O xoves 30 de Outubro o noso centro celebrou a festa do samaín cun concurso de deliciosos e terroríficos doces decorados para a ocasión. Celebramos a participación do alumnado na actividade e a súa implicación tanto na decoración de orixinais cabazas, nos disfraces e caracterización, así como nos fantásticos relatos de medo. A degustación e entrega de premios tivo lugar no hall do instituto, preparado e decorado para ocasión no que non faltaba detalle, obra de Beatriz Pérez Espiña, Xefa de Estudos e profesora de E.P.V e de MªLuisa Cousillas coordinadora de actividades extraescolares.

Recollemos neste vídeo a reportaxe fotográfica realizada e lamentamos que non se reflicte nas imaxes a totalidade do decorado, doces ou cabazas. O feito que aparezan uns e non outros non determina a calidade do produto, senón que foi imposible retratar e fotografar cada detalle do evento, xa que este curso todo eran detalles. Parabéns a todos os participantes por manter viva esta tradición!

O pasado venres día 25, acompañado polos profesores Xosé Carlos Morgade e MªLuisa Cousillas, un grupo de 33 estudantes de 1º da ESO do noso instituto achegáronse ao Museo de Pontevedra para visitar a exposición "Galaicos" e as salas de Prehistoria do museo. A exposición temporal "Galaicos", que leva por subtítulo "Un pobo entre dous mundos", recalará na nosa vila ata o 2 de febreiro para conmemorar o 125.º aniversario da Sociedade Arqueolóxica de Pontevedra.

A exposición amosa aos poboadores destas terras durante un período de máis de mil anos, o comprendido entre o crepúsculo da Idade de Bronce (1500-800 a. n. e.) e o século VI. Máis de 65 pezas e unhas ilustracións moi didácticas explican as etapas culturais sucesivas (castrexa, romana, sueva...) que conforman a nosa historia e a nosa identidade.

Por formar parte da materia de Xeografía e Historia en 1º da ESO, a visita foi organizada por este departamento.