SERVIZOS |
Hai uns días, desde os ciclos de Integración social e Educación infantil, tivemos a oportunidade de conversar con Natalia Gómez Bayón arredor das familias acolledoras, como nai de acollida que é. Ao tempo, visibilizounos que o acollemento segue a ser un asunto pendente e urxente. Falounos tamén do labor da Asociación de familias acolledoras de Galicia (Acougo), que enlazando vidas, acompaña todo o proceso, con programas de apoio a crianzas e adolescentes (encontros entre irmás e irmáns, ocio positivo entre iguais, apoio educativo, fins de semana de respiro, campamento de verán…), programas de apoio ás familias e programas de difusión e sensibilización arredor da necesidade de priorizar o acollemento fronte outras medidas, espallando a cultura do acollemento. Respondeu a innumerábeis preguntas e achegounos a súa experiencia ao respecto das circunstancias que xiran arredor do acollemento: emocións, decisións, necesidades a cubrir, despedidas, reencontros, continuidade, rupturas, posibilidades… Deixounos claro que hai que reivindicar a acollida fronte ao internamento nos centros, nos que se esvaece a posibilidade de medrar sentíndose parte dunha familia, pois como sentirse parte da sociedade sen antes ser parte da túa familia? A clave? Ter claro que hai que moverse no círculo da influencia, o que podemos facer, e non no da preocupación, o que non está nas nosas mans. En realidade, as aprendizaxes que Natalia nos achegou son para a vida, non só para o acollemento. Son precisas máis nais e pais de acollida en Galicia e a través de Acougo hai programas que exploran as posibilidades de acollida: ao longo do curso, en fins de semana, acollida temporal ou tamén, permanente se fose o caso. É posible tamén participar da cultura do acollemento formando parte do voluntariado de Acougo, por se te animas! Moitas grazas, Natalia, por abrirnos a porta á acollida e convidarnos a reflexionar arredor do que significa acoller!
|
|||
A semana do 26 de febreiro ao 1 de marzo imos celebrar no IES de Chapela as Xornadas "Miradas diversas na infancia", organizadas polo Departamento de Servizos. Nestas xornadas levaranse a cabo distintas actividades para coñecer de primeira man experiencias de intervención e acompañamento a menores con diversidade funcional, así como para sensibilizar acerca da realidade que viven estes menores e as súas familias. Para iso contaremos con profesionais de recoñecido prestixio neste eido, procedentes de distintas entidades e centros da contorna. Tedes o tríptico informativo aquí.
|
|||
O grupo de teatro inclusivo Xanela, conformado por alumnado e profesorado de modular do CM Atención a persoas en situación de dependencia e o CS Integración social, persoas usuarias e profesionais da Asociación Xaruma para a inclusión social das persoas con trastornos mentais, e alumnado e profesorado da Escola Superior de Arte Dramática de Galicia (ESADg), estrea “Disparos de luz” o próximo venres 2 de xuño ás 19:30 horas no Multiúsos de Chapela (Piñeiral do Crego). A entrada é de balde ata completa aforo. Esperámosvos!
|
|||
O Departamento de Servizos xa está nas redes, podes seguirnos na conta @servizoschapela de Instragram (https://www.instagram.com/servizoschapela/). Con esta iniciativa tratamos de estar máis preto do alumnado, informando de ofertas de traballo, formacións que poidan ser de interese para a familia profesional e actividades que realicemos ao longo deste curso. Non dubides en seguirnos para estar ao día do que facemos no centro.
|
|||
|
|||||||||||||
Durante os meses de xaneiro, febreiro, marzo e abril; 4 alumnas do Máster en Profesorado da Universidade de Vigo cursaron as prácticas da súa formación no IES Chapela, máis concretamente no Departamento de Servizos á Comunidade. As alumnas, con experiencia profesional e formación propia do eido social, participaron activamente no desenvolvemento das clases das diferentes titulacións ofertadas dende o centro, así como en Actividades Complementarias á Formación como saídas formativas, charlas, etc. Nesta liña, todas elas experimentaron a práctica docente de xeito autónomo, aproximándose á súa futura labor profesional. Dende o Departamento de Servizos á Comunidade queremos agradecer a Patricia, Erea, María Belén e Alba o seu compromiso e traballo, así como felicitalas pola súa eminente titulación.
|
|||
|
|||||||||||||||
