Escoitar, Aprender e Compartir

Visita á Xunta e ao Parlamento de Galicia

O venres 3 de novembro, alumnado de 4º da ESO realizou unha visita dobre en Santiago: ao edificio central da Xunta de Galicia e ao Parlamento Galego. 

Dende as 10:00 ata as 11:00, na Xunta de Galicia en San Caetano, recibiron a información sobre o funcionamento das diversas Consellerías e as reunións do Consello da Xunta, visitando as distintas salas onde se reúnen.

No Parlamento, a visita realizouse entre as 11:30 e 12:30. Percorrimos diversas salas onde se poden atopar diversas exposición sobre os parlamentarios e parlamentarias, retratos dos Presidentes do Parlamento Galego, salas dedicadas a Comisións Parlamentarias, incluída a Sala Dos Pasos Perdidos, onde se encontran os parlamentarios e parlamentarias durante as sesión dos plenos parlamentarios e o propio hemiciclo onde sentan os parlamentarios e parlamentarias para debater e votar. Os propios alumnos e alumnas tomaron “posesión” dos diversos escanos e houbo quen de subir á tribuna para falar e propor algunha iniciativa.

En ambos casos, as guías felicitaron expresamente o bo comportamento e a actitude do grupo, tanto do alumnado en xeral como de xeito particular.

Unha boa xornada!

 

 

 

 

Probas de acreditación de competencia lingüística en linguas estranxeiras 2023-24

Informamos de que a Consellería de Cultura, Educación, Formación Profesional e Universidades convocou por Resolución do 29 de setembro de 2023 un programa ao que o IES de Chapela vai solicitar adherirse para financiar a realización de probas de acreditación de competencia lingüística en linguas estranxeiras para alumnado de 4º de ESO, 1º e 2º de Bacharelato e Ciclos Formativos nos niveis B1, B2 ou C1 do Marco Común Europeo de Referencia para as Linguas. Máis información nesta ligazón.

O alumnado destes niveis interesado en participar nestas probas financiadas pola Consellería (no caso de que nos sexan concedidas) deberá presentar o seu compromiso de participación (asinado polo/a alumno/a ou polo/a responsable legal no caso de menores de idades), ben presencialmente en Xefatura de Estudos, ou ben por correo electrónico a ies.chapela@edu.xunta.gal, ata o 6 de novembro ás 12:00 do mediodía. No devandito compromiso deberá indicarse o idioma e o nivel que corresponda (B1, B2 ou C1), segundo decida o alumnado coa orientación do profesorado de lingua estranxeira de ser o caso. Pódese descargar aquí o documento de compromiso de participación.

Xornada de Magosto / Samaín no IES de Chapela

O 31 de outubro celebramos o noso Magosto / Samaín, nunha xornada chea de castañas, doces, bailes, xogos e sustos. Deixámosvos aquí algunhas fotos e este vídeo do túnel do terror organizado polo grupo de 1º de Educación Infantil.

De Chapela a Palestina, educando para a paz

O claustro do IES de Chapela, reunido en sesión extraordinaria hoxe, 25 de outubro, aprobou este texto en relación co conflito palestino-israelí como mostra do seu total rexeitamento á violencia que está a imperar nestes tempos de barbarie e do seu firme compromiso de educar para a paz.

Xubilacións no IES de Chapela

Time goes by… E o 23 de outubro chegou o día en que a nosa querida compañeira Tere Dacuña Vicente se xubilou, despois de 31 anos impartindo clases de inglés no IES de Chapela. Profesora case desde o inicio da andadura deste centro, foi un dos piares do IES de Chapela, e agora trémenos un pouco o chan baixo os pés coa súa marcha. Alumnado e profesorado quixemos acompañar a nosa teacher nun día tan especial dedicándolle no noso mellor inglés o tema Flowers, de Miley Cyrus. Agardamos que esta nova etapa non só veña cargada de flores para ti, senón que sexa toda ela como unha primavera sen fin que che permita seguir gozando cada día e seguir medrando máis e máis! Nós botaremos de menos a túa presenza nas aulas, na biblioteca, nos corredores, nos cafés, na sala do profesorado... Pero quedan aquí as túas pegadas e sempre che agradeceremos o teu compañeirismo e a túa amabilidade durante todos estes anos!

E a xubilación de Tere lembrounos a xubilación da súa inseparable amiga Cris Garabatos Cuadrado ao remate do curso pasado. Di un vello refrán que a memoria é como un mal amigo: cando máis a necesitas, fállache. Fallounos a memoria porque non nos acordamos de subir no seu momento unhas palabras de homenaxe a Cris, atafegados e atafegadas como estabamos coas tarefas de fin de curso. Mais di outro refrán que rectificar é de sabios. Así que só nos queda rectificar ese erro involuntario e recordar (como di Eduardo Galeano, "do latín re-cordis, volver a pasar polo corazón")... Recordar o marabilloso que foi compartir todos estes anos contigo e o gran traballo que fixeches como profesora de lingua e literatura española e como coordinadora incansable da biblioteca. Porque moitas xeracións de rapazas e rapaces aman hoxe e amarán sempre os libros grazas a ti. Porque contigo, co permiso de Pablo Neruda, "es tan largo el amor y es tan corto el olvido".

Moita sorte a ambas nas novas aventuras que vos agardan máis alá das paredes do IES de Chapela! Tedes aquí a vosa familia para cando queirades vir visitarnos.

FOLGA ESTUDANTES 26 OUTUBRO 2023

Folga de estudantes - 26 de outubro 2023

O alumnado do IES de Chapela, acolléndose ao seu dereito de reunión e tras o acordo alcanzado na Xunta de delegados e delegadas celebrada no centro o 19 de outubro, decidiu sumarse á decisión colectiva de non asistencia á clase o próximo 26 de outubro, secundando a folga convocada polo Sindicato de Estudantes "En solidariedade co pobo palestino".

Na seguinte circular informativa pódese consultar toda a información relacionada co procedemento a seguir polo alumnado, tanto aquel que secunde a folga como o que decide asistir con normalidade a clase.

ESCOLA DE PAIS E NAIS

Concurso de relatos de medo

Achégase o Samaín! Para celebralo, animádevos a participar no Concurso de relatos de medo organizado pola Biblioteca e o Equipo de Dinamización da Lingua Galega. Tedes ata o 6 de novembro para enviar os vosos arrepiantes textos escritos en lingua galega a bibliochapela@gmail.com.

Premios "Escola en Camiño"

Hoxe, martes 17 de outubro, Irene Signo Iglesias, alumna do IES de Chapela, recolleu un dos premios da categoría de debuxo da II edición do concurso "Escola en Camiño". O certame é un proxecto organizado por Faro de Vigo, en colaboración coa Consellería de Cultura, Educación, Formación Profesional e Universidades da Xunta de Galicia, que vai dirixido aos centros educativos de Galicia para divulgar entre as xeracións máis novas a dimensión cultural, social, económica e humanística do Camiño de SantiagoO acto de entrega de premios tivo lugar esta mañá na estación marítima de Vigo. Moitos parabéns á premiada!

Resolución das validacións do centro

Podedes consultar aquí a resolución das validacións do curso 2023-24 que son competencia do centro. Os datos aparecen anonimizados ocultando caracteres do documento de identidade das persoas solicitantes.

Distribuir contido