Curso 2017-2018

O alumnado do programa Erasmus+:Yes Young European in Sports está estes días en Francia devolvendo a visita dos estudantes franceses do Lycée Felix Faure de Beauvais compartindo as súas actividades e vida académica. Tamén tiveron tempo para visitar París onde coincidiron con tres ex-alumnos do Centro: Andrea Solla que estuda Filoloxía Francesa e está de Erasmus na capital gala, Miguel Costas Cochón que traballa no Departamento de Comunicación de Disney e Uxía Pintos Arís que é profesora de Inglés no Lycée Luis Buñuel. Pincha na imaxe para ver máis fotografías.

O alumnado de 1º de Bacharelato xa está en Italia disfrutando da súa viaxe. Pincha nesta imaxe de Venecia para ver máis fotografías.

O alumnado de 3ºESO D e o seu titor e profesor Jesús Portela acadan que a Real Academia Española (RAE) corrixa un erro que tiña na versión electrónica do seu diccionario. Pincha na imaxe para ver completo o artigo publicado na edición dixital da Voz de Galicia do martes 20 de marzo. Na parte inferior tedes unha foto da entrevista en Radio Nacional ao profesor e as alumnas do grupo Carmen Ruibal Sánchez e Lara Reguera Acuña, o escrito de resposta da RAE á solicitude dos alumnos, o telexornal Galicia do 21 de marzo no que se recolle a noticia a partir do minuto 20 e a información publicada no País do 26 de marzo.

A que foi durante máis de trinta anos Catedrática de Lingua Galega e Literatura no IES Valle Inclán Vitoria Ogando Valcárcel recibiu onte no Pazo da Pedreira xunto co seu home e ex-profesor do IES Sánchez Cantón Anxo González Guerra, o Premio Xoan Manuel Pintos otorgado polo Concello de Pontevedra en recoñecemento ao seu traballo no impulso da presenza da Lingua Galega na sociedade. 

Vitoria pertence á primeira promoción da Universade de Santiago de Filoloxía Galego-Portuguesa. No ano 1981 aprobou as oposicións a Cátedras de Lingua Galega e desde ese intre ata a súa xubilación impartiu clases no IES Valle Inclán, no que tamén foi moitos anos Secretaria do Centro. No ano 1987 publicou xunto con Anxo o libro "Exercicios de Lingua" e no ano 2005 crearon a páxina web ogalego.eu, a que aínda actualizan a día de hoxe e que se converteu nunha ferramenta de traballo fundamental para moito do profesorado e alumnado de toda Galicia. 

Noraboa de todo o Centro aos premiados.

Tamén podes escoitalos no programa de radio de Pontevedra Viva Conversas na Ferrería: Falando da lingua galega do xoves 14 de decembro de 2017.

O alumnado de 4º de ESO do programa Escola Embaixadora do Parlamento Europeo visitou o Parlamento Galego, onde lles explicaron o seu funcionamento, percorreron as suás instalacións e tiveron a oportunidade de presentar o noso proxecto europeo e preguntar todas as dúbidas a parlamentarios de distintos partidos políticos: Daniel Varela do PP, Luis Villares de En Marea, Noa Presas do BNG e Patricia Vilán do PSdeG-PSOE. Pincha na imaxe para ver máis fotografías.

O departamento de Inglés en colaboración coa editorial Burlington vai realizar como actividade complementaria para o alumnado de 1º, 2º e 3º de ESO, o que se coñoce como "culture class", na que profesorado nativo da editorial presenta de forma amena e interactiva co alumnado aspectos xerais da cultura británica relacionados coa comida, a familia real, o deporte, a música ou xente famosa. Pincha na imaxe para ver máis información (in English) sobre esta actividade e na parte inferior están os horarios da actividade para todos os grupos.

O alumnado de 2º de Bacharelato que participou como xurado e na entrega dos premios de Literatura San Clemente comparte a súa experiencia nun artigo publicado na edición dixital da Voz de Galicia do xoves 8 de marzo. Pincha na imaxe para ver o artigo.

Os alumnos de 2º de Bacharelato Miguel Álvarez Amoedo, Carlos Ben Arribi, Pablo Carballo Fraguas, Pablo Fariña Aldao, Ángela Sánchez Hernández e Emma Silva Monterroso, que xa formaran parte do xurado dos premios literarios San Clemente participaron o pasado xoves 1 de marzo na entrega de premios e cea de gala cos autores premiados: Xosé Monteagudo en lingua galega, Fernando Aramburu en lingua castelá e Ralf Rothmann en lingua estranxeira (que non puido acudir por un problema de saúde). Ante a presenza das autoridades politícas e educativas o noso alumnado representou de manera brillante ao noso Instituto. Temos que recordar que o IES Valle Inclán foi centro participante no primeiro ano no que se instauraron os premios e agora pechamos o círculo na súa XXIII edición. Os alumnos estiveron acompañados polos profesores de Lingua Castelá do Centro Fátima Cobas e Daniel Mejuto. Pincha na imaxe para ver máis fotografías do acto.

Este venres 2 de marzo tivo lugar no paraninfo do Centro a conferencia que tivera que ser aprazada da europarlamentaria Lidia Senra Rodríguez sobre a política agraria e pesqueira na Unión Europea. Lidia Senra respondeu ás preguntas do alumnado e criticou a proposta actual no inicio do debate do Parlamento Europeo sobre as claves que van marcar o mercado e a producción agraria en Europa ata 2020, xa que está centrada en alimentar ás clases medias do resto do mundo e emprobecer ás que non poden acceder aos alimentos, cada vez máis caros e peores nutricionalmente en vez de centrarse no mercado e producción interna. Pincha na imaxe para ver máis fotografías da conferencia.

O pasado sábado 24 de febreiro foi o día de Rosalía de Castro. A biblioteca do Centro en colaboración cos departamentos de Lingua Galega e Normalización Lingüística realizaron un sinxelo acto no que tres alumnos de 1º ESO A: Agustín de la Torre Franco, Lorena López Senra e Almudena Suárez Ruiz leron o manifesto da escritora María Reimóndez (escollida pola Asociación de escritoras e escritores en Lingua Galega para realizar o manifesto de 2018 no día de Rosalía:"Abride a fiestra") coa música de negra sombra de fondo e uns poemas seleccionados da obra de Rosalía Follas Novas.

Enlace ao manifesto "Abride a fiestra"

Coa finalización do antroido rematou o concurso de deseño de carautas, máscaras e antefaces de antroido, organizado polo departamento de Normalización Lingüística que destacou pola altísima participación do alumnado e pola calidade dos traballos presentados.

Os traballos e alumnado premiado foron os seguintes:

1º premio: Iria Méndez (2ºESO B)

2º premio: Yaiza Carballa (2ºESO B)  e Javier Carballal (2ºESO C)

r

3º premio: Athina Anasis (2ºESO D), Carlota Montes (1ºESO D) e Alicia Dopazo (2ºESO B)

O pasado venres 16 de febreiro a diputada autonómica e ex-alumna do Centro Patricia Vilán impartiu unha conferencia ao alumnado de 4º de ESO do proxecto de Escolas embaixadoras do Parlamento Europeo sobre medio ambiente e política parlamentaria europea. Pincha na imaxe para ver máis fotografías.

A ex-alumna do Centro e un dos mellores expedientes do Centro no curso pasado Sarah Vidal Horta, impartiu unha charla ao alumnado do programa europeo Erasmus+ na que relatou a súa experiencia no primeiro ano de carrreira e os seus métodos de traballo para acadar un bo rendemento. No triángulo estudos-descanso-vida social destacou a importancia do descanso, ata o punto de sinalar que nen o exame máis difícil quitáballe as 8 horas de soño.

Con motivo da celebración do día mundial da radio, o portal "ESCOLAS NAS ONDAS" convidou aos centros para que enviaran podcasts ou vídeos realizados polo alumnado. Estes alumnos de 1º de bacharelato gravaron na bibioteca do Centro un vídeo entrevistando a deportistas destacados das súas aulas.