IES Macías o Namorado

 O noso representante Iker Vázquez finalizou nun meritorio decimosegundo lugar na fase provincial de XOGADE.O seu esforzo levouno a competir coa elite desta proba de campo a través na última fase.

NORABOA IKER!

O pasado 10 de abril, o Alcalde de Padrón, D. Anxo Arca e a Concelleira de Cultura inauguraron unha exposición de imaxes que foran realizadas nun obradoiro do Departamento de Plástica co fotógrafo Fuco Reyes desenvolvido no IES MACIAS O NAMORADO durante o curso 22-23.

As fotografías nas que colaborara o alumnado de 4º da ESO, formaron parte do seu proxecto "O Espello de Claude" co que Fuco Reyes gañou o Premio Luis Ksado de creación fotográfica na súa XVII edición, organizado pola Deputación da Coruña no ano 2023.

As imaxes, (case unha vintena) están protagonizadas polo noso alumnado (agora en Bacharelato), e exploran os sentimentos da adolescencia e a súas vivencias interiores no Instituto. A exposición estará dispoñible ata mediados de maio e aberta ao público no horario do Auditorio Municipal padronés.

O pasado xoves 21 de marzo, o alumnado que cursa a materia de Proxecto Competencial de 1º e 2º ESO no IES Macías o Namorado visitou a fábrica de CLESA, localizada en Caldas de Reis (Pontevedra). 

CLESA é unha das marcas de produtos lácteos pertencentes á cooperativa CLUN, referente no sector agrogandeiro galego, que aposta pola sostibilidade e presenta un modelo de compromiso coa innovación e a calidade dos seus produtos.                                

Esta saída foi organizada polos departamentos de Bioloxía e Xeoloxía e de Educación Física, ambos os dous coordinadores do proxecto Nutriactívate co Macías!, co que neste curso 2023/2024 participamos no programa Nutriescolas (dentro do Plan Proxecta+).

No noso proxecto temos como obxectivo promocionar hábitos saudables no alumnado e resto da comunidade educativa, tanto desde o punto de vista da alimentación como da actividade física. Por este motivo, consideramos de gran interese a realización desta visita, pois os rapaces e rapazas que asistiron coñeceron de primeira man a fabricación de varios produtos lácteos e visitaron brevemente parte das instalacións. Tamén puideron probar algunhas das variedades de iogur (e incluso propoñer sabores novos!) e dar opinión sobre o novo logo e packaging dos produtos actuais.

O pasado mércores 6 de marzo, o alumnado que cursa a materia de Bioloxía de 2º Bacharelato do IES Macías o Namorado visitou o IDIS, Instituto de Investigación Sanitaria, localizado no Complexo Hospitalario Universitario de Santiago de Compostela (CHUS). 

O IDIS é un centro de investigación biomédica que busca promover e fomentar a investigación de excelencia, o coñecemento científico e tecnolóxico e o seu posterior traslado ao sector produtivo, así como a docencia e a formación, e sempre cun obxectivo claro: mellorar a saúde da poboación. 

De todos os grupos de investigación que forman parte deste centro, o alumnado puido coñecer os seguintes laboratorios: CARDIOCHUS (grupo de Cardioloxía), ONCOMET (grupo de Oncoloxía) e GENVIP (grupo de Xenética, Vacinas, Infeccións e Pediatría), todos eles integrados por equipos multidisciplinares de natureza transversal no ámbito da investigación básica e clínica aplicada que empregan as últimas tecnoloxías e métodos analíticos das diferentes disciplinas para optimizar o tratamento dos pacientes de cardioloxía, oncoloxía e pediatría.

As nosas alumnas rotaron polos distintos laboratorios adentrándose nas técnicas empregadas neles mediante a realización de talleres prácticos como unha extracción de ADN de saliva, a observación dunha mostra sanguínea ou de cultivos celulares de peixes cebra e a posterior análise da súa importancia na investigación en medicina.          

Desde o departamento de Bioloxía e Xeoloxía organizouse esta saída marcando como obxectivos: achegar o alumnado ao mundo da investigación, amosar o traballo desempeñado nun instituto de investigación acreditado como “centro de investigación do Sistema Nacional de Saúde”; contribuír ao espertar do interese científico; poñer en valor a importancia da investigación científica nos avances da medicina, e na busca do benestar da sociedade.