Alumnado de 4º de ESO de Bioloxía e Ámbito científico do IES Martaguisela participou na mañá do 13 de marzo nunha actividade consistente na recollida de residuos nas beiras do rio Sil ao seu paso polo Barco de Valdeorras. Na actividade colaboraron o Concello de O Barco de Valdeorras e a Asociación Chelonia que a enmarca dentro do seu programa Mares Circulares impulsado por Coca-Cola Europacific Partners. Cono resultado do traballo do alumnado e do profesorado acompañante recolleuse preto de media tonelada de residuos.

Información máis completa no ficheiro adxunto.

Hoxe tivo lugar no noso pavillon un acto co que se inaugurou a actividade "Xesto deportivo, Nena e deporte". O noso centro é un dos que participa e a Deputación escolleu o IES Martaguisela para a inauguración.

O alumnado de 2 ESO das materias de Relixión e Proxecto Competencial (este curso o Proxecto é sobre Intelixencia Emocional) visitou a Residencia Nuestra Señora de Fátima.

Ali tiveron a oportunidade de coñecer ao persoal do centro e aos internos e internas aos que entrevistaron interesándose pola súa vida e pasando un rato de charla con eles. Unha experiencia de convivencia solidaria e que fomenta o bo trato e a visibilidade das persoas maiores, moitas veces esquecidas por esta sociedade que vive tan á présa.

Máis imaxes aquí.

O mércores, día 28 de xuño, tocoulle ao profesorado do IES Martaguisela realizar unha excursión pola Ribeira Sacra, despois dun intenso curso 2022-2023.

Comezaron a xornada visitando o Monforte medieval e histórico (conxunto arquitectónico de San Vicente do Pino, a Torre da Homenaxe, o Parador Nacional, a igrexa e o Pazo Condal. Continuaron a visita guiada con Vicente, guía turístico da empresa Novas Rutas, polas rúas da xudería, a igrexa da Régoa, a Calexa, a ponte medieval, o claustro do Museo do Viño, o Parque dos Condes e o exterior do Colexio de Nosa Señora da Antiga.

Xa cara á mediodía desprazáronse a Sober, concretamente á Alfarería de Gundivós onde Elías lle explicou e mostrou a técnica e elaboración da cerámica tradicional típica desta zona, e para repoñer forzas degustaron as delicias do Restaurante Berso de Sober.

Antes de rematar a viaxe por terras monfortinas visitaron o Mirador do Duque e achegáronse ata a adega Regina Viarum de Doade.

Foi un día cheo de emocións positivas, de reencontro con antigos compañeiros e compañeiras que nos serviu para termos unha convivencia fóra da dinámica do traballo diario despois dun curso moi intenso.

Moitas grazas  a todas e a todos!!

Deixámosvos máis fotografías da xornada e o vídeo-resumo elaborado por Rose.

O alumnado de 1º ESO participou durante os días 13 e 20 de xuño nun obradoiro de educación emocional e afectivo-sexual e prevenció de condutas de risco (alcohol, tabaco, ...) impartido por Manoli, enfermeira da área sanitaria de Ourense, Verín e O Barco de Valdeorras.

Con estas xornadas o alumnado puido adquirir nocións básicas sobre prevención de condutas de risco que na etapa da adolescencia comezan a xurdir.

A adolescencia é unha etapa de continuos cambios, moi emocionante para a rapazada, na que se consolidan comportamentos, actitudes e aptitudes, claves para a súa vida.

Foi un obradoiro adaptado á idade da rapazada e de forma amena e dinámica.

Deixámosvos máis fotografías da xornada.

Día 1:

O alumnado de 3º ESO C, Xoel Fernández Jones, Fernando López Braz, Eva López García, Nerea López García, Xiana Pungín Estévez, Ander Quintáns Guerra, Mariamne Tamerón Andreu e Lucas Valcarce Fernández, do IES Martaguisela que resultou gañador da Fase Final Galega do XXXI RALLY MATEMÁTICO goza estes días por Madrid.

Saíron o martes, día 27 de xuño a media mañá do instituto en compañía da súa profesora de Matemáticas, Belén Lombardía e os outros tres centros educativos (IESMaría Casares de Oleiros, Sagrado Corazón Placeres de Marín e o IES Blanco Amor de Ourense)que tamén resultaron gañadores noutras categorías.

Ao chegaren a Madrid levaron a cabo unha ruta matemática de sólidos platónicos na zona de Arganzuela. A ruta desenvolveuse polo paseo Juan Antonio Vallejo Nágera, iniciando o percorrido na estación de cercanías de Delicias e rematando na Rúa Jemenuño.

Nos 3.3 Km de camiño observaron diferentes esculturas dos sólidos platónicos (octaedro, icosaedro, tetraedro, hexaedro ou cubo e dodecaedro) así como varias pirámides o obeliscos.

Tamén tiveron ocasión de ver un cadrado máxico, que ten a propiedade de que todas as filas, todas as columnas e as súas diagonais suman o mesmo.

Pola noite, descanso no hotel para mañá gozar do parque Warner.

Deixámosvos máis fotografías de diferentes momentos da xornada.

Día 2:

A primeira hora da mañá do mércores, día 28 de xuño, pasearon polos arredores do Palacio Real e asistiron ao cambio de garda, a contemplaron tamén a Catedral da Almudena e o templo de Deboh.

A partir das 12:00h, hora de apertura do Parque Warner, comezaron a gozar das atraccións.

Xa pola noite, tocaba descansar para afrontar o terceiro e último día da excursión antes de volveren cara á casa.

Deixámosvos máis fotografías de diferentes momentos da xornada.

Día 3:

Comezamos a xornada do xoves, día 29 de xuño, visitando o Museo Nacional de Ciencia e Tecnoloxía (MUNCYT) en Alcobendas. Asistiron a unha visita guiada na Sala Espazo e Tempo e posteriormente participaron nun obradoiro de electricidade. Alén disto tiveron tempo para gozar da Sala de Interactivos e da Sala de Patrimonio.

A última hora da mañá pasearon pola zona do Centro Comercial Praza Norte 2 en Alcobendas e rematado o xantar emprenderon viaxe cara ao Barco de Valdeorras.

Deixámosvos máis fotografías de diferentes momentos da xornada.

O pasado mércores, día 21 de xuño, tivo lugar a cerimonia de graduación do alumnado de 4º ESO.

Con esta celebración péchase un capítulo na vida educativa do alumnado, verdadeiro protagonista desta xornada.

Khadija Abettoy e Alberto Vázquez, representantes de 4º ESO B e A respectivamente, foron os presentadores e fío condutor do acto.

Ademais, dous alumnos/-as representantes de cada un dos grupos (Nerea Jiménez e Marta Blanco de 4º ESO B e Duarte Domínguez e Jairo Núñez de 4º ESO A) leron cadanseu discurso onde  tiveron palabras agarimosas tanto para os seus compañeiros e compañeiras como para o profesorado e repartiron diferentes agasallos elaborados por elas e eles mesmos.

Por último, os titores de cada un dos grupos, Alberto Pungín e David Ramos, ademais de dirixirlles unhas palabras aos seus titorandos, entregáronlles un diploma como lembranza deste acto.

Grazas, tamén, a todo o profesorado que colaborou na montaxe do escenario.

Parabéns e moita sorte na vosa seguinte etapa educativa, ben sexa o Bacharelato ou a Formación Profesional!.

Deixámosvos máis fotografías da xornada e os vídeos do acto.

O pasado martes, día 20 de xuño, no IES Martaguisela celebramos a I edición do “Pasapalabra” grazas á organización do departamento de Lingua Castelá, e sobre todo á implicación da profesora de 3º ESO, Pilar Rodríguez.

Neste concurso participou o alumnado de 3º ESO do noso centro educativo, representado por Lucas Valcarce de 3º ESO C e quen se tivo que enfrontar a Matilde Gonçalvez, representante do alumnado do IES de Sobradelo. Acompañando a expedición de Sobradelo veu o antigo profesor de Lingua Castelá, César González.

Despois de catro intensos minutos rematou gañando o IES Sobradelo, cun resultado de 13 acertos.

Esperamos que todos os participantes e asistentes gozasen do concurso que agardamos que se repita o vindeiro curso escolar.

Parabéns para o IES de Sobradelo!!!

Deixámosvos máis fotografías da xornada.