Actividades

A noite do 27 de outubro o alumnado de 2º da ESO quedou a durmir na biblioteca do centro O Segrel do Penedo. Pasárono estupendamente pintando cabazas e monstros, desfilando nun concurso de disfraces e ata xogaron a verdade ou reto, xogo no que a rapazada mostrou unha grande valentía desenvolvendo os retos máis tenebrosos que poidades imaxinar. Despois de cear e xa máis entrada a madrugada contaron lendas e historias de medo e viron unha película espeluznante.

Unha noite inesquecible.

Os días 25, 26 e 27 de outubro tivo lugar en Silleda o evento GaliciaSkills 2023. Trátase dun campionato práctico no que alumnado de Formación Profesional de centros galegos de 24 modalidades mostran as súas destrezas e habilidades realizando diferentes probas. Os gañadores participarán no SpaisnSkills en Madrid en abril de 2024. O IES de Fene estivo representado polo alumno do ciclo dual de Instalacións de Calor, Abel Chao, titorizado pola profesora Inés Piñeiro. Abel alzouse coa medalla de prata na modalidade de Fontanaría e Calefacción.

Parabéns a ámbolos dous!!

As presentacións da ESO, bacharelato e CM ordinario e dual serán o luns día 11 de setembro, no seguinte horario

• 10:30 h. ESO (1º e 2º ESO no salón de actos "Xaquín Marín", 3º e 4º irán directamente ás correspondentes aulas) e FP Básica (salón de actos edificio FP).

• 12:00 h. Bacharelato (salón de actos "Xaquín Marín") e 1º CM (salón de actos edificio FP).

• 12:30 h. 2º CM ordinario e dual (salón de actos de FP).

O martes 12 ás 16:15 h será a presentación e comezo das clases do CM modular no salón de actos de FP. 

Con motivo do inicio de curso desenvolveranse diferentes actividades; contaremos coa presenza de Uxía Doval, exalumna do IES de Fene e compoñente do grupo Xirifeiras, e desenvolveranse charlas a cargo de Pedro Cruzado, vicepresidente da asociación Betula, e do responsable da empresa Automoción Vilar do Colo, Francisco Fernández Mascaró, tamén exalumno do IES de Fene.

Ese día o transporte escolar (ESO)  deixará o alumnado no centro ás 10:30 h. e recollerao ás 12:00 h.

O martes día 12 de setembro comezarán as clases no horario habitual.

O pasado venres 19 de maio tivo lugar o acto de gradación do alumnado da promoción 2021-2023 de bacharelato, que rematou este ano a súa última etapa no IES de Fene.  Foi un acto moi emotivo no que participaron, ademais dos propios protagonistas, as familias, profesorado, dirección e concello coa presenza do alcalde Juventino Trigo. As intervencións dos delegados, titores, alcalde e director do centro estiveron cheos de risas, recordos e bos desexos para todo o alumnado e foron moi aplaudidas. Estas intervencións remataron coa lectura do poema inédito de María Lado “Graduación” a cargo de Sonia Gómez, titora de 2º de bacharelato A, co acompañamento musical de Sara, alumna do mesmo grupo. O acto finalizou coa entrega de orlas e recordos do seu paso polo centro.

A comunidade do IES de Fene deséxalles moita sorte nas probas de acceso á universidade, que se están a desenvolver estes días, así como na nova etapa que van a comezar.

Este pasado mércores 24 de maio, o departamento de Educación Física do IES de Fene desenvolveu co seu alumnado unha xornada de deporte adaptado. Nesta xornada participou o club de baloncesto en cadeira de rodas Abeconsa Basketmi de Ferrol, que veu ao centro co material necesario para a práctica deste deporte.. Contamos coa axuda dos deportistas do equipo que lles explicaron ao noso alumnado as regras e pequenas diferencias co baloncesto que se xoga de pé e xogaron xunto a eles. 

Foi unha xornada moi emocionante e didáctica na que o alumnado puido comprobar o que supón ese cambio de perspectiva.

Agradecemos ao equipo a sua disposición para que a rapazada puidera participar nesta actividade.

Neste ano no que se homenaxea a figura de Francisco Fernández del Riego tivemos ocasión de colaborar con dúas das sociedades culturais do concello que nos invitaron a celebrar de forma conxunta esta data. O sábado 13 un grupo de rapaces e rapazas de 1º de bacharelato do noso centro acompañados polo seu profesor de Lingua e Literatura Galega e director do centro, Xoán Vázquez, fixeron unha presentación sobre a figura do autor homenaxeado. Na presentación, que leva por título "Fernández del Riego desde a perspectiva do alumnado do IES de Fene", móstrase un percorrido pola vida do escritor homenaxeado desde a súa infancia e mocidade, os seus anos universitarios, a participación forzosa na contenda civil ou a época como guionista da BBC ata a presidencia da Real Academia Galega. Durante a presentación tamén leron algunha das cartas que o autor intercambiou con Paz Andrade ou Cunqueiro así como un fragmento do libro de viaxes "Galicia".

O martes 16 pola tarde desenvolveuse esta actividade no CPS de San Valentín. O alumnado deu a coñecer a figura de Fernández del Riego a todos aqueles que se achegaron ata a sociedade cultural.

Tamén o martes pola tarde pero, nesta ocasión no noso centro, o alumnado de ESO participou nunha xornada lúdica e cultural para celebrar as nosas letras. Desenvolvéronse diversas actividades como unha xincana, proxección audiovisual, xogos de mesa e ata un minitorneo de baloncesto.

Podedes descargar algunha das actividades nos seguintes enlaces:

Xincana

As cousas de don Paco

Agradecemos á Liga de Amigos de Barallobre e ao CPS de San Valentín a súa invitación e desexamos que sexa a primeira de moitas outras colaboracións.

Imaxe de Galicia Aberta

O pasado xoves 27 de abril celebrouse en todo o país o festival Musiqueando. Esta iniciativa pretende dar visibilidade á música que se fai nas escolas e para iso o alumnado sae á rúa a tocar.

No caso do IES de Fene levamos xa bastantes anos participando nesta iniciativa da man da profesora Bárbara Mourelo e contando sempre coa colaboración do concello de Fene.

Este ano  o alumnado de 2º e 4º de ESO e 1º e 2º de bacharelato baixaron desde o instituto ata a praza do concello para mostrar aos veciños que se achegaron a velos ou que simplemente pasaban por alí, o que aprenden nas clases de Música.

Foi unha mañá marabillosa que encheu de ledicia o centro do concello de Fene.

Enlace á nova no xornal Diario de Ferrol

Hoxe no IES de Fene celebramos o I Día da Natureza. Esta celebración parte da idea de crear unha zona axardinada con árbores froiteiras e ornamentais, na finca colindante co terreo do centro, propiedade do concello, e que xuntos formaban parte dos antigos terreos do Pazo de Barallobre. Contamos para isto coa colaboración do concello de Fene que nos facilitou as árbores e asesorou e axudou na plantación.

Nesta ocasión participou o alumnado de 1º e 2º de ESO plantando unha árbore por cada grupo, unha camelia xapónica "high fragans", unha cerdeira, unha guaiaba e un mandarino clementino, co compromiso de coidalas mentres estean estudando no centro. Aproveitaron a ocasión para ler poemas que teñen como tema a natureza e a continuación disfrutaron dun tempo de diversión participando en diversos xogos tradicionais como a petanca, mariola ou o brilé.

Tamén estiveron presentes na celebración un grupo de alumnos do CM de Soldadura e Caldeiraría que nunhas semanas participarán na XI edición de Hiperbaric Challenge

O pasado martes 28 de marzo o equipo participante na IX edición da First Lego League Galicia, "Os Robots do Pazo", forón recibidos polo alcalde e membros da corporación do concello de Fene nun recoñecemento ao traballo realizado e aos logros acadados, Premio Xunta de Galicia ao Proxecto Científico e Nomemento para o National Innovation Award. Xunto ao equipo estaba a súa adestradora, a profesora de Tecnoloxía Juana Polo, os profesores de Matemáticas Laura Vilariño e Raúl Veiga, representantes da dirección e as familias dos rapaces e rapazas que forman o equipo.

O alcalde mostrou o orgullo que sinte o Concello polos logros acadados e felicitou aos rapaces e á comunidade do IES de Fene polo traballo realizado.

Enlace á entrevista a Juana Polo na Fenestra de Radio Fene

O equipo "Os Robots do Pazo", formado por alumnado de 1º, 2º e 3º de ESO do noso IES participou este sábado na First Lego League Galicia onde acadou o Premio Xunta de Galicia ao Proxecto de Innovación e foi nomeado para o National Innovation Award.

Esta competición, organizada en Galicia pola UDC, celébrase todos os anos no Campus Industrial de Ferrol e ten como eixe a robótica, pero vai moito máis alá xa que ademais de construir un robot con pezas de Lego e programalo para que cumpla unha serie de misións, sempre lanza un desafío, este ano nomeado SuperPowered, sobre o que os participantes deben investigar e desenvolver unha solución innovadora. A proposta do equipo do IES de Fene foi unha terraza "ecofriendly" calefactada con chan radiante mediante placas fotovoltaicas e bomba de calor.

Ademais de todo o anterior tamén se poñen en xogo os valores de equipo, compañeirismo, respecto entre eles e cos demais equipos e, nesta ocasión, tamén os medioambientais. Neste aspecto o equipo quixo deixar moi claro que o desenvolvemento enerxético e tecnolóxico non pode levarse a cabo a calquera prezo e resaltou a importancia de ser respetuosos coa sociedade e o medioambiente.

Cabe destacar a magnífica defensa do proxecto que fixeron os participantes, motivo polo que foron felicitados polo tribunal.

Parabéns ás rapazas e rapaces do equipo polo gran traballo que realizaron desde outubro e ao profesorado polo seu compromiso e dedicación.

Imaxe dos Robots do Pazo. Cedida por Inés Piñeiro

Enlace á noticia en La Voz de Galicia

O pasado 17 de febreiro celebramos o Entroido no IES de Fene. Despois de tres anos sen unha celebración como era costume, este ano por fin puidemos retomar actividades como o concurso de sobremesas de entroido, organizado polo EDLG, e o concurso de disfraces e comparsas. Ademais ao longo da mañá desenvolvéronse outras actividades como unha feira con diversos xogos, organizado polo alumnado de Música de 1º e 2º de bacharelato, obradoiro de pulseiras e o 1º torneo de Entroido de fútbol entre alumnado de bacharelato e FP.

Esperamos que disfrutárades da xornada.

Imaxes do concurso de comparsas. Cedidas por Eva Rodríguez

O alumnado de Francés do IES de Fene quere desexar a tod@s un bo Nadal e un feliz ano 2023.

Hoxe conmemoramos o Día Internacional para a Eliminación da Violencia contra as Mulleres e no IES de Fene tivemos a sorte de contar con Joshua Alonso Mateo e Sara Amorín para dirixir un obradoiro sobre violencia de xénero. Joshua e Sara son axentes de igualdade e realizan unha labor marabillosa formando e sensibilizando a persoas de distintos ámbitos e idades sobre a violencia machista. Foron dúas sesións emocionantes e enriquecedoras  nas que se falou de diferentes tipos de violencia, sexual, dixital, psicolóxica, a violencia do cine e as series e nas que o alumnado tivo a posibilidade de tomar parte na actividade e expoñer as súas inquedanzas e opinións.

Sentímonos agradecid@s de poder contar con persoas que traballan para vencer esta lacra e implicad@s en poñer o noso grao de area na prevención e formación sobre violencia machista das novas xeracións.

Joshua agasallounos cun exemplar do libro "No camiño do vento", un libro de poemas e ilustracións de súa nai, María José Mateo, que forma parte dun proxecto solidario que leva o mesmo nome. Ademais asinou no libro da nosa biblioteca.

A actividade contou tamén coa presenza de Mª Carmen Martínez, concelleira de Ensino, Benestar Social e Igualdade, á que agradecemos a colaboración para levar adiante este tipo de actividades e a implicación do concello de Fene na loita en prol da Igualdade

Acceso á web Sesé Mateo

Continúa o ciclo de conferencias Contando Ciencia organizado pola biblioteca O Segrel do Penedo do IES de Fene en colaboración coa concellaría de Ensino. A cita será o próximo xoves 20 de outubro no salón de actos da Casa da Cultura de Fene ás 19:30 h. Nesta ocasión o protagonista será o investigador do SERGAS Manuel Collado Rodríguez que abordará o tema  "A Procura da fonte da xuventude".

Manuel Collado Rodríguez é investigador do SERGAS no Hospital Clínico de Santiago onde dirixe o grupo de “Senescencia celular, cancro e avellentamento”. É doutor pola UAM, realizou estadías posdoutorais no Ludwig Institute for Cancer Reseach de Londres, na NYU Medical School e no Memorial Sloan Kettering Center de New York.

Manuel Collado tamén e autor de numerosos artigos de investigación en revistas científicas de alto impacto. O seu labor científico desenvolveuse fundamentalmente na área do cancro e en particular en mecanismos de supresión tumoral, fundamentalmente no proceso de senescencia tumoral. Recentemente o seu traballo trata de entender a implicación de células nai adultas en cancro e avellentamento.

A CHARLA FOI ADIADA PARA O XOVES 27 DE OUTUBRO

O pasado 8 de setembro deron comezo as clases dun novo curso xa sen as restricións que tivemos nos dous anteriores por mor da pandemia e con moitas novidades, sobre todo nos cursos impares, xa que comeza a implantarse a LOMLOE. Para inaugurar este novo curso que mellor que contar con dous exalumnos e unha exalumna do centro que desenvolven a súa actividade profesional en sectores tan diferentes como a música, a investigación ou a empresa, para que sirvan de exemplo, motivación e inspiración ás novas xeracións que se están a formar.

Primeiro foi o turno do alumnado de ESO, que encheron o salón de actos Xaquín Marín de algarabía e tamén de nervos, sobre todo por parte do alumnado de 1º de ESO que comezan etapa e chegan por vez primeira ao centro. Foron recibidos polo director, Xoán Vázquez, e por Gisela Sanmartín, pandeireteira e compoñente do grupo Xirifeiras de Fene, ademais de exalumna do centro.

Mentres, ao salón de actos do edificio de ciclos formativos chegaba o alumnado de FP básica onde eran recibdos pola vicedirectora e o xefe de estudos de adultos, Santiago Varela, quen lles informou do desenvolvemento das ensinanzas que comezan, titulacións que recibirán e das posibiladades de continuar a súa formación nun ciclo medio e superior ou incorporarse ao mundo laboral.

A continuación o alumnado de bacharelato participaba nunha charla sobre especies invasoras e a súa influencia na perda de biodiversidade, impartida por Rubén Portela Carballeira, biólogo e exalumno do IES de Fene, que a pesar da súa xuventude conta cunha ampla experiencia investigadora en diferentes pasíses do mundo.

Por último recibimos tamén ao alumnado de ciclos medios. Neste caso participaron nunha sesión con Miguel Ameneiros Vilasánchez, exalumno do ciclo de instalacións frigoríficas, emprendedor e fundador da empresa Aerofri, que narrou ao alumndo a súa experiencia no noso centro e despois como traballador e empresario autónomo.

En resumo, unha mañá chea de actividades para coller folgos e comezar unha nova andaina académica.