O alumnado de Economía de 4ºESO participa neste curso no Concurso do programa "Segura-mente" de ABANCA, en colaboración coa Consellería de Educación da Xunta de Galicia e consistente na presentación dunha idea de negocio.

Recentemente abriuse o prazo de votación popular para ser escollido entre os mellores proxectos. O alumnado de 4ºESO A solicita a vosa axuda para conseguir ese obxectivo. Por favor, clica no seguinte enlace e vota a opción de 4ºA (a que ten máis votos). Á hora de votar ides recibir un correo de confirmación.

Non esquezades confirmar o voso voto!!

Moitas grazas pola vosa colaboración!

Durante estas semanas, os andadeiros da planta baixa do IES Pedras Rubias acollen diversas maquetas e réplicas de poboados castros feitas polo alumnado de 1ºESO, plasmando así nunha tarefa práctica os coñecementos teóricos adquiridos na materia, combinando saber e creatividade.

Desde o Departamento de Xeografía e Historia queremos salientar e felicitar aos participantes polas súas fantásticas creacións.

 

O pasado luns, 7 de febreiro, os departamentos de Ciencias Naturais e Ciencias Sociais iniciaron unha campaña de recollida de tapóns, acompañada dunha actividade motivadora para o alumnado de 1º ESO, consistente na elaboración con eses mesmos tapóns, de frases, expresións ou símbolos relacionados coa defensa e coidado do Medio Ambiente.

Desde o IES Pedras Rubias queremos concienciar e colaborar na tan necesaria loita contra a degradación medioambiental e a prol dun modelo de desenvolvemento máis humano e sostible, así como agradecer o labor do profesorado e alumnado implicado.

O profesorado e alumnado de Cultura Clásica de 3º ESO quixo facer a súa particular homenaxe ao mundo dos deportes no mundo clásico, adaptando e competindo nalgunhas disciplinas deportivas, como se dunhas Olimpíadas gregas ou duns Ludi romanos se tratase.

Desde o Departamento de Ciencias Sociais queremos agradecer ao alumnado pola súa implicación e participación nesta tan entretida e divertida actividade.

"La Llama Olímpica inmortal

cuyo faro ilumina nuestro camino

engalana corazones con el fuego de la esperanza

en este día transcendental."

Himno Olímpico.

O luns 20 de decembro o alumnado de 1ºESO asistiu no salón de actos do instituto a unha charla sobre o Paleolítico na contorna de Salceda de Caselas, impartida pola arqueóloga e investigadora Rosa Villar Quinteiro e o tamén arqueólogo e veciño caseleiro Xosé Manuel Suárez. Apoiándose en materiais líticos e óseos orixinais e réplicas, os ponentes explicaron ao alumnado conceptos básicos do proceso evolutivo da hominización, así como interesantes aspectos relacionados cos modos de vida deses primeiros homínidos. A charla celebrouse aproveitando a recente descuberta de restos líticos paleolíticos - posiblemente vinculados aos grupos humanos nómades do xacemento das Gándaras de Budiño - nun noiro próximo ás obras da senda peonil na chamada "Recta de Parderrubias".

Desde o Departamento de Xeografía e Historia e en nome de todo o instituto gustaríanos agradecer a Rosa e Xosé Manuel polo seu labor, así como agradecer o dinamismo e interese da súa charla. Iniciativas deste estilo son fundamentais para que a rapazada coñeza algo máis da Historia da súa realidade máis próxima e cotiá.

O pasado 30 de novembro recuperouse unha tradición tristemente alterada pola pandemia e o alumnado de 4ºESO do instituto, xunto coas súas compañeiras/os dos IES da veciña localidade de Tui - Indalecio Pérez Tizón e San Paio -, protagonizou unha homenaxe aos coñecidos Mártires de Sobredo, vítimas da loita antiforal, no 99º aniversario do seu asasinato a mans da Garda Civil, no marco da protesta contra o pagamento dos foros.

A través da lectura de poemas e textos da época, as comunidades educativas destes institutos quixeron lembrar este triste e sanguento episodio, piar fundamental na Historia de Galicia no século XX.

"[...] nos agros de Sobredo frorecéu unha rosa!

¡Ardente e sanguiñenta, agoira Libertade!"

Ramón Cabanillas, Sobredo (1926).

A pasada semana o alumnado de 1ºD e 1ºE contou coa “visita virtual” de Henrique Alvarellos, quen falou sobre a labor do editor con motivo da publicación do libro Eugenio Granell: regreso de un surrealista exiliado. Violeta González, autora da obra e profesora deste centro, presentounos ao seu protagonista e as fantásticas pinturas e esculturas que realizou.        

10 e 11 de maio.  Como xa é tradicional,  neste mes visitamos Pegullal, Avalle e Picoña, os nosos pazos: espazos privados abertos polos seus propietarios  para nós; deferencia que agradecemos.

      Móvenos o desexo de coñecer ben os elementos patrimoniais do noso entorno, de familiarizarnos coa arquitectura pacega (complexos que conxugan ben a construción residencial con áreas de lecer, edificacións funcionais e aspectos simbólicos de relevancia)  e imaxinar o modo de vida fidalgo nos séculos de apoxeo, así como percibir o significado da súa decadencia e as diversas estratexias e situacións actuais de conservación ou recuperación dos edificios; ao mesmo tempo é ocasión inmellorable para introducirnos na heráldica.

             A visita foi unha situación, un intre, de aprendizaxe (recollemos datos, anotamos detalles, inscricións...), pero tamén de convivencia, axudados polo bo tempo primaveral.

            Por segundo ano, faltábanos a presenza querida do profesor Manuel Prego Español, experto guía que nos acompañou en tantas ocasións, ilustre e apaixonado defensor e divulgador das nosas antigüidades; amigo xeneroso. Recollemos de seguido un debuxo do Pazo de Picoña feito por el, o mestre das matemáticas, e que xa hai anos llo regalara ao instituto

“Todo se ha dormido.

Se ha dormido todo. La ventana. Y la nieve en la ventana (...)”

(Joseph Brodsky)