR!!!!
PARABÉNS A TOD@S!!!!
"NON TES PREZO"
DÍA DAS LETRAS GALEGAS
Celebramos o Día das Nosas Letras con recitado de poemas de Florencio Delgado, música e baile. Alumnos e alumnas do centro ensaiairon os diferentes pasos para despois ilustrarnos e guiarnos a tod@s o día da celebración. Outro grupo de alumnado ensaiou as cancións para tocar. Foi o noso "Airiños de Baleirón". A tod@s eles e elas moitas grazas polo esforzo realizado e polo gran traballo que fixeron!!!.
Momento do ensaio
A celebración foi un éxito e, o mellor de todo, divertida, moi divertida!!. Na galería de fotos e vídeos poderedes ver canto desfrutamos.
Tamén tedes máis info e podedes ver vídeos do recitado no noso Facebook:
IV CONCURSO DE POESÍA MATEMÁTICA
IV CONCURSO DE POESÍA MATEMÁTICA
Un ano máis celebramos o día 12 de maio, día escolar das matemáticas, o noso concurso de poesía. Queremos felicitarvos pola calidade das obras presentadas, cada ano facédelo mellor, é un auténtico pracer lelas!
As persoas gañadoras do IV Concurso de Poesía Matemática do CPI Eusebio Lorenzo Baleirón son:
1º PREMIO- “AUSENCIA” Samuel Baleirón Torres 4º ESO
AUSENCIA
Dende a suave forma dos teus beizos
ata o volume da tua face.
Todo iso desapareceu
sen fórmula posible que o explique.
E sen calculalo nin cotexalo , descubríchenos,
descubríchenos ese espazo que ocupabas
ese espazo, que agora chamo vacío
que por moito que tente, parece que é infinito.
Samuel Baleirón Torres. 4º ESO
2º PREMIO- “90, 60, 90” Naira Ferreirós Bustelo 3º ESO A
90, 60, 90
90, “se tes máis de 90 centímetros pareces un home”; ela puxo roupa frouxa
60, “se tes máis de 60 centímetros estás gorda”; ela deixou de almorzar
90, “se tes menos de 90 centímetros, estás moi delgada”, ela púxose a chorar
Agora tenta esquivar os espellos para que non a devoren.
Naira Ferreirós Bustelo. 3º ESO A
3º PREMIO- Temos un empate entre:
“DOUS” Laura Mariño Bello 3º ESO A
DOUS
Dous ollos, dúas orellas
e ata dous buratos no nariz!
Dous perfectos beizos que serven para sorrir.
Dúas pernas e dous brazos,
catro extremidades para nos mover,
convosco podo dar abrazos,
e ata cansarme de correr!
Dous, que número tan máxico,
tan bonito para min,
sen ti nada sería posible,
non podería vivir.
Laura Mariño Bello 3º ESO A
“O CORPO” María Rodríguez Romero 4º ESO
O CORPO
O corpo non é matemática redonda.
Parecería máis un número irracional
ou unha fórmula sen demostración descuberta.
O corpo non é matemática
porque inventou un sistema que permite medir
as bágoas, os berros e os sorrisos.
O corpo non é matemática
porque por moito que aprenda dos gráficos
segue xogando co valor do improbable.
O corpo non é matemática
porque aínda que mido 1 metro 65,
son capaz de tocar as estrelas.
O corpo non é matemática.
Porque é o único capaz de operar
e ver a beleza
do Syntax Error.
María Rodríguez Romero. 4º ESO
ENLACE ÁS POESÍAS PARTICIPANTES
O alumnado tamén recitou e gravou o recitado das poesías nuns audios que podedes escoitar accedendo ao enlace:
2º POSTO NO CLUB DE DEBATE 21-22
Un ano máis o noso alumnado de 3º e 4º de ESO acada éxitos no Club de Debate!!!!. Traballazo fantástico do alumnado e das profes implicadas que rematou co 2º Premio na final do club de Debate que se celebrou o venres día 6 de Maio en Pontevedra. PARABÉNS !!!. Estamos moi orgullos@s de tod@s vós!!!
Enlace a O NOSO EUSEBIO
NON Á GUERRA
Hoxe, persoal docente, non docente e alumnado participou nun acto en contra da guerra, non só a actual guerra en Ucraína, tamén en contra de calquera conflito bélico que no século XXI xa non debería ter cabida.
A actividade consistiu no visionado do vídeo realizado no propio centro no curso 2016-2017 (Non, non, non!) e a lectura de textos seleccionados por alumnado de 4º de ESO procedentes do libro de Erich Maria Remarque que leva por título " Sin novedad en el frente".
SAÍDA DE PRIMARIA
Hoxe, o alumnado de primaria, realizou unha saída didáctica organizada pola Comunidade de Montes Cruz de Avelán na que visitaron os petróglifos de Bouza Badín donde a arqueóloga Nerea lles explicou os motivos gravados na pedra. Tamén fixeron unha plantación de frondosas donde Verónica, a axente forestal a cargo da zona onde está situada a masa forestal desta Comunidade de Montes, faloulles de prevención de incendios.
Nos petróglifos Nerea, Elena e Darío,arqueólogos da Sociedade Cooperativa Galega Árbore Arqueoloxía e Restauración de Campo Lameiro que fixeron unha brillante presentación dos petroglifos para os nenos, explicaronlles a importancia desta parte do noso patrimonio desde hai 4000 anos, alá na idade do bronce. Puideron observar motivos xeométricos, animais, puntos, círculos que aparecen representados nas pedras. Nerea contoulles que a mellor hora para visitalos é ao amencer ou ao anoitecer xa que a luz é máis axeitada para recoñecer as formas e que a mellor técnica é utilizando un espello. Tamén viron algún petróglifo medieval e escoitaron a lenda do cabalo do apóstolo Santiago, que pisou nas pedras de Bouza Abadín.
Elena aprendeulles a facer lume con seixo e pirita e con madeira de hedra e Darío explicoulles como é o proceso de estudo e conservación dos petróglifos.
Durante a plantación desfrutaron dando unha oportunidade de crecemento a varias árbores que tan xenerosamente nos regalou a Escola de capataces forestales de Lourizán, e recibiron unha moi interesante charla sobre prevención de incendios forestais grazas a membros do Distrito forestal de Noia que axudaon coa plantación e lles ensinaron aos nenos e nenas como funciona unha motobomba.
Unha vez rematada a xornada foron merendar o parque da Cruz do Avelán.
Todo isto, mentras gozamos da marabillosa contorna que temos en Dodro.
GRAZAS A TOD@S POLA VOSA COLABORACIÓN!!!
- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- …
- seguinte ›
- última »
