Benvidos ao mundo dos contos en inglés! 

Desta volta, o venres día 1, a compañía Face2Face a través do conto “Jungle fever”, levou da man aos máis pequenos ata a selva, onde coñeceron as diferentes criaturas salvaxes que alí habitan e tamén os perigos que nos podemos atopar. Tanto é así, que todo o alumnado se tivo que armar de valor para cantarlle ao “rei da selva” un arrolo, e deste xeito, poder cear tranquilos mentras a “súa maxestade” durmía. 

Os máis grandiños mergulláronse na idade de pedra coa historia “The time machine” e acompañaron a unha muller cavernícola, nunha das súas saídas de caza, na que atopou un aparello que sen máis razón que ter chafallado nel, veuse transportada ao século XXI, unha época da que descoñecía ata como vestirse, e onde o alumnado a tivo que axudar para non morrer de espanto(nin de fame), ante toda a parafernalia que esta nova época despregaba. Botando de menos a tranquilidade da súa cova, e os saborosos miolos dos monos, decidiu despedirse e voltar á súa orixe.

O máis importante é que o alumnado, despois de facer unha viaxe coa mochila cargada de fantasía e vocabulario en inglés, participaron e sobre todo.....disfrutaron!

Grazas a todos e todas. Ata outra!

O 10 de marzo publicouse no BOE a nova convocatoria de bolsas de carácter xeral para o próximo curso 2022/2023.

O prazo para presentar as solicitudes será do 30 de marzo ao 12 de maio, inclusive.

A presentación realízase a través da sede electrónica do Ministerio de Educación.

Nunha 1ª Fase preténdese realizar as comprobacións económicas.
As unidades de tramitación de bolsas revisarán os datos persoais e familiares necesarios para a comprobación da renda e patrimonio familiar e enviarán as solicitudes á Axencia Tributaria para o seu cálculo.

Nunha 2ª fase informarase os solicitantes do resultado das comprobacións económicas anteriores, dándolles un prazo para formular alegacións se procede.
Doutra banda, informarase tamén do procedemento e prazo para que poidan modificar a súa solicitude inicial, no relativo aos datos académicos.

Más información na seguinte ligazón:

https://www.becaseducacion.gob.es/portada.html

A convocatoria de axudas para alumnos con necesidade específicas de apoio educativo,publicarase despois da convocatoria xeral, a partir do mes de maio

O mar forma parte da nosa vida e da nosa cultura. 

Somos xente da costa galega e iso conforma unha particular visión do mundo.

 Mariscadoras, redeiras, mariñeiras, pescantinas, científicas mariñas, remeiras… son oficios, profesións e actividades  nacidas ao abeiro deste medio. 

Non é un mundo inamovible. Cambia coma as mareas ao longo do tempo. O esforzo e a loita destas mulleres permitiron melloras nas súas condicións, acadar un maior recoñecemento laboral, social e económico. Mais aínda queda  camiño por percorrer.

“Enredadas” pretende visibilizar e render homenaxe  a todas as mulleres, membros das familias do alumnado do noso colexio  que, dun xeito ou doutro, están vencelladas ao mar e á navegación.

 Elas comparten connosco as súas historias vitais: lembranzas pasadas e presentes, anécdotas, sentimentos e emocións…  e transmíteno dun xeito sinxelo  e cunha ollada especial;  dende o cariño con que llelo contan aos seus fillos e fillas, netos e netas… 

 Cada unha ten unha motivación e unha traxectoria única, segundo a época e as circunstancias que lles toca ou lles tocou vivir: incorporación ao mundo laboral -pasando dunha  economía máis tradicional e informal a outra máis moderna e sofisticada- ; necesidade e/ou supervivencia, afán de superación…  razóns, todas elas, que aparecen expostas ou  subxacen  nos relatos das nosas protagonistas.

Queremos agradecerlles a  xenerosidade amosada por compartir connosco, de xeito altruísta, as súas vivencias ; darnos a posibilidade de achegarnos a elas e  entendelas un pouco mellor. 

 Se deste xeito contribuímos a dignificarvos  un chisco, Mulleres do Mar, dámonos por satisfeitas!