Programamos unha ponencia sobre as altas capacidades. Olalla Méndez Arias, orientadora, axudaranos a coñecer e comprender mellor as altas capacidades para contribuír ao desenvolvemento intelectual, social e emocional dos nosos adolescentes. Saberemos como detectar as altas capacidades, como evolucionan e como atendelas ao longo da vida.
Conferencia aberta a todas as familias de adolescentes ou preadolescentes. É preciso anotarse chamando ao 982 87 01 02.
Non faltedes á cita. Vémonos na biblioteca do IES Perdouro.
O alumnado de Xeoloxía e Ciencias Ambientais de 2º de Bacharelato leva preparando nas últimas semanas breves pílulas formativas para explicarnoss de maneira doada algúns dos conceptos que estudan na aula.
Con estes experimentos e exposicións gráficas entenderemos moito mellor a Xeoloxía e as Ciencias Ambientais. Grazas polo voso labor de divulgación.
Aquí están os últimos vídeos que prepararon para explicarnos a densidade, a presión e a illa de calor:
O martes 7 de maio, ás 17h00 inaugúrase a exposición anual da Microrrede de Bibliotecas Escolares PLAMBE da Mariña á que pertencemos.
As obras que aí se presentan brinda unha pequena homenaxe a Ibañez, humorista gráfico creador de Mortadelo e Filemón.
O cartel é obra da alumna de 2º de bach de Arte do IES Monte Castelo, Laura González Freire que agradecemos por brindarnos a portada que abre as portas ao noso traballo colaborativo.
A exposición conta con 20 cadros e dun cómic artístico colaborativo, un por cada biblioteca da Microrrede, e poderá verse no salón multiusos do Concello de Viveiro de 18h a 20h do 7 ao 10 de maio de 2024.
O pasado xoves catro de abril tivemos o pracer de recibir o renomeado xeólogo Fran Canosa no noso centro para que nos impartira unha agradable clase. Nela explicou, a fume de carozo e de xeito ameno e exemplificado, as propiedades dos minerais. Non era a primeira vez que se realizaba unha actividade con este xeólogo, quen destaca tanto polo ensino como por ser un bo divulgador e defensor do patrimonio xeolóxico.
O taller foi impartido no laboratorio para o alumnado de primeiro da ESO e para o de Bioloxía de segundo de Bacharelato. Cabe destacar as capacidades pedagóxicas do xeólogo, pois explicaba dun xeito tal que os pequenos comprendían perfectamente propiedades mineralóxicas que sorprenderon ata aos máis maiores, profesorado incluído.
Fran, despois de deixar ben clara a diferenza entre rocha e mineral, explicou o hábito, a dureza, a cor da raia o brillo... e as propiedades que máis chamaron a atención: a fluorescencia e a fosforescencia. Sempre de xeito interactivo e cunha peza a disposición para exemplificar cada unha das explicacións, porque o alumnado científico do centro quere convencerse a base de probas.
A Microrrede de Bibliotecas Escolares Plambe da Mariña rinde este ano unha especial homenaxe a Francisco Ibañez. A exposición conxunta que se celebrará en Viveiro no 7 ao 10 de maio leva por título 13 rúa da Microrrede, coincidindo coa edición nº 13 da exposición.
No IES Perdouro, quixemos plasmar nunha viñeta os protagonistas da familia Trapisonda de Ibañez. Para iso, inspirámonos do traballo da artista galega de banda deseñada, Bea Lena, recén galardoada no Festival de BD de Angoulème coa súa obra Corpo de Cristo. Ela borda os seus debuxos en formato téxtil.
Un grupo de alumnado de 4º ESO confeccionou empregando a técnica das arpilleras (cosendo a man e a máquina, bordando e planchado) os elementos que iban a compoñer a viñeta de 95cmx75cm. Os retais foron doados por Arranxos a quenes agradecemos moito a súa xenerosidade. En definitiva, fixemos un traballo cooperativo de custo cero.
Tamén participamos cunha viñeta nunha tira cómica colaborativa, Supermariña e Martiño, entre os 20 centros que forman a Microrrede. O resultado final desta aventura podera verse na exposicón da Sala de Multiusos do Concello do Viveiro.
Ademais, temos feito uns xogos para medir os teus coñecementos en canto a personaxes de BD. Aceptas o reto? Adiante.
Imos rematar o Día do Libro facendo unha humilde homenaxe ao noso cabaleiro andante máis universal e ao seu autor, a don Quixote da Mancha e a Cervantes. O alumnado de 1º de bacharelato leu os capítulos máis recoñecidos desta obra cume da literatura española e fixeron unha breve representación dos feitos que don Quixote e Sancho Panza viviron por todos aqueles lugares polos que pasaron.
En 3º de ESO, este mesmo alumnado imaxinara e creara uns Quixotes do s. XXI. Eses traballos gardáronse e, neste curso, no que ese alumnado está cursando 1º de bacharelato, recuperamos os Quixotes modernos, do noso século, e fixémoslles vivir as andanzas do Quixote de Cervantes. Eiquí vos amosamos o primeiro traballo presentado.
Noelia Paz Blanco e Elena Pumares Dorado, alumnas de 1º BAC A, recrearon o capítulo do Quixote de Cervantes no que o escudeiro de don Quixote, Sancho Panza, envía unha carta e uns agasallos á súa dona, Teresa Panza, que quedara na aldea coa súa filla. Nesa carta, Sancho cóntalle á súa familia que xa é governador da súa tan ansiada ínsula, feito que non é máis ca unha argallada máis que lle fan os duques que os acolleron.
Pero, Noelia e Elena foron máis aló do capítulo de Cervantes. O seu don Quixote, o seu Sancho Panza e a súa Teresa Panza viven no s. XXI. Trátase de don Quixote da Lúa, un Quixote creado e ilustrado por unha exalumna do centro, Shiva, ao que lle demos á palabra neste fermoso traballo. O vídeo é caseiro, pero o contido é marabilloso. A interpretación e a recreación de Noelia e Elena son magníficas. Non perdades detalle destas personaxes quixotescas adaptadas ao noso tempo, sen perder, en ningún momento, a esencia cervantina.
Mª José Andión Fontela - Profesora de Lingua e literatura castelá
O alumnado de 2º ESO preséntanos a súa vida en libros. Coa axuda da súa profesora de Lingua Castelá, Mª José Andión, elaboraron maquetas ou murais nos que colocaron nunha árbore os libros que influíron neles desde a súa máis tenra infancia ata a actualidade. Logo teñen que expoñer esas lecturas emocionantes aos seus compañeiros de clase.
As árbores están expostas por distintos lugares do centro. Son unha preciosidade!
Convocamos os Concursos anuais da Asociación Cultural Os Matos.
Buscamos os mellores traballos de poesía, relato curto e debuxo que exploren a temática das viaxes, das travesías tanto emocionais como físicas. Compartide a vosas experiencia ou botade a voar a vosa imaxinación.
Tedes ata o 20 de maio para participar.
Entregaremos dous premios en cada categoría.
Lembra: en lingua galega.
XVII Concurso literario + de relato curto + de poesía
Tamén estamos á procura dos mellores debuxos ou composición fotográfica de temática libre para a portada e contraportada da revista escolar Maruxía n°30.
Tedes ata o 20 de maio para participar. Lembra: en lingua galega.
O xoves 11 de abril de 12:00 a 13:00h terá lugar na Casa da Cultura o recital da poeta Lúa Mosquetera que estará acompañada polo músico Pablo Seijas e da súa guitarra.
Lúa Mosquetera (Miño, 1988) é graduada en Lingua e Literatura Galegas pola USC. Conta con dous poemarios autoeditados: Rasrás (2018) e Aunque seas rara y seas pájaro(2020). O seu terceiro poemario escribiuno en galego e titúlase Espíderman (Galaxia, 2022). Un dos poemas incluídos neste libro, "Anorak de pel de caribú", mereceu o premio ARitmar de Mellor Poesía da Galiza 2021. Ese mesmo ano foi campioa do Poetry Slam galego e finalista do campionato nacional. ¡Yo vivo!é a súa primeira novela.
A súa linguaxe é directa e incisiva e a súa forma de recitar non deixa indiferente. Insírese no "Spoken word", que fusiona poesía con música ou teatro e ao que fai gústalle chamarlle recital acústico.
É ademais artista que decora pratos con mensaxes poéticas e inspiradoras, imparte talleres de bordado e tamén de escritura.
A raíz da primeira actividade da Semana do Benestar Emocional e a Convivencia, Ana Lestao (alumna de 4º ESO) e Yolanda Fernández (coordinadora de benestar e convivencia do IES Perdouro) foron entrevistadas en Radio Cope.
AQUÍ tedes o enlace no que podedes escoitar a entrevista. Nela resumen a temática da charla de resiliencia da fisioterapeuta Raquel Marqués e informan sobre o resto de actividades preparadas para esta semana.
Hoxe celebramos a carreira "La vuelta al cole" contra a leucemia infantil promovida pola Fundación Unoentrecienmil.
O noso alumnado de 1º e 2º ESO e algúns membros do profesorado percorreron o circuíto ata facer 448 voltas, co que conseguiron 448 €. O grupo que máis voltas conseguiu foi 1º ESO A con 91 voltas e, individualmente destacaron Sofía Ben, Óscar Fustes, Iago Maseda e Lucas Basanta que deron 6 voltas ao circuíto.
Á contía anterior súmase o resto da recadación reunida e a aportación económica da ANPA. En total son 860 € os que enviaremos á fundación para que a investigación sobre a leucemia infantil continúe avanzando.
Moitas grazas polas vosas ganas de colaborar e pola vosa xenerosidade.
Este venres 5 de abril de 10:00 a 11:00h celebrarase no IES Perdouro a carreira solidaria contra a leucemia infantil correspondente ao curso 2023-24.
O alumnado de 1º e 2º ESO, profesorado e persoal non docente está convocado a participar na carreira que contará coa axuda do CM de Xestión Administrativa na súa organización.
Pídese ás familias que actúen como patrocinadores e aporten os seus donativos. Cantas máis voltas se dean ao circuíto que se establecerá no camiño dos Colexios, maior será a doazón para a Fundación Unoentrecienmil.
Esta fundación leva dez anos aportando fondos para a investigación contra a leucemia infantil, que é o tipo de cáncer máis frecuente durante a infancia. Avanzouse moito durante estes dez anos e queremos que o avance sexa o máis rápido posible. Fixéronse cambios no protocolo de tratamento da leucemia infantil en toda España e agora sabemos que o deporte axuda á curación, que a leucemia ten un compoñente xenético e que isto pode favorecer a prevención.
Corremos por unha boa causa. Colabora con ela enviando o teu donativo ao centro a través da túa filla ou fillo ata o venres 5 de abril.
Contaremos coa psicóloga Nuria Revuelto Crespo para abordar a comunicación cos adolescentes. Esta actividade insírese no programa Lectura e Familias e tamén dentro da celebración da I Semana do Benestar Emocional e a Convivencia do IES Perdouro.
A especialista en Educación Emocional impartirá un obradoiro destinado a nais e pais para a adquisición de habilidades e competencias persoais e emocionais no ámbito familiar dos adolescentes co obxectivo de reducir os conflitos e mellorar a convivencia xestionando de forma apropiada as emocións negativas e aprendendo a xerar emocións positivas.
Aberta a todas as familias de adolescentes ou preadolescentes. É preciso anotarse chamando ao 982 87 01 02.
Non faltedes á cita. Vémonos na biblioteca do IES Perdouro.
Mañá venres 22 de marzo acaba o prazo para a recollida de pilas. Traede todas as pilas e baterías de litio que poidades e vádeas depositando na caixa da aula ou botádeas directamente no colector de diante de conserxería.
O venres 22, titores ou delegados, como vós acordedes, debedes encargarvos de levar as pilas da aula á entrada do edificio 1, diante de conserxería.
A organización do concurso pasará polos centros para pesalas como o curso pasado.
Programamos unha ponencia sobre as altas capacidades. Olalla Méndez Arias, orientadora, axudaranos a coñecer e comprender mellor as altas capacidades para contribuír ao desenvolvemento intelectual, social e emocional dos nosos adolescentes. Saberemos como detectar as altas capacidades, como evolucionan e como atendelas ao longo da vida.
