O pasado día 30 de xaneiro o IES de Cotobade conmemorou o Día Escolar da Paz e a non-violencia por medio dun conto narrado por Pablo Chantrero e Manuel Sobral, alumnos de 2ºESO A, que destacaron coas súas voces a amargura da guerra e, en contraposición, a dozura da paz.
11h45. Foco sobre o butai, música suave, comeza a narración do Gaito Kamishibaiya.
A historia de Haruto, un piloto de avión xaponés que, despois da guerra, atopa como medio de vida a venda de lambonadas. Para chamar a atención dos rapaces tocaba uns paus (ioshigi); e cando se xuntaban diante del, empezaba a contarlles un conto cunha técnica, xa en desuso, que inventaran os monxes budistas aló polo século XI: O kamishibai (teatro de papel, en xaponés). Así, na súa bicicleta, Haruto percorreu o Xapón para contar historias invitando á paz. Di a lenda que cando morreu, se converteu nunha pomba branca.
A narración foi acompañada de doce láminas ilustrando a historia que ían pasando unha a unha polo teatriño de madeira. Esas mesmas láminas foron proxectadas á vez nunha gran pantalla e ambientouse a narración con sons e música que se fundían coas escenas e voces dos narradores. Felicitamos a Aitana Argibay, encargada do son e Xulia García, da imaxe, pola súa precisión e sincronización.
O silencio durante a narración e os aplausos ao remate da mesma foron sinal inequívoco de que a actividade foi todo un éxito.
Parabéns a todo o alumnado e profesorado participante.
Podedes ver o vídeo no seguinte enlace
https://www.youtube.com/watch?v=_igRkK5KAT0