Curso 2023/24
3º ESO_4º ESO_EduReferentes
15.01.2024
O 15 de xaneiro tivemos o pracer de contar no noso centro co Proxecto EduReferentes que ten como finalidade achegar ao noso alumnado, información e acompañamento para facilitar o seu coñecemento sobre o mundo laboral, dende unha perspectiva de xénero.
Con tal motivo tivemos a visita da Directora xeral de Ordenación e Innovación Educativa; Judith Fernández Novoa e a Xefa Territorial de Lugo Sagrario Sánchez Ramil, acompañando a Carla Reyes Uschinsky, presidenta de Executivas de Galicia e a Susana Pérez Crespo coordinadora do programa.
Nesta ocasión tivemos o pracer contar cos testemuños de grandes referentes nos seus respectivos ámbitos laborais, mil grazas e unha forte aperta para Isabel Aguirre e Marivi Iglesias.
O alumnado que acudiu aos relatorios foi o de 3º ESO e 4º ESO, o cal gozou moito da experiencia. Unha vez rematados os relatorios, o alumnado de 3º ESO participou nun taller do proxecto.
O 1 de marzo tiveron lugar as sesións de mentoría individualizada co alumnado seleccionado de 3ºESO da man de Mariví.
Pica AQUÍ para ler a notica na web do Portal Educativo - Xunta de Galicia.
1º Bacharelato_2º Bacharelato_A Ponte entre o ensino medio e a USC_ABAU_Relatorio Maite Flores
12.01.2024
O venres 12 de xaneiro a catedrática de Física da USC e vicepresidenta da CiUGA, Maite Flores, ofreceu un relatorio sobre a ABAU e sobre a USC ao alumnado de 1º e 2º de Bacharelato. Foi moi interesante e aclarou moitas das dúbidas que o alumnado ten en relación ao seu futuro académico.
Moitas grazas ao programa A Ponte da USC e a Maite Flores por ofrecer este tipo de actividades aos centros educativos.
1º Bacharelato - 2º Bacharelato. A Ponte entre o ensino medio e a USC_ABAU. Relatorio Maite Flores
12.01.2024
O venres 12 de xaneiro dentro dos relatorios que a USC ofrece dentro do Programa A Ponte entre o ensino medio e a USC a catedrática de Física e vicepresidenta da CIUG, Maite Flores, achegouse ao noso centro para ofrecer un relatorio ao alumnado de 1º Bacharelato e 2º Bacharelato. A conferencia dividiuse en dúas partes, nunha primeira, Flores explicoulle ao alumnado diferentes aspectos da USC como os graos, master, residencias universitarias e outros temas de interese sobre esta institución. Nunha segunda parte, a vicepresidenta da CIUG explicoulles o sistema ABAU como as ponderacións, notas de corte e demais elementos relacionados co xeito de ingreso no sistema universitario.
Foron unhas horas moi ben aproveitadas na que o alumnado puido preguntar todas aquelas dúbidas que lle xurdiron ás cales Maite Flores lles respondeu con toda claridade e amabilidade.
Agradecemos á Maite Flores a súa asistencia ao IES Río Cabe e a USC por ofrecer este programa e achegar información de grande interese aos centros dun xeito ameno, directo e persoal.
CS de Guía, información e asistencia turísticas - Saídas novembro e decembro 2023
CS de Guía, información e asistencia turísticas. Saídas novembro e decemebro 2023
NOVEMBRO 2023
No mes de novembro o alumnado e profesorado do CS de Guías, información e asistencia turísticas viaxamos a Ourense para visitar Xantar, Feira Internacional de Turismo Gastronómico, asistimos ao Foro Territorios Patrimonio celebrado no Parador e participamos no Encontro territorial para a elaboración do Diagnóstico Estratéxico da situación do turismo en Galicia
En Xantar asistimos a exhibicións, catas temáticas, maridaxe, cociña en directo e outras actividades organizadas neste Encontro Internacional sobre Gastronomia saudable e sostible; ademais percorremos os distintos stands dos destinos enogastronómicos máis destacados de España, Portugal e América Latina.
Como xa é habitual participamos na derradeira edición do Foro Territorios Patrimonio celebrado no Parador de Monforte de Lemos. Nesta ocasión o programa de charlas, mesas redondas e outras actividades tivo como lema, "A Ribeira Sacra como centro do debate sobre o futuro do turismo cultural e da riqueza patrimonial como dinamizadora do territorio".
No encontro abordáronse cuestións relevantes para o devir do territoriodende un punto de vista turístico, ambiental, vinícola, patrimonial, de experiencias e da sustentabilidade.
Finalizamos as saídas do mes coa asistencia ao Encontro territorial para a elaboración do Diagnóstico Estratéxico da situación do turismo en Galicia impulsado polo Clúster de Turismo de Galicia e a Axencia de Turismo de Galicia celebrado no Centro do Viño de Ribeira Sacra.
Sentimos orgullosas e orgullosos de ter participado e aportado o noso coñecemento sobre o territorio da Ribeira Sacra para facilitar a realización dunha diagnose da situación do sector que sirva de base para deseñar a planificación turística para os vindeiros anos na que será a Estratexia do Turismo de Galicia 2014-2030.
DECEMEBRO 2023
No ciclo de Turismo comezamos as saídas de decembro cunha viaxe a Castro Caldelas, a mediados de mes asistimos a unha xornada sobre ciberseguridade organizada polo INCIBE e rematamos o mes cunha excursión a Lugo.
O miradoiro de As Penas de Matacás foi o punto de encontro para comezar a visita por terras de Castro Caldelas. Despois de gozar das vistas do Canón do Sil desprazámonos á vila para admirar o casco antigo -declarado conxunto historíco-artístico- e a fortaleza medieval de carácter militar que é o castelo de Castro Caldelas. E, por suposto, antes de marchar, degustamos a súa bica.
A ciberseguridade e a confianza dixital son dous retos importantes aos que nos enfrontamos. Por iso, INCIBE -Instituto Nacional de Ciberseguridad- puxo en marcha #ExperienciaINCIBE por toda a xeografía española. Cando lle tocou a Monforte convidáronnos e alí fomos a xogar nun escape room de ciberseguridade, xogos en liña, pílulas de ciberseguridade,… Un conxunto de experiencias interesantes que teñen o obxectivo de concienciar, educar, promover e difundir a ciberseguridade.
Rematamos mes viaxando cos nosos compañeiros e compañeiras da ESA e de BAC de adultos á capital da provincia. Comezamos cunha visita ao Centro Cultural O Vello Cárcere -unha das primeiras cárceres de España de estrutura radial-, continuamos cunha visita guiada aos principais recursos turísticos da cidade de Lugo -muralla romana, outros vestixios romanos, catedral, casco vello e Praza Maior- e finalizamos no Mercado de Nadal.
2º Bacharelato. Visita a Santiago de Compostela
21.12.2023
Para rematar este primeiro trimestre, o alumnado de 2º Bach. de Historia da Arte, Relixión e Debuxo desprazouse o xoves 21 de decembro de 2023 ata Santiago de Compostela para coñecer a súa Catedral, o Museo do Pobo Galego e o Convento de Santa Clara. A nosa primeira visita foi á Catedral: interior, fachadas do Obradoiro e das Praterías, Pórtico da Gloria e rematamos subindo aos tellados desde onde vimos de cerca o ciborio, a parte superior da fachada do Obradoiro, a Torre do Reloxo, a Cruz dos Farrapos, etc., ademais de contemplar unhas fermosas vistas da cidade que nos deixou a todos impresionados.
Tras visitar a Catedral desprazámonos ata o Museo do Pobo Galego, antiguo convento de Santo Domingo de Bonaval. Neste museo antropolóxico puidemos coñecer un pouco máis da nosa cultura popular a través de xogos. Sorprendeunos, sobre todo, a escaleira barroca de caracol diseñada por Domingo de Andrade (o mesmo que construiu a Torre do Reloxo da Catedral), única escaleira triple helicoidal do mundo, con oco central que dependendo de cal delas escollas leva a unha planta diferente. Ao saír do Museo desprazámonos ata o Convento de Santa Clara para observar a súa fachada, exemplo do barroco de placas característico de Compostela.
Unha visita a Compostela chea de coñecementos.
Torneo de Nadal 2023
21.12.2023
Aquí poderedes ver as fotos das diferentes actividades que se desenvolveron no Torneo de Nadal 2023 que organizou o Departamento de Educación de Educación Física para todos os cursos da ESO e onde tamén participou o alumnado de 1º Bacharelato. Foi unha mañá ben entretida antes do merecido descanso de Nadal.
Dende o IES Río Cabe desexámosvos un moi Bo Nadal e un próspero Aninovo!
4º ESO. Economía. Entrevista a Gonzalo Losal de Calzados Losal. De 0 a 100 A Voz de Galicia
20.12.2023
O mércores 20 de decembro de 2023 o programa "De 0 a 100" do xornal A Voz de Galicia en colaboración coa Consellería de Cultura, Educación, Formación Profesional e Universidades escolleu o noso centro para facerlle unha entrevista ao exalumno do IES Río Cabe Gonzalo Losal de Calzados Losal. Iago (director do programa "Atrápame se podes" da CRTVG) foi o encargado de guiar a entrevista onde o noso alumnado de 4º ESO da materia de Economía (impartida polo profesor Emilio López) puido coñecer de primeira man a experiecia deste empresario monfortino.
Gonzalo contounos como a empresa Calzados Losal de Monforte de Lemos deu os seus primeiros pasos ata chegar aos nosos días e celebrar no 2024 os 125 anos.
O seu tataravó estivo na guerra de Cuba e alí dedicouse a arranxar zapatos, unha vez de volta na terra el e os seus 11 fillos comezorn a fabricación de zapatos nas terras de Lemos. Anos despois, Gonzalo, logo de estudar Comercio Internacional e estar sempre en contacto co mundo da produción de zapatos, toma o liderado da empresa. Tal e como nos explicou, a produción anual é de 13000 pares de zapatos e só tivo un parón durante a pandemia, momento no cal se dedicaron a fabricar máscaras para proterxenos da Covid19.
Os seus zapatos están por toda Galicia, España e parte do estranxeiro. Persoeiros como Nicolás Sarkozy ou Florentino Pérez visten os seus pés con zapatos Losal.
Os materias empregados na fabricación dos seus zapatos proveñen de España e Europa (Italia, Alemaña e Francia fundamentalmente) e busca sempre a calidade. El mesmo nos indicou que a fabricación dun zapato pode levar entre 3 e 4 semanas.
A curto prazo queren aumentar a produción, ben é certo que as vendas en tenda física non superan as vendas por Internet, aínda que aí teñen unha ventá ao mundo moi importante. A longo prazo o seu desexo é poder vender internacionalmente e a longo prazo. O seu ránking de ventas fóra de Galicia encabézano Reino Unido, a República Checa, Estados Unidos e Canadá e vanse facendo oco na China.
Gonzalo explicoulle ao alumnado que a súa empresa está presente en varias feiras internacionais como a que se realiza en Milán ou en Düsseldorf, feito que lles abre moitas portas comenrciais.
O alumnado de 4º ESO da materia de Economía fíxolle moitas e moi interesantes preguntas que o empresario respondeu moi amablemente.
Dende o IES Río Cabe desexámoslle a Gonzalo e a Calzados Losal o mellor e que continúe levando marca galega por todos os recunchos do planeta.
- « primeira
- ‹ anterior
- …
- 5
- 6
- 7
- 8
- 9
- 10
- 11
- 12
- 13
- seguinte ›
- última »
